میرانشاہ: کرم اور خیبر ایجنسی میں فورسز کی کارروائیوں میں کالعدم لشکر اسلام کے ترجمان سمیت تئیس دہشت گرد مارے گئے۔
ذرائع کے مطابق خیبرایجنسی کی واد ی تیرہ کے علاقے صحابہ میں شدت پسندوں کی گاڑی کو نشانہ بنایا گیا میزائل حملے میں کالعدم لشکر اسلام کے ترجمان صلاح الدین ایوبی سمیت سات دہشت گرد مارے گئے۔
دوسری جانب لوئر کرم کے سرحدی علاقے شبک میں فورسز کی کارروائی میں آٹھ دہشت گرد ہلاک جبکہ متعدد زخمی ہوگئے۔
ڈیرہ بگٹی : پیر کوہ میں ایف سی نے سات شدت پسندوں کو ہلاک کردیا۔
ذرائع کے مطابق خفیہ اطلاعات پر کئے جانے والے سرچ آپریشن کے دوران شرپسندوں نے ایف سی اہلکاروں پر فائرنگ کردی، جوابی کارروائی میں سات دہشتگرد مارے گئے۔
ترجمان ایف سی کے مطابق ڈیرہ بگٹی کے علاقے پیر کوہ میں ایف سی کا سرچ آپریشن جاری ہے ، شرپسندوں اور ایف سی کے درمیان فائرنگ کے تبادلے میں سات شرپسند مارے گئے، ملزمان کے قبضے سے بھاری مقدار میں اسلحہ اور گولہ بارود برآمد کر لیا گیا۔
برآمد اسلحہ اور گولہ بارود میں تیس کلو گرام دھماکہ خیز مواد ، بیس بم ، تیس ڈیٹونیٹرز چار ایس ایم جیز ایک راکٹ بھی شامل ہے۔
ترجمان ایف سی کے مطابق ہلاک ہونے والے ملزمان سیکورٹی فورسز اور قومی تنصیابات پر حملوں میں ملوث تھے۔
مہمندایجنسی: فورسز پر حملہ کرنیوالے سات دہشت گرد ہلاک کر دیئے گئے ہیں۔
مہمند ایجنسی میں سیکورٹی فورسز اور دہشت ردوں کے درمیان جھڑپ میں سات دہشت گرد ہلاک ہوگئے، آئی ایس پی آر کے مطابق مہمند ایجنسی کی تحصیل یکہ غنڈ میں عسکریت پسندوں نے سیکیورٹی فورسز پر حملہ کر دیا۔
فورسز کی جوابی فائرنگ سے سات دہشت گرد ہلاک ہوگئے، فائرنگ کے تبادلے میں کسی سیکیورٹی اہلکار کو نقصان نہیں پہنچا۔
آئی ایس پی آر کے مطابق دہشت گردوں کی لاشیں مقامی انتظامیہ کے حوالے کردی گئیں، جنہوں نے لاشیں ہیڈکوارٹر غلنئی اسپتال میں منتقل کر دی۔
خیبر ایجنسی: جیٹ طیاروں کی فضائی کارروائی میں سات شدت پسند مارے گئے۔
آئی ایس پی آر کے مطابق خیبر ایجنسی میں جیٹ طیاروں نے شدت پسندوں کے مختلف ٹھکانوں پر بمباری کی ، جس کے نتیجے میں سات شدت پسند ہلاک ہوگئے جبکہ فضائی کارروائی میں دہشتگردوں کے آٹھ ٹھکانے بھی تباہ ہوئے۔