کراچی: جدید ترین ٹیکنالوجی سے آراستہ بوئنگ 737 MAX پاکستان میں پہلی بار لینڈ کرے گا۔
تفصیلات کے مطابق فلائی دبئی کے میکس طیارے کو جدید ٹیکنالوجی سے آراستہ کیا گیا ہے، یہ طیارہ پہلی بار پاکستان میں لینڈ کر رہا ہے، اور 8 اپریل کو اس کی پرواز سیالکوٹ ایئر پورٹ پر اترے گی۔
سی اے اے نے میکس طیارے کو سیالکوٹ ایئر پورٹ پر لینڈنگ کی اجازت دے دی ہے، میکس طیارہ 100 سے زائد مسافروں کو دبئی سے لے کر سیالکوٹ پہنچے گا۔
میکس طیارے میں آرام دہ نشستیں، بزنس کلاس کے ساتھ فلائٹ انٹرٹینمنٹ کی سہولت میسر ہوگی۔
ریاض : سعودی عرب نے بھی پے در پے حادثات کے باعث بوئنگ طیارے خریدنے سے انکار کردیا،رپورٹ میں بتایا گیا ہے کہ طیارہ ساز کمپنی کے نئے جہاز 737 میکس کو پیش آنے والے حادثات میں مجموعی طور پر 346 افراد ہلاک ہوئے۔
تفصیلات کے مطابق سعودی عرب کی کم بجٹ والی ایئر لائن فلائی اے ڈیل نے بوئنگ کمپنی کے نئے طیارے 737 میکس کے 30 جہازوں کی خریداری کا آرڈر منسوح کر دیا ہے۔یہ فیصلہ بوئنگ 737 میکس طیاروں کے گذشتہ برس انڈونیشیا میں اور رواں برس ایتھوپیا میں پیش آنے والے فضائی حادثوں کے پیش نظر کیا گیا ہے۔
غیر ملکی میڈیا کا کہنا تھا کہ طیارہ ساز کمپنی کے نئے جہاز 737 میکس کو پیش آنے والے حادثات میں مجموعی طور پر 346 افراد ہلاک ہوئے تھے۔
ایتھوپیا میں ہونے والے حادثے کے بعد سے ان طیاروں کو گراؤنڈ کر دیا گیا ہے اور بوئنگ کمپنی اس طیارے میں موجود خامیوں کو دور کرنے پر کام کر رہی ہے تاکہ جہازوں کی پرواز کے حوالے سے نگراں ادارے کو مطمئن کیا جا سکے۔
بوئنگ کمپنی کا کہنا ہے کہ فلائی اے ڈیل نے پہلے سے طے شدہ آرڈر کو ‘طیارے کو ان کی ضروریات’ کے مطابق نہ ہونے کے پیش نظر منسوخ کیا ہے۔اس معاہدے کی کل قیمت 5.9 بلین ڈالرز تھی لیکن سعودی ایئر لائن کو بوئنگ کمپنی کی جانب سے اس قیمت پر رعایت بھی پیش کی گئی تھی۔بوئنگ کے طیاروں کا معاہدہ منسوخ ہونے کے بعد فلائی آے ڈیل جسے سرکاری سعودی عرب ائیرلائن کنٹرول کرتی ہے اب یورپی کمپنی ائیر بس کے 320 A جہازوں کا ایک بیڑہ چلائے گی۔
غیر ملکی میڈیا کا کہنا تھا کہ مارچ میں ایتھوپین ائیر لائن کی پرواز 302 ’ای ٹی‘ کو ہونے والا نقصان 737 میکس طیاروں کے گذشتہ پانچ ماہ میں ہونے والے حادثوں میں دوسرا جان لیوا حادثہ تھا۔اس ہی سے ملتا جلتا طیارہ جو انڈونیشیا کی ائیرلائن لاین ائیر کے پاس تھا وہ بھی گذشتہ برس اکتوبر میں جکارتہ کے قریب سمندر میں جا گرا تھا۔
خبر رساں ادارے کا کہنا تھا کہ حادثے کے تفتیش کاروں نے اپنی کوششیں طیارے کے کنٹرول کے نظام پر مرکوز کی ہیں اور بوئنگ کمپنی سافٹ ویئر کے اپ گریڈ کے لیے ریگولیٹرز کے ساتھ کام کر رہی ہے،اس جہاز کو دوبارہ پرواز کی اجازت ملنی کی کوئی حتمی تاریخ ابھی تک سامنے نہیں آئی ہے۔
میڈیا ذرائع کا کہنا تھا کہ گذشتہ ہفتے بوئنگ نے اعلان کیا تھا کہ وہ دونوں حادثات میں ہلاک ہونے والوں کے متاثرہ خاندانوں کی مدد کے لیے 100 ملین ڈالرز ادا کرے گا۔
غیر ملکی خبر رساں ادارے کا کہنا تھا کہ یہ ادائیگی کئی برسوں سے جاری ان مقدموں سے الگ ہے جو ان حادثات کے پیش نظر درج کیے گیے جن میں مشترکہ طور پر 346 افراد ہلاک ہوئے تھے۔ متاثرین کے وکلا نے اس اقدام کو مسترد کر دیا ہے۔