امریکا میں ایک 8 سالہ بچے نے اپنی 5 سالہ بہن کو مرگی کا دورہ پڑتے دیکھا تو اسے بچانے کے لیے پولیس کو کال کردی۔ پولیس نے بچے کی حاضر دماغی پر اسے تعریفی اسناد سے نوازا۔
یہ واقعہ امریکی ریاست ٹیکسس میں پیش آیا جہاں ایک 5 سالہ بچی کینیڈی کو مرگی کا دورہ پڑا۔ بچی کی ماں کے مطابق جب وہ نیند سے اٹھی تو اس نے دیکھا کہ بچی کا جسم اکڑا ہوا تھا، وہ زور زور سے رو رہی تھی اور چلا رہی تھی۔
بچی کو ڈائبیٹک سیزر کا مرض لاحق تھا جس میں بلڈ پریشر اور شوگر کی سطح بالکل نیچے چلی جاتی ہے جس کے بعد مرگی کا دورہ پڑجاتا ہے۔
ایسے موقع پر جب ماں کے ہاتھ پاؤں پھول گئے اور اس کے حواسوں نے کام کرنا چھوڑ دیا، 8 سالہ بچے نے حاضر دماغی کا مظاہرہ کرتے ہوئے 911 پر کال کردی جس کے بعد پولیس نے بروقت پہنچ کر بچی کو ایمبولینس منتقل کیا۔
ماں کا کہنا ہے کہ اس کی بچی کو پہلی بار مرگی کا دورہ پڑا تھا اور اسے کچھ سمجھ نہیں آرہا تھا کہ وہ کیا کرے، اس کے بیٹے نے بروقت صحیح قدم اٹھایا اور اسے اپنے بچے کی ذہانت پر بے حد فخر ہے۔
پولیس نے بھی بچے کی حاضر دماغی کا اعتراف کرتے ہوئے اسے تعریفی اسناد سے نوازا۔
