کراچی : 8 محرم الحرام کے جلوس کے پیش نظر ایم اے جناح روڈ سے ملحقہ گلیوں کو کنٹینرز لگا کر بند کر دیا گیا اور گزرگاہ پر موجود دکانوں کو بھی سیل کردیا گیا۔
تفصیلات کے مطابق کراچی میں اٹھ محرم کا جلوس دوپہر بارہ بجے نشتر پارک سے برآمد ہوگا اور اپنی روایتی راستوں سے ہوتا ہوا حسینیہ ایرانیاں کھارادر میں اختتام پذیر ہوگا۔
جلوس کے موقع پر سیکیورٹی کے سخت انتظامات کیے گئے ہیں اور ایم اے جناح روڈ سے ملحقہ گلیوں کو کنٹینرز لگا کر بند کر دیا گیا ہے۔
جلوس کی گزرگاہ پر موجود دکانوں کو بھی سیل کردیا گیا ہے، جلوس کی حفاظت پر پانچ ہزار سے زائد پولیس اہلکار تعینات ہوں گے جبکہ رینجرز کے پندرہ سو سے زائد اہلکار بھی فرائض سرانجام دیں گے۔
آٹھ، نو اور دس محرم کو ایم اےجناح روڈ ٹریفک کیلئے مکمل بند ہوگا جبکہ سولجر بازار اور کوریڈور تھری کو متبادل روٹ کے طور پر استعمال کیا جائے گا جبکہ شارع فیصل کو بھی متبادل روٹ کے طور پر استعمال کیا جاسکے گا۔
انتظامیہ کے مطابق آٹھ، نو اور دس محرم کو گرین لائن بس سروس معطل رہے گی۔