سعودی عرب میں حج سیزن 2025 کا آغاز ہوچکا ہے، مسجد الحرام میں عازمین حج کی آمد شروع ہوگئی، وزٹ ویزا رکھنے والوں کی مکہ مکرمہ یا مقدس مقامات میں رہائش پر سخت پابندی لگادی گئی ہے۔
سعودی خبر رساں ادارے کی رپورٹ کے مطابق مکہ مکرمہ یا مقدس مقامات میں رہائش پر پابندی کی خلاف ورزی کرنے والوں کو ایک لاکھ ریال تک جرمانہ کیا جائے گا۔
سعودی عرب کی وزارت داخلہ کے مطابق ان ہدایات سے متعلق مقامی شہریوں اور مقیم غیرملکیوں کو خبر دار کر دیا ہے۔
واضح رہے کہ پاکستان میں وزارت مذہبی امور کے ترجمان نے بتایا ہے کہ حج آپریشن کے دوران 98 فیصد سرکاری عازمین کرام کے حج ویزے جاری ہوچکے ہیں۔
ترجمان وزارت مذہبی امور نے بتایا کہ حج آپریشن 2025 کے دوران بعض نیم خواندہ اور دوردراز علاقوں کے عازمین حج کو بائیومیٹرک مسائل پیش آئے، درست بائیومیٹرک نہ ہونے پر ڈیڑھ فیصد زیرالتوا ویزوں کے اجرا پر کام جاری ہے۔
انھوں نے بتایا کہ نصف فیصد غلطیوں والے ویزوں کا دوبارہ اجرا جلد مکمل ہوجائیگا، وزارت کا حج آئی سیل ایسے عازمین کی معاونت کیلیے مسلسل رابطے میں ہے۔
سعودی عرب: حج ضوابط کی خلاف ورزی، سزاؤں پر عمل درآمد شروع
وزارت مذہبی امور نے بتایا کہ ویزہ یا نجی وجوہات کی باعث رہ جانے والے عازمین کو اگلی پروازوں میں بھیجا جارہا ہے۔
ترجمان وزارت مذہبی امور کا مزید کہنا تھا کہ وزارت کے حاجی کیمپ ہفتے کے ساتوں دن عازمین کی سہولت کیلئے کھلے ہیں۔
