لاہور : لاہور ہائیکورٹ کے نئے نو ایڈیشنل ججز نے اپنے عہدے کا حلف اٹھالیا، جس کے بعد جج کی تعداد 43 ہوگئی ہے۔
تفصیلات کے مطابق لاہور ہائیکورٹ کے نئے نو ایڈیشنل ججز کی حلف برداری کی تقریب ہوئی۔
تقریب میں نئے ایڈیشنل ججز نےعہدے کا حلف اٹھایا، چیف جسٹس لاہور ہائیکورٹ جسٹس عالیہ نیلم نے ججوں سے حلف لیا۔
حلف اٹھانے والے ججز میں جسٹس حسن نواز مخدوم، جسٹس ملک وقار حیدر اعوان ، جسٹس سردار اکبر علی ڈوگر ، جسٹس ملک جاوید اقبال وینس ،. جسٹس سید احسن رضا کاظمی ، جسٹس محمد جواد ظفر ، جسٹس خالد اسحاق ، جسٹس ملک محمد اویس خالد اور جسٹس چوہدری سلطان محمود شامل ہیں۔
تقریب میں لاہور ہائی کورٹ کے ججز اور افسران نے شرکت کی، تقریب میں وکلا رہنماوں اور نئے تعینات ہونے والے ججز کی فیملیز بھی شریک تھیں۔
رجسٹرار ہائی کورٹ عبہر گل خان نے تقریب میں نظامت کے فرائض انجام دیے ۔
نئے ججز کے حلف اٹھانے کے بعد لاہور ہائیکورٹ میں جج کی تعداد 43 ہوگئی ہے۔