لاہور : 9 مئی تھانہ شادمان نذر آتش سمیت دو مقدمات میں پی ٹی آئی رہنماؤں کی جائیدادیں ضبط کرنے کا حکم دے دیا گیا۔

تفصیلات کے مطابق جناح ہاؤس کے قریب پولیس کی گاڑیاں جلانے اورپولیس اسٹیشن کو آگ کے دو فیصلوں میں پی ٹی آئی رہنماؤں کی قید و جرمانےکی سزاؤں کی تفصیلات سامنے آ گئیں۔

عدالت نے تحریک انصاف کے رہنماؤں یاسمین راشد،عمرسرفرازچیمہ ،محمودالرشید اور اعجاز چوہدری کی جائیدادیں ضبط کرنے کا حکم دے دیا۔

تمام مجرموں کو قید بامشقت کی سزا سنائی گئی اور پانچ پانچ لاکھ جرمانہ بھی ادا کرنے کا حکم دیا گیا جبکہ عدالت نے حکم دیا جرمانہ ادا نہ کرنے پر مزید قید کاٹنی ہوگی۔

عدالت نے جلاؤ گھیراؤکے دونوں مقدمات میں پی ٹی آئی کے وائس چیئرمین شاہ محمود قریشی بری کیا جبکہ ڈاکٹریاسمین راشد، عمرسرفراز چیمہ، اعجازچوہدری اور میاں محمود الرشید کو مجموعی طور پر مختلف دفعات میں تیس تیس سال کی سزا ہوئی۔

مزید پڑھیں : 9 مئی کیسز: یاسمین راشد اور اعجاز چوہدری کو 10، 10 سال قید، شاہ محمود بری

اسی طرح ڈاکٹریاسمین راشد، عمرسرفرازچیمہ ، اعجازچودھری اورمحمود الرشید کوانسداد دہشت گردی قانون کے تحت دس دس سال سزا سنائی گئی۔

بغاوت کی دفعات کے تحت بھی پی ٹی آئی رہنماؤں کو دس سال قید کی سزا ہوئی۔ مختلف دفعات کے تحت پانچ ، تین اور دو دو سال کی سزائیں بھی شامل ہیں، عدالت نے حکم دیا مجرموں کو تمام سزائیں ایک ساتھ کاٹنی ہوں گی۔

پولیس کی گاڑیاں جلانے پرعائشہ علی بھٹہ کو بھی قید و جرمانہ جبکہ تھانہ شادمان کو آگ لگانے کے مقدمے میں عالیہ حمزہ اورصنم جاوید کو پانچ پانچ سال قید کی سزا سنائی گئی۔

لاہور : بانی پی ٹی آئی نے جناح ہاوس حملہ سمیت نو مئی کے 8 مقدمات میں ضمانت کیلئے لاہور ہائیکورٹ سے رجوع کر لیا۔

تفصیلات کے مطابق بانی پی ٹی آئی نے نو مئی کے 8 مقدمات میں ضمانت کیلئے لاہور ہائیکورٹ میں درخواست دائر کردی۔

عمران خان نے بیرسٹر سلمان صفدر کے ذریعے جناح ہاؤس حملہ سمیت دیگر مقدمات میں درخواست ضمانت دائر کیں۔

درخواستوں میں موقف اختیار کیا گیا ہے کہ 9 مئی کو بانی پی ٹی آئی اسلام آباد میں نیب کی تحویل میں تھ، نو مئی کے واقعات میں ان کا کوئی کردار نہیں مگر سازش کا الزام لگا اور مقدمات میں نامزد کیا گیا ہے۔

درخواستوں میں مزید کہا گیا ہے کہ 2 برس سے مقدمات کا سامنا کر رہے ہیں، ان کے خلاف انتقامی کارروائی کی جا رہی ہے، ماتحت عدالت نے بھی حقائق کو نظر انداز کر کے ضمانتیں مسترد کیں۔

درخواست میں استدعا کی گئی کہ 8 مقدمات میں رہائی کیلئے ضمانت کی درخواستیں منظور کی جائے۔

اس سے قبل عمران خان نے ضمانت کیلئے انسداد دہشت گردی عدالت سے رجوع کیا تھا، بعد ازاں انسداد دہشت گردی عدالت نے 12 مقدمات میں سے 4 مقدمات میں ضمانت منظور کی تھی اور 8 مقدمات میں ضمانت کی درخواستیں مسترد کر دیں تھیں۔

راولپنڈی: انسداد دہشت گردی عدالت میں 9 مئی کے 13 مقدمات کی سماعت پراسیکیوشن نے پی ٹی آئی کے 3 رہنماؤں سے متعلق اپنا بیان واپس لے لیا۔

تفصیلات کے مطابق راولپنڈی کی انسداد دہشت گردی عدالت میں نو مئی کے تیرہ مقدمات کی سماعت ہوئی، انسداد دہشت گردی کی خصوصی عدالت کے جج امجد علی شاہ نے کیس کی سماعت کی۔

شیخ رشید، عمر ایوب، بابر اعوان، راجہ بشارت، کنول شوذب اور شیریں مزاری پیش ہوئیں، دوران سماعت مقدمے میں پیش 3 گواہوں سے متعلق پراسیکیوشن نےلاعلمی کا اظہار کر دیا۔

پراسیکیوشن ٹیم نے پی ٹی آئی کے تین رہنماؤں سے متعلق اپنا بیان واپس لے لیا اور عدالت کو بتایا صداقت عباسی،واثق قیوم اورعمر تنویر بٹ وعدہ معاف گواہ نہیں رہے، تینوں اپنے اقبالی بیان سے منحرف ہو گئے ہیں۔

عدالتی عملے نے رہنماؤں کوحاضری لگا کرجانےکی اجازت دےدی اور 9مئی کے 13 مقدمات کی سماعت2 دسمبرتک ملتوی کردی گئی۔

خیال رہے تینوں گواہان بانی پی ٹی آئی اور پارٹی قیادت کیخلاف 164 کے بیان سے منحرف ہوئے تھے۔

یاد رہے اگست میں انسداد دہشت گردی کی خصوصی عدالت راولپنڈی میں 9 مئی کیسز میں دو گواہوں نے عدالت میں درخواست جمع کرائی تھی۔

سابق ڈپٹی اسپیکر پنجاب اسمبلی واثق قیوم اورعمرتنویر بٹ نےدرخواست جمع کرائی تھی ، جس میں کہا تھا بانی پی ٹی آئی عمران خان کیخلاف وعدہ معاف گواہ بن کر ایسا بیان کسی مجسٹریٹ کےسامنے یا تحریری نہیں دیا۔

اسلام آباد : بانی پی ٹی آئی نے 9 مئی مقدمات میں فوجی تحویل میں دینے کے خدشے کے پیش نظر اسلام آبادہائیکورٹ سےرجوع کرلیا۔

تفصیلات کے مطابق 9 مئی کے مقدمات میں بانی پی ٹی آئی کو فوجی تحویل میں نہ دینے کی درخواست دائر کردی گئی۔

اسلام آبادہائیکورٹ میں بانی پی ٹی آئی کی درخواست وکیل عزیر بھنڈاری نے دائر کی، جس میں 9مئی مقدمات میں ملٹری کورٹ ٹرائل کیلئے فوجی تحویل میں نہ دینے کی استدعا کی گئی ہے۔

درخواست میں سیکریٹری قانون،سیکریٹری داخلہ اور وفاق سمیت آئی جی اسلام آباد،آئی جی پنجاب،آئی جی جیل خانہ جات،ڈی جی ایف آئی اے کو فریق بنایا گیا ہے۔

درخواست میں موقف اختیار کیا گیا ہے کہ یقینی بنایاجائے کہ نومئی مقدمات کی سماعت سویلین عدالتوں میں ہو۔

یاد رہے وزیر دفاع خواجہ آصف نے اہم بیان دیتے ہوئے کہا تھا کہ بانی پی ٹی آئی کا ملٹری ٹرائل ہو سکتا ہے۔

ان کا کہنا تھا کہ پی ٹی آئی جب تک 9 مئی پر قوم سے معافی نہیں مانگتی بات نہیں بڑھے گی، 9 مئی کا احتساب 200 فیصد ہونا چاہیےم پی ٹی آئی دورِ حکومت میں 24 سویلینز کے کیس ملٹری کورٹ میں چلائے گئے جبکہ متعدد کو سزائے موت سنائی گئی۔

گوجرانوالہ: انسداد دہشت گردی کی عدالت نے 9 مئی کے مقدمات میں مراد سعید، حماد اظہر، فرخ حبیب اور علی امین گنڈاپور سمیت پی ٹی آئی کے 51 رہنماؤں کے ناقابلِ ضمانت وارنٹ جاری کر دیے۔

تفصیلات کے مطابق انسداد دہشت گردی (اے ٹی سی) نے 9 مئی کو گوجرانوالہ کینٹ پر حملے اور جلاؤ گھیراؤ کے مقدمے میں پولیس کی استدعا پر وارنٹ جاری کیے ہیں۔

پولیس نے ناقابل ضمانت وارنٹ گرفتاری کیلئے عدالت میں درخواست دی تھی، عدالت نے مراد سعید، حماد اظہر، فرخ حبیب، علی امین گنڈا پور ، عمر ایوب، زبیر نیازی، زرتاج گل، اکرم ساہی کے وارنٹ جاری کئے۔

پولیس کی جانب سے عدالت سے کہا گیا کہ ملزمان مقدمے میں نامزد ہیں اور گرفتاری سے بچنے کے لیے روپوش ہیں، انسداد دہشت گردی (اے ٹی سی) نے مزید کارروائی کے لیے 23 دسمبر کو رپورٹ طلب کر لی۔

راولپنڈی : پولیس نے عدالت سے 9 مئی کے مقدمات میں نامزد ملزمان کی دوبارہ گرفتاری مانگ لی تاہم عدالت نے 100 سےزائدملزمان کے جسمانی ریمانڈ کی استدعا خارج کردی۔

تفصیلات کے مطابق پولیس نے 9 مئی کے واقعات کی تحقیقات کا دوبارہ آغاز کرتے ہوئے 100 کےقریب ملزمان کو انسداد دہشت گردی عدالت پیش کردیا۔

کیس کی سماعت انسداد دہشت گردی عدالت کے جج ملک اعجاز آصف نے کی، پولیس نے عدالت سے 9 مئی کے مقدمات میں نامزد ملزمان کی دوبارہ گرفتاری مانگی اور کہا کہ 9 مئی مقدمات میں نامزد بیشتر ملزمان ضمانتوں پررہا ہوچکے ہیں۔

جس پر عدالت نے کہا کہ آپ لوگ غریبوں کےپیچھےکیوں پڑےہیں، بڑے عہدیداروں کو کیوں نہیں پکڑتے۔

اے ٹی سی نے 9 مئی واقعات کے نامزد ملزمان سے دوبارہ تفتیش کے معاملے پر 100 سےزائدملزمان کے جسمانی ریمانڈ کی استدعا خارج کردی، پولیس کی جانب سے ملزمان کے 2 روزہ جسمانی ریمانڈ کی استدعا کی گئی تھی۔

انسداد دہشت گردی عدالت میں مقدمات میں نامزد ملزمان کی جانب سے پی ٹی آئی کی قانونی ٹیم پیش ہوئی۔