کراچی : شہر قائد میں مختلف حادثات کے نتیجے میں گزشتہ 48 گھنٹوں کے دوران 9 افراد جان کی بازی ہار گئے جبکہ 7 کے زخمی ہونے کی اطلاعات ہیں۔
اے آر وائی نیوز کی رپورٹ کے مطابق کراچی میں مختلف ٹریفک حادثات میں گزشتہ اڑتالیس گھنٹے کے دوران نو افراد جاں بحق اور سات زخمی ہوگئے۔
شارع فیصل پر گاڑی کی ٹکر سے بائیس سالہ موٹرسائیکل سوار نوجوان حسنین جاں بحق ہوگیا، حادثہ شارع فیصل پر کار ساز کے قریب پیش آیا۔
سپرہائی وے پر نجی ہاؤسنگ سوسائٹی کے قریب ٹریفک حادثے میں دس سالہ لڑکا افضل جاں بحق اور دو افراد زخمی ہوئے۔ زخمی ہونے والے خان کمال اور رحمت اللہ کو طبی امداد کی فرایمی کیلئے اسپتال منتقل کردیا گیا۔
کراچی کے علاقے کورنگی نمبر ڈھائی کے پل کے قریب گاڑی کی ٹکر سے ایک راہ گیر خاتون موقع پر ہی جاں بحق ہوگئی، جس کی لاش قانونی کارروائی کیلیے جناح اسپتال پہنچائی گئی۔
اس کے علاوہ گھگر پھاٹک کے قریب تیز رفتار ڈمپر کی ٹکر سے ایک شخص جاں بحق اور تین شدید زخمی ہوگئے، زخمیوں کو مقامی اسپتال میں طبی امدد کے بعد روانہ کردیا گیا۔
جمالی پل پر ٹرک کی ٹکر سے دو افراد جان کی بازی ہار گئے، کورنگی ناصر جمپ پر ٹرالر کی موٹر سائیکل کو ٹکر کے باعث بچہ خاتون کی گود سے گر کر جاں بحق ہوا۔ نیٹی جیٹی پل پر کار کی ٹکر سے دو موٹر سائیکل سوار موت کے منہ میں چلے گئے۔
علاوہ ازیں گلشن اقبال فضل ملز پر شاپنگ مال کے قریب سڑک پر گڑھا پڑگیا، ٹریفک پولیس حکام کے مطابق گڑھا پڑنے سے ٹریفک کی روانی سست روی کا شکار ہے اور کوئی بھی حادثہ رونما ہوسکتا ہے، تاہم پولیس ٹریفک کے اہلکار کی ٹریفک کی روانی برقرار رکھے ہوئے ہیں۔
