وزیرستان : نو سالہ رضوان محسود نے ہیلی کاپٹر اسپن میں عالمی ریکارڈ بنا کر پاکستان کا نام دنیا بھر میں روشن کردیا، گننیز بک آف ورلڈ ریکارڈ میں بھارت کو پیچھے چھوڑ دیا۔
حوصلے بلند ہوں اورہمت جوان تو پھر حالات کچھ بھی ہوں، محنتی اور پرجوش کھلاڑی اپنی صلاحیت کا لوہا منوا ہی لیتے ہیں، وزیرستان کے نو سالہ رضوان محسود نے ہیلی کاپٹر اسپن میں عالمی ریکارڈ بنا کر دنیا کو حیران کر دیا۔
رضوان چھوٹا ہے تو کیا ہوا اس کے حوصلے تو چٹانوں کی طرح بلند ہیں۔ نوسال کے ننھے رضوان محسود نے مشکل حالات کے باوجود پاکستان کا نام فخر سے بلند کردیا۔
جنگ سے تباہ حال وزیرستان سے تعلق رکھنے والےرضوان محسود نے مایوسی کو مجبوری نہیں بنایا بلکہ اپنی انتھک محنت سے ورلڈ ریکارڈ بناد یا۔
رضوان نے تیس سیکنڈز میں چھالیس بار ہیلی کاپٹر اسپن کرکے بھارت کے پربارکر ایڈی کا ریکارڈ توڑا، رضوان کا نام گینیزبک آف ورلڈ ریکارڈ میں شامل کرلیا گیا ہے، رضوان محسود کی خواہش ہے کہ وہ ڈاکٹر بننا چاہتے ہیں لیکن انہیں مارشل آرٹ سے بھی بے پناہ لگاؤ ہے۔
