کراچی : ایم کیوایم کے رہنما ڈاکٹر فاروق ستار نے کہا ہے کہ نئی مردم شماری کے بعد دوہزار اٹھارہ میں سندھ کا وزیر اعلیٰ بھی ایم کیوایم کا ہوگا۔
ان خیالات کا اظہارانہوں نے ایم کیو ایم کے مرکز نائن زیرو پر متحدہ قومی موومنٹ کے نومنتخب بلدیاتی نمائندوں کی تقریب حلف برداری سے خطاب کرتے ہوئے کیا۔
نومنتخب بلدیاتی نمائندوں نے عوام اور پارٹی سے وفادار رہنے، مسائل کے خاتمے اور عوامی خدمت کا حلف اٹھایا۔ اپنے خطاب میں ایم کیو ایم کے رہنما فاروق ستار نے نئے صوبے کی جد و جہد کا نعرہ لگا دیا،انہوں نے تین مطالبات پیش کردیئے۔
انہوں نے کہا کہ اختیارات دو، مردم شماری کراؤ، ورنہ نئے صوبے بناؤ، انہوں نے کہا کہ اگر مردم شماری ہو جائے تو پھر سندھ کا وزیراعلیٰ کوئی وڈیرہ نہیں رہے گا، ایم کیو ایم بلدیاتی اختیارات، نئے صوبے اور مردم شماری کی جدوجہد کرے گی۔
تقریب سے خطاب کرتے ہوئے نامزد مئیر وسیم اختر نے عوام کی خدمت میں کوئی کسر نہیں چھوڑنے کا بھر پور عزم کیا۔ جبکہ نامزد ڈپٹی مئِر ارشد وہرہ کا کہنا تھا کہ چھ سال کے مسائل چند دن میں حل نہیں ہوسکتے۔ تاہم شہر کو ایک بار پھر مثالی شہر بنا کر دکھائیں گے۔
تقریب میں شریک تمام کونسلرز، چئیرمین، وائس چئیرمین نے اس بات کا اعادہ کیا کہ بلا تفریق، فرقے ، فقے اور سیاسی جماعت شہر اور عوامی خدمت کا سفر جاری رکھیں گے۔
