کراچی: جشن آزادی پر ہوائی فائرنگ کرنے والے 90 سے زائد ملزمان کو گرفتار کرلیا گیا، 100 سے زائد مقدمات درج کرلیے گئے۔
تفصیلات کے مطابق پولیس نے بتایا کہ کراچی میں یوم آزادی کے موقع پرفائرنگ میں ملوث 90 سے زائد ملزمان کو گرفتار کرلیا گیا ہے، ملزمان سے 68 غیرقانونی اسلحہ برآمد ہوا جبکہ ان کےخلاف 111 مقدمات درج کیے گئے ہیں۔
کراچی میں ہوائی فائرنگ کرنے والوں سے متعلق پولیس نے بتایا کہ قتل اور اقدام قتل کے مزید مقدمات بھی درج کیے جارہے ہیں۔
واضح رہے کہ پولیس سرجن کا کہنا ہے کہ یوم آزادی پر ہوائی فائرنگ سے 3 افراد جاں بحق ہوئے جبکہ 114 لوگ زخمی بھی ہوئے ہیں۔
پولیس سرجن نے بتایا کہ جاں بحق ہونے والوں میں 8 سالہ بچی بھی شامل ہے، سب سے زیادہ عباسی شہید اسپتال میں 43 زخمیوں کو لایا گیا، جناح اسپتال 41، شہید بےنظیر بھٹو ٹراما سینٹر میں 30 زخمیوں کو لایا گیا۔
ہوائی فائرنگ سے متعلق پولیس سرجن نے مزید بتایا کہ یوم آزادی پر اس سے قبل کبھی اتنے افراد جاں بحق اور زخمی نہیں ہوئے۔
خیال رہے کہ گزشتہ سال یوم آزادی پر ہوائی فائرنگ کی وجہ سے 100 افراد زخمی ہوگئے تھے اور 2 جاں بحق ہوئے تھے۔
https://urdu.arynews.tv/karachi-aerial-firing-news-14-august-2025/