بالی ووڈ کے معروف ہدایتکار روہت شیٹی نے بالی ووڈ کے تمام اسٹارز اداکاروں کو پولیس کی وردی پہنانے کی ٹھان لی ہے۔
بالی ووڈ کے معروف ہدایتکار روہت شیٹی ان دنوں اپنی ویب سیریز انڈین پولیس فورس کی ریلیز کی تیاریوں میں لگے ہوئے ہیں، جس میں سدھارتھ ملہوترا، شلپا شیٹی اور ویویک اوبرائے مرکزی کرداروں میں نظر آئیں گے۔
دوسری جانب ان دنوں روہت شیٹی اجے دیوگن کے لیڈ رول سنگھم اگین کی شوٹنگ بھی کر رہے ہیں اور یہ دونوں پروجیکٹ ان کے کوپ یونیورس کا حصہ ہیں۔
اس حوالے سے بطور ہدایتکار جب ان سے بھارتی میڈیا کی جانب سے پوچھا گیاکہ کیا وہ شاہ رخ خان، عامر خان اور سلمان خان میں سے کس کو اس سیریز میں شامل کریں گے؟
تو انہوں نے جواب دیا کہ تینوں کو لوں گا ایک کو بھی کیوں چھوڑ دوں، ابھی پوری انڈسٹری کو کوپ بنا دیں گے، ٹینشن مت لیں، کوئی نہیں بچے گا، ایک ہمارا الگ سے پولیس فنکشن ہوگا، جس پر زور دار قہقہہ لگا۔
یاد رہے کہ روہت شیٹی نے شاہ رخ خان کے ساتھ آخری فلم چنئی ایکسپریس کی تھی جو بہت ہٹ ہوئی۔
روہت شیٹی نے کہا تھا کہ میں چنئی ایکسپریس جیسی فلم دوبارہ بنانا چاہتے ہوں اگر مجھے کوئی ایسی اسٹوری ملی تو میں ایک نئی فلم ضرور بناؤں گا۔
