ممبئی: بھارتی گلوکار ابھیجیت بھاٹا نے انڈسٹری میں کام نہ ملنے پر شاہ رخ خان کے بعد اب سلمان خان کو تنقید کا نشانہ بنا ڈالا۔
تفصیلات کے مطابق پاکستانی گلوکاروں، اداکاروں اور عوام سے نفرت کرنے والے ابھیجیت بھاٹا نے انڈسٹری میں کام نہ ملنے کا ملبہ سلمان خان پر ڈالتے ہوئے کہا ہے کہ دبنگ خان بھارتیوں کے مقابلے میں پاکستانی گلوکاروں کو ترجیح دیتے ہیں۔
پاکستان کے خلاف ہرزہ سرائی کرنے اور انتہاء پسندی کی تعلیمات پر عمل پیرا بھارتی گلوکار نے کہا کہ ’سلمان خان پاکستانی گلوکاروں کے لیے نرم گوشہ رکھتے ہیں اور وہ اُن کو ہی موقع فراہم کرتے ہیں‘۔
مزید پڑھیں: شاہ رخ خان کو میں نے سپراسٹار بنایا: بھارتی سنگر کا انوکھا دعویٰ
ابھیجیت نے سوال کیا کہ ’کیا بھارتی گلوکار بالی ووڈ فلموں میں پس پردہ اپنی آواز کا جادو جگانے کے قابل نہیں ہیں؟‘۔
بھارتی گلوکار نے ایک بار پھر پاکستان کے خلاف اپنی نفرت کا کھل کر اظہار کرتے ہوئے مطالبہ کیا کہ ’بالی ووڈ انڈسٹری میں پاکستانی فنکاروں کے کام کرنے پر پابندی ہونی چاہیے‘۔
اُن کا کہنا تھا کہ سرحد پر ماحول کشیدہ ہے اُس کے باوجود سلمان خان کی ریلیز ہونے والی حالیہ فلم میں پاکستانی گلوکار نے گانا گایا جو ملک سے غداری کے مترادف ہے۔
ابھیجیت کا مزید کہنا تھا کہ ابھی میڈیا کے توسط سے سلمان خان تک اپنا مطالبہ پہنچانے کی کوشش کررہا ہوں اگر انہوں نے اس پر عمل نہ کیا تو پھر اگلا لائحہ عمل جلد بیان کروں گا۔
یہ بھی پڑھیں: پاکستانی فنکاروں کو لات مار کر نکال دینا چاہیے، بھارتی گلوکار ابھیجیت کی ہرزہ سرائی
یاد رہے کہ تین روز قبل یعنی 3 اکتوبر کو ابھیجیت نے مضحکہ خیز دعویٰ کیا تھا کہ شاہ رخ خان اُن کی آواز کیوجہ سے ہی سپر اسٹار بنے۔ اُن کا کہنا تھا کہ کنگ خان نے میری سریلی آواز پر ڈانس کر کے ہی شہرت کی بلندیوں کو چھوا۔
یاد رہے کہ ماضی میں ابھیجیت کا شمار اُن گلوکاروں میں ہوتا تھا کہ جن کے بغیر فلم کے مکمل ہونے کا تصور بھی نہیں تھا مگر وہ وقت گزر گیا اور نئے گلوکار سامنے آئے جس کے باعث انہیں کوئی ہدایت کار کام دینے کو تیار نہیں حتیٰ کہ اداکار بھی ابھرتے ہوئے گلوکاروں کو ترجیح دینے لگے ہیں۔
