لاہور : امیر تحریک لبیک پاکستان سعد رضوی نے کہا ہے کہ تحریک لبیک کے زیر اہتمام 22مئی سے مہنگائی کیخلاف احتجاجی مارچ کا آغاز کیا جائے گا، جو کراچی سے شروع ہوکر اسلام آباد تک روانہ ہوگا۔
لاہور میں پریس کانفرنس سے خطاب کرتے ہوئے انہوں نے پاکستان مسلم لیگ ن کو کڑی تنقید کا نشانہ بنایا اور ساتھ ہی چیئرمین پی ٹی آئی عمران خان کی طرز سیاست کو بھی آڑتے ہاتھوں لیا۔
انہوں نے کہا کہ ٹی ایل پی 22مئی کو کراچی سے اسلام آباد میں بھرپور احتجاجی مارچ کرے گی،25روپے پیٹرول بڑھا کر 12روپے کم کرنا قوم کے ساتھ مذاق ہے، ابھی ہمارا مارچ مہنگائی کیخلاف ہے، دفعہ 144 سندھ میں نہیں لگی جب تک اسلام آباد پہنچیں گے حالات بہتر ہوجائیں گے۔ ٹی ایل پی نے کبھی ایسا کام نہیں کیا جس کی وجہ سے دفعہ 144 لگے۔
انہوں نے کہا کہ عمران خان کے نکاح اور بیٹی کا معاملہ ان کا ذاتی مسئلہ ہے، ملک میں اور بھی مسائل ہیں سیاست کیلئے پاکستان کا نقصان نہ کیا جائے۔
نوازشریف نے قوم کے ووٹ کا غلط استعمال کیا، انہوں نے کہا کہ نوازشریف نے ملک سے باہر محل اور اپارٹمنٹس بنائے۔
انہوں نے کہا کہ قوم کو ایسے ہی لیڈر ملے جو ووٹ کو عزت دو کی بات کرتے ہیں مگر خود ویزہ لے کر لندن جاکر بیٹھ گئے۔
سعد رضوی نے کہا کہ پہلے نوازشریف نے قوم کے ووٹ کا غلط استعمال کیا اور پھر اپنے کاروبار کو لے کر ملک سے باہر چلے گئے نوازشریف نے ملک سے باہر بڑے بڑے محل اور اپارٹمنٹس بنائے عمران خان نے بھی اپنی ذات کے لیے یہی کچھ کیا۔
عمران خان کے حوالے سے ان کا کہنا تھا کہ پی ٹی آئی کی قیادت نے 9مئی کو جو کچھ کیا ہم اس کی سخت مخالفت اور مذمت کرتے ہیں، سانحہ9مئی کے جو بھی ذمہ داران تھے ان کو پکڑیں، ملوث لوگوں کو سزا دیں۔
انہوں نے کہا کہ اس وقت پاکستان کو اندرونی خطرات کا سامنا ہے لیکن تحریک لبیک پاکستان ملک کو کمزور کرنے کی ہر کوشش کو ناکام بنادے گی۔
سعد رضوی کا کہنا تھا کہ ملک میں اس وقت سیاسی اتفراتفری ہے، ہم سیاسی اور ذاتی انتقام کے خلاف ہیں تاہم ملک میں خواتین کے ساتھ جو سلوک کیا گیا اس کی مخالفت کرتے ہیں۔
امیر ٹی ایل پی نے کہا کہ تحریک لبیک پہلے بھی مہنگائی کیخلاف احتجاج کرچکی ہے، سعد رضوی ٹی ایل پی نے کبھی ملکی سالمیت کو خطرے میں ڈال کربات منوانے کی کوشش نہیں کی۔
ایک سوال کے جواب میں ان کا کہنا تھا کہ ٹی ایل پی کے نظریے پر جو بھی آجائے گا اس سے اتحاد ہوسکتا ہے، پی ڈی ایم دہرا معیار نہ اپنائے، پی ڈی ایم کی جانب سے سپریم کورٹ کے باہر گھیراؤ کی شدید مخالفت کرتے ہیں، ہم ہر وقت پاکستان کی مدد کریں گے، پاکستان کے لئے جس قربانی کی بھی ضرورت ہو دینگے۔
سعد رضوی نے کہا کہ ہم چاہتے ہیں کہ ملک بھر میں الیکشن ایک دن ہی ہونے چاہئیں، عمران خان نے جو سیاسی غلطیاں کی ہیں ان کو اس کا خمیازہ بھی بھگتنا پڑے گا۔ ماضی میں ہم پر جو جو الزامات عائد کیے گئے آج وہ تمام عمران خان پر لگائے جارہے ہیں۔
انہوں نے کہا کہ ہمارا احتجاج مہنگائی کیخلاف ہے الیکشن مہم کیلئے نہیں، ہم سے حکومت نہیں لیکن کمیشن کھانے والوں نے رابطہ کیا ہے، ہمارا مارچ ہوگا اگر حکومت روکے گی تو بھی ہوگا، جب تک ہمارے مطالبات نہ مانے گئے ہم سڑکوں پر ہوں گے۔
تحریک لبیک کے امیر کا کہنا تھا کہ الیکشن کے حوالے سے جب حکومت کی آئینی مدت پوری ہوگی تو بات کریں گے، ہم سسٹم میں آنے کے لیے اپنے بنیادی نظریے کے ساتھ محنت کرینگے۔
