اسلام آباد : وفاقی وزیر برائے پوسٹل سروسز مراد سعید نے کہا ہے کہ ہم فاٹا کو ہرطرح سے ترقی دیں گے، وزیرستان کے عوام نے محرومیاں دور کرنے کیلئے ووٹ دیے تھے۔
یہ بات انہوں نے قومی اسمبلی میں اظہارخیال کرتے ہوئے کہی۔ وفاقی وزیر مراد سعید کا کہنا تھا کہ انشااللہ ہم فاٹا کو ہرطرح سے ترقی دیں گے، اس بار پاکستان کی تاریخ میں سب سے بڑا بجٹ فاٹا کیلئے رکھا گیا ہے۔
اپوزیشن اراکین پر تنقید کرتے ہوئے ان کا کہنا تھا کہ وزیرستان کے عوام نے محرومیاں دور کرنے کیلئے ووٹ دیے تھے، فاٹا کی عوام نے ان کو ریاست کیخلاف بات کرنے کیلئے ووٹ نہیں دیا لیکن ہم ان کے حلقوں کی محرومیاں ہم ختم کررہے ہیں۔
مراد سعید نے مزید کہا کہ آپریشن سے مسئلے حل نہیں ہوتے مذاکرات سے ہوتے ہیں، یہاں کوئی سندھی، پنجابی، بلوچی یا پٹھان نہیں ہم سب ایک پاکستانی ہیں، چاہتا ہوں کہ پاکستان میں ہر طرح سے امن قائم ہو جائے۔
