Tag: additional IG karachi

کراچی : شہر قائد میں غضب کی گرمی شہریوں کا امتحان لے رہی ہے، پارہ اب تک 45 ڈگری تک جا پہنچا جبکہ گرمی کی شدت 46 ڈگری محسوس کی جارہی ہے۔

تفصیلات کے مطابق پنجاب، سندھ اور بلوچستان کے بیشتر علاقوں میں سورج آج بھی آگ برسا رہا ہے، کراچی میں پارہ 40 سے تجاوز کرگیا، محکمہ موسمیات کا کہنا ہے کہ کراچی کا درجہ حرارت45 ڈگری سینٹی گریڈ ہوگیا، سمندری ہوائیں بند ہونے سے گرمی زیادہ محسوس کی جارہی ہے۔

شہر کا موجودہ درجہ حرارت 45 ڈگری اور ہوا میں نمی کا تناسب 4 فیصد ہے جس کے بعد آج کا دن سال کا گرم ترین دن کہلایا جارہا ہے۔

محکمہ موسمیات نے شہر قائد میں شدید گرمی کی لہر جمعرات تک برقرار رہنے کا امکان ظاہر کیا ہے، تاہم جمعے سے شہر میں سمندری ہوائیں بحال ہونے سے ہفتہ اور اتوار کو موسم بہتر رہنے کی توقع ہے۔

محکمہ موسمیات کا کہنا ہے کہ سمندری ہوائیں بند ہونے سے ہیٹ ویو آنے کے خدشات ظاہر کئے جارہے ہیں، اس حوالے سے صوبائی اور شہری حکومتوں کے زیر انتظام اسپتالوں میں پہلے ہی ہیٹ اسٹروک ایمرجنسی نافذ ہے جبکہ ہیٹ ویو کی پیش نظر کمشنر کراچی کی زیر نگرانی ضلعی حکومتوں، رینجرز اور پولیس نے ہیٹ اسٹروک کیمپ قائم کررکھے ہیں۔

ماہرین صحت کا کہنا ہے کہ کراچی کے شہری گذشتہ دنوں پڑنے والی گرمی کی طرح احتیاط کریں اور شدید ہیٹ ویو اور ہوا میں نمی کم ہونے پر بلاضرورت باہر نکلنے سے گریز کریں اور ضرورت پڑنے پر دھوپ میں نکلتے وقت سر گیلے کپڑے سے ڈھانپ کر رکھیں۔

روزہ دار افطار وسحر میں دودھ دہی لسی اور ٹھنڈے مشروبات کا استعمال کریں، تلی ہوئی اشیاء اور فریج میں رکھے باسی کھانے اور کھلی فضاء میں فروخت ہونے والے کٹے فروٹ استعمال نہ کریں اور ساتھ ہی ساتھ ڈی ہائیڈریشن سے بچنے کے لئے دن میں دو بار نہانا بہتر رہے گا۔

گزشتہ روز کراچی میں درجہ حرارت 43 ڈگری سینٹی گریڈ ریکارڈ کیا گیا تھا۔

دوسری جانب سندھ پنجاب اور بلوچستان کے بیشتر شہروں میں میں قیامت خیز گرمی کا راج ہے، لاہور فیصل آباد اور سرگودھا میں آج درجہ حرارت پینتالیس ڈگری تک جانے کا امکان ہے جبکہ حیدر آباد 45 سکھرمیں48 اور موہنجوڈارو میں49 تک پارہ چڑھا رہے گا۔

تربت میں48 اورسبی میں درجہ حرارت 49 ڈگری سینٹی تک جاسکتا ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں