لاہور:پنجاب اسمبلی میں کم عمری کی شادیوں کے حوالے سے مؤثر قانون سازی اور میڈیکل کالجوں میں داخلے کیلئے بیان حلفی لینے کی قراردادیں کثرت رائے سے منظور کر لی گئیں ہیں۔
پنجاب اسمبلی کا اجلاس اسپیکر رانا محمد اقبال کی زیرِصدارت ہوا، جس میں مسلم لیگ نون کی عظمٰی زاہد بخاری نے کم عمری میں شادیوں کی روک تھام کیلئے مؤثر قانون سازی کی قرارداد پیش کی، جس کی جماعت اسلامی کے رکن نے مخالفت کی تاہم قرارداد کثرت رائے سے منظور کر لی گئی ہے۔
مسلم لیگ نون کی رکن نگہت شیخ نے میڈیکل کالجز میں داخلے کیلئے طلبہ و طالبات سے بیان حلفی لینے کی قرار داد پیش کی، جسے کثرت رائے سے منظور کر لیا گیا۔
قرار داد میں کہا گیا کہ اکثر طالبات پریکٹس نہیں کرتیں، طلبہ و طالبات کو پابند کیا جائے کہ وہ پانچ سال تک سرکاری ہسپتالوں میں ملازمت کریں۔
جماعت اسلامی کے رکن ڈاکٹر وسیم اختر نے پچہتر سال کی عمر کے ریٹائرڈ ملازمین کو مکمل پنشن دینے کی قرارداد پیش کی، جو حکومتی ارکان کی مخالفت کے باعث مسترد ہوگئی۔