Tag: addressed

نگراں وزیراعظم انوار الحق کاکڑ نے کہا ہے کہ بھارت ہمیں کئی بار آزما چکا ہے، اگر دوبارہ آزمانا چاہتا ہے تو ہم تیار ہیں۔

نگران وزیر اعظم انوار الحق کاکڑ نے یومِ یکجہتی کشمیر کے موقع پر آزاد کشمیر قانون ساز اسمبلی کے خصوصی اجلاس سے خطاب میں کہا کہ پاکستان کے عوام کشمیری ہر سال 5 فروری کو یوم یکجہتی کشمیر مناتے ہیں، قائد اعظم محمد علی جناح  نے کشمیر کو پاکستان کی شہ رگ قرار دیا تھا۔

نگراں وزیر اعظم نے کہاکہ مقبوضہ کشمیر میں جو کچھ ہورہا ہے اس سے لاتعلق نہیں ہوسکتے، پاکستان اور کشمیر اٹوٹ رشتے میں بندھے ہیں، کشمیر کاز کیلئے ہمارا عزم پختہ ہے، سلامتی کونسل کی قراردادوں، کشمیریوں کی امنگوں کے مطابق حل چاہتے ہیں۔

انہوں نے کہا کہ کشمیریوں نے جو قیمت ادا کی وہ بہت زیادہ ہے، پاکستان جموں و کشمیر کے تنازع کا اہم فریق ہے، پاکستان کشمیریوں کی سیاسی، سفارتی اور اخلاقی حمایت جاری رکھے گا، قائد اعظم  نے واضح کیا کہ کشمیر کے بغیر پاکستان نامکمل ہے، بھارت کشمیریوں کی رائے کے بغیر کوئی حتمی فیصلہ نہیں کرسکتا۔

نگراں وزیر اعظم انوارالحق کاکڑ کا کہنا تھا کہ دنیا کی سب سے بڑی جمہوریت ہونے کے بھارتی دعوے کھو کھلے ہیں، بھارت حکومت کشمیر پر غیرقانونی قبضے کو برقرار رکھنے کیلئے ظلم کررہی ہے، آج مقبوضہ کشمیر کھلی جیل دکھائی دیتی ہے۔

انوارالحق کاکڑ کا کہنا تھا کہ ہندوتوا کے زہریلے نظریے  نے ایسا ظلم ڈھایا جو پہلے کبھی نہیں ہوا، کشمیر میں جو کچھ ہوا وہ کسی انسانی المیے سے کم نہیں، بھارت مقبوضہ کشمیر پر ناجائز قبضے کو مضبوط کرنے کیلئے مزید حربے اپنارہا ہے، کشمیر پاکستان کی خارجہ پالیسی کی اہم ترجیحات میں سے ایک ہے۔

نگراں وزیراعظم نے کہا کہ عالمی برادری کو بیدار ہو کر اس بربریت کا نوٹس لینا چاہئے، عالمی برادری کو کشمیر میں خون ریزی پر بھارت کو جوابدہ بنانا چاہئے، گزشتہ 76 سال سے بھارت نے کشمیر پر قبضے کیلئے مختلف حربے اپنائے ہیں، 5 اگست 2019 کو بھارت نے مقبوضہ وادی کی خصوصی حیثیت کو ختم کردیا۔

ان کا کہنا تھا کہ گزشتہ کئی سالوں سے بھارت غلط بیانیے پیش کررہا ہے، بھارت انتہائی شرمناک کوششیں کررہا ہے، دہشت گرد اور عوام کی جدوجہد میں واضح فرق ہے، ہم بھارت کی طرف سے کشمیریوں کیخلاف ریاستی دہشتگردی کا مشاہدہ کررہے ہیں، کشمیر میں واحد دہشت گرد بھارت ہے۔

 انہوں نے کہا کہ ہم بقا تحمل پر یقین رکھتے ہیں ہم تنازع نہیں چاہتے، بھارت ہمیں کئی بار آزما چکا ہے، اگر دوبارہ آزمانا چاہتا ہے تو ہم تیار ہیں، پاکستان ہر گزرتے دن کشمیریوں کیساتھ اظہاریکجہتی کیلئے کھڑے ہیں۔