ایڈیلیڈ: بھارت کے خلاف ایڈیلیڈ ٹیسٹ میں خسارے میں جانے والی کینگروز نے شاندار کم بیک کرتے فتح کی راہ ہموار کرلی ہے۔
تفصیلات کے مطابق ایڈیلیڈ ٹیسٹ میں آسٹریلیا نے شاندار واپسی کرتے ہوئے بھارتی سورماؤں کو دوسری اننگز میں محض 36 رنز پر ڈھیر کردیا ہے اور کینگروز کو جیتنے کے لئے صرف نوے رنز کا ہدف دیا ہے۔
ٹیسٹ کرکٹ کی تاریخ میں بھارت کا یہ کم ترین اسکورہے، اس سے قبل ٹیسٹ میں بھارت کا کم اسکور 42 رنز تھا۔
بھارتی ٹیم کا کوئی بھی کھلاڑی ڈبل فیگر میں داخل نہ ہوسکا، مینک اگروال نے سب سے زیادہ نو رنز بنائے، انڈیا ٹیم آل آؤٹ نہیں ہوئی، آخری کھلاڑی محمد شامی ریٹائرڈ ہرٹ ہوئے، اس کے ساتھ ہی انڈیا کی دوسری اننگز کا خاتمہ ہوگیا۔
آسٹریلیا کی جانب سے پیٹ کمنس نے چار جبکہ جوش ہیزل ووڈ نے پانچ وکٹیں حاصل کیں۔
گذشتہ روز بھارت اور آسٹریلیا کے پہلے ڈے نائٹ ٹیسٹ میچ کے دوسرے دن کینگروز ٹیم اپنی پہلی اننگز میں محض 191 رنز بنا کر آل آوٹ ہوگئی تھی، جس کی وجہ سے بھارت کو 53 رنز کی سبقت حاصل ہوئی تھی، دوسرے دن کے کھیل کے اختتام تک بھارت نے دوسری اننگز میں ایک وکٹ کے نقصان پر 9 رنز بنائے تھے۔
بھارت کی جانب سے ایشون نے بہترین بولنگ کرتے ہوئے 4 وکٹیں حاصل کیں ، امیش یادو نے 3 اور جسپریت بمراہ نے 2 وکٹیں حاصل کیں۔
آسٹریلیا ٹیم کے لیے کپتان ٹم پین نے ناقابل شکست 73 رنز بنائے، پین کے علاوہ لگھوشامبے نے 47 رنز بناکر نمایاں رہے۔
اس سے قبل بھارت ایڈیلیڈ ٹیسٹ کی پہلی اننگز میں 244 رنز بناکر آؤٹ ہوئی تھی، بھارت کی جانب سے کوہلی نے سب سے زیادہ 74 رنز بنائے تھے، آسٹریلیا کی جانب سے مچل اسٹارک نے 4 ، پیٹ کمنس نے 3 ، جوش ہیزل ووڈ اور نیتھن لیون نے 1-1 وکٹیں حاصل کیں تھیں۔
