کراچی : پاک بحریہ میں پاکستان کا 52واں یومِ دفاع نہایت ہی احترام اور روایتی ملی جوش و جذبے سے منا یاگیا، اس موقع پر شہداء کی یاد گاروں پر فاتحہ خوانی کی گئی اور پھولوں کی چادریں چڑھائی گئیں۔
یہ دن ہمیں قومی تاریخ کے اس سنہرے باب کی یاد دلاتا ہے جب مسلح افواج کے فقیدالمثال حوصلے اور قوم کے ناقابل تسخیر جذبے نے1965کی جنگ کے دوران اپنے سے کئی گناہ بڑے اور مکار دشمن کے ناپاک عزائم کو خاک میں ملایا۔
خطے میں پیدا ہونے والی تبدیلیوں اور چیلنجز سے باخبر رہنے کی ضرورت ہے، ایڈمرل محمد ذکاءاللہ
یومِ دفاع کے موقع پر پاک بحریہ کے سربراہ ایڈمرل محمد ذکاءاللہ نے اپنے پیغام میں شہداء اورغازیوں کو خراجِ تحسین پیش کیا، جنہوں نے ارضِ پاک کی سرحدوں کے دفاع کے لئے بیش بہا قربانیاں دیں جبکہ پوری قوم اپنے برّی، بحری اور فضائی جانثاروں کے ساتھ متحد کھڑی تھی۔
نیول چیف نے کہا کہ پُر امن بقائے باہمی کی دیرینہ خواہش کے ساتھ ساتھ ہمیں خطے میں پیدا ہونے والی تبدیلیوں اور چیلنجز سے باخبر رہنے کی ضرورت ہے چونکہ ہمارے مشرقی پڑوس میں ایک حاکمانہ اور جابرانہ سوچ مستحکم ہو رہی ہے چنانچہ، ہم اپنی خود مختاری اور قومی سلامتی کو لاحق خطرات کو نظر انداز نہیں کرسکتے۔
پاک بحریہ کے سربراہ نے مزید کہا کہ پاکستان ہر محاذ پر ثابت قدمی اور پُرعزم انداز سے ترقی کر رہا ہے تاہم ترقی کا سفر کبھی بھی چیلنجز سے مبراء نہیں ہوتا۔
میری ٹائم کے شعبے میں بحری قزاقی، بحری دہشت گردی اور منظم جرائم خطے کے امن و استحکام کے لئے سکیورٹی چیلنجز کی شکل اختیار کئے ہوئے ہیں۔
ایڈمرل محمد ذکاءاللہ نے کہا کہ پاک بحریہ مختلف اقدامات کے ذریعے میری ٹائم اور ساحلی سیکورٹی کو مضبوط بنا رہی ہے جن میں خصوصی ٹاسک فورس88اورکوسٹل سیکورٹی اور ہاربرڈیفنس فورسز کا قیام قابلِ ذکر ہے۔
اس کے علاوہ پاک بحریہ پاک آرمی، پاک فضائیہ اور قانون نافذ کرنے والے اداروں کے ساتھ مل کر ”آپریشن ردّالفساد “ میں اپنا کردار ادا کر رہی ہے۔
دن کا آغازمساجد میں خصوصی دعاﺅں کے ساتھ ہوا
دن کا آغاز پاک بحریہ کی مساجد میں ملکی سلامتی و استحکام کی خصوصی دعاﺅں کے ساتھ ہوا، ارضِ پاک کے شہداء کے ابدی سکون کے لئے قرآن خوانی کی گئی، شہداء کی یاد گاروں پر فاتحہ خوانی کی گئی اور پھولوں کی چادریں چڑھائی گئیں۔
ڈپٹی چیف آف نیول اسٹاف ریئر ایڈمرل فرخ احمد نے نیول ہیڈ کوارٹرز میں واقع شہداء کی یادگار پر پھولوں کی چادر چڑھائی اور فاتحہ پڑھی۔
پاک بحریہ کی تمام یونٹس اور اسٹبلشمنٹس میں پرچم کشائی کی تقریبات کا انعقاد کیا گیا جن میں یونٹس اوراسٹبلشمنٹس کے کمانڈنگ آفیسرز نے سی پی اوز/سیلرز اور نیوی سویلینز سے خطاب کیا اور آج کے دن کی اہمیت پر روشنی ڈالی۔
پاک بحریہ کے جہازوں کو نیوی کے روایتی انداز میں سجایا گیا تھا اور ان پر چراغاں کیا گیا، مزید برآں پاک بحریہ کی مختلف یونٹس اور اسٹبلشمنٹس میں کھیلوں کی سرگرمیوں، تقاریر،ذہنی آزمائش اور ملی نغموں کے مقابلوں کا انعقاد بھی کیا گیا۔
کراچی کے ساحل پر خصوصی تقریب کا انعقاد
پاک بحریہ میں منعقد ہونے والی مختلف تقریبات کے علاوہ کلفٹن کراچی کے ساحل پر خصوصی تقریب منعقد کی گئی جس میں پاک نیوی ایوی ایشن اور اسپیشل فورسز نے پیشہ ورانہ مہارتوں کا بھرپورمظاہر ہ کیا۔ وزیرِاعلیٰ سندھ مراد علی شاہ نے تقریب میں بطور مہمانِ خصوصی شرکت کی۔
پاک بحریہ کے کمانڈوز نےاپنی فنی مہارت کا مظاہرہ کیا
تقریب کے دوران پاک بحریہ کے کمانڈوز نے مغویوں کو بازیاب کرانے کا بھی مظاہرہ کیا۔ پاک نیوی کے اسپیشل سروس گروپ نے پاک بحریہ کے سی کنگ ہیلی کاپٹرز سے رسوں کی مدد سے اترنے کی مہارت کو استعمال کرتے ہوئے اپنے فرضی ہدف تک رسائی حاصل کی۔
پاک بحریہ کے کمانڈوز کے مظاہرے کے بعد پاک بحریہ کے ہیلی کاپٹرز نے فضائی کرتب اور سرچ اینڈ ریسکیو آپریشنز کا شاندار مظاہرہ کیا۔
پاک بحریہ کے فکسڈ ونگ ایئر کرافٹ اور روٹری ونگ ہیلی کاپٹرز کا فلائی پاسٹ بھی تقریب کا حصہ تھا۔ آخر میں تینوں مسلح افواج کے اسپیشل سروسز ونگز نے تقریب گاہ میں موجود مجمع کے عین سامنے فری فال جمپ کا مظاہرہ بھی کیا۔
