کراچی : پولیس کو تگنی کا ناچ نچانے والے ملزم عدنان پاشا کو جیل بھیج دیا گیا۔
تفصیلات کے مطابق سٹی کورٹ میں شارع فیصل پر ہوائی فائرنگ کرنے اور دھمکیاں دینے کے معاملہ پر سماعت ہوئی، سماعت میں فائرنگ اور ہلڑ بازی کرنیوالے عدنان پاشا کو عدالت میں پیش کیا گیا۔
پولیس کی جانب سے ملزم عدنان پاشا کے ریمانڈ کی استدعا کی گئی، جس کے بعد عدالت نے ملزم عدنان پاشا کو عدالتی تحویل پر جیل بھیجنے کا حکم دیا۔
تفتیشی افسر نے عدالت کو بتایا ملزم اس سے قبل ایک اور مقدمہ میں ضمانت لے چکا ہے، جو تھانہ بہادر آباد میں درج ہے، ملزم کو ذیشان کی مدعیت میں درج مقدمے میں گرفتار کیا، ملزم کے مزید دو ساتھیوں کو گرفتار کرنا ہے، ملزم کا گروہ ہے، جو ویڈیوز بنا کر سوشل میڈیا پر ڈالتا ہے۔
دوسری جانب ملزم عدنان پاشا کا کہنا تھا میرے خلاف مقدمہ جھوٹا ہے۔
یاد رہے کہ ایک مقدمے میں ضمانت کے بعد دوبارہ ویڈیو آنے پر ملزم کو گرفتار کیا گیا تھا، عدالت نے ملزم کی 50ہزارروپے کے عوض ضمانت منظور کی تھی۔
گذشتہ روز کراچی میں شارع فیصل پر کھلے عام فائرنگ کرنے والے نوجوان عدنان پاشا کو پولیس نے گلستان جوہر کے علاقے سے گرفتار کیا تھا، ایس ایس پی ایسٹ کا کہنا تھا کہ ملزم کے خلاف دھمکیوں کی دفعات کے تحت مقدمہ درج ہوا تھا، عدنان پاشا کے خلاف شارع فیصل تھانے میں مقدمہ درج ہے۔
ایس ایس پی سمیع اللہ سومرو نے کہا کہ ملزم کےخلاف ذیشان سعید نے مقدمہ درج کرایا تھا، ملزم وڈیوزمیں ذیشان سعید کو دھمکیاں دے رہا تھا۔
کراچی: شارع فیصل پرفائرنگ کرتے ہوئےشہری کا پولیس کوچیلنج
خیال رہے کہ گذشتہ دنوں ملزم نے قانون نافذ کرنے والے اداروں کو چیلنچ کرتے ہوئے شہر میں کھلے عام اسلحہ کی نمائش اور ہوائی فائرنگ کی تھی، جس کے بعد ویڈیو سماجی رابطے کی ویب سائٹ فیس بک پر اپ لوڈ کی تھی۔
جس کے بعد ایک ویڈیو میں عدنان پاشا پولیس کو چیلنج کرنے کے بیان سے مکرگیا تھا اور کہا تھا کہ ویڈیو ذیشان عرف شانی کیلئے بنائی، نوجوان نے شانی پر باپ کے قتل میں ملوث ہونے کا الزام بھی لگایا۔
