کراچی : نامناسب دیکھ بھال اور مرمت نہ کرانے سے وفاقی حکومت کے محکمہ پلانٹ پروٹیکشن کے 18طیارے ناکارہ ہوگئے جنہیں گراؤنڈ کردیا گیا ہے۔
تفصیلات کے مطابق محکمہ پلانٹ پروٹیکشن کےب کروڑوں روپے مالیت کے طیارے کھڑے کھڑے خراب ہونے لگے۔
اس حوالے سے ذرائع کا کہنا ہے کہ وفاقی حکومت کے محکمہ پلانٹ پروٹیکشن کے 18 طیارے گراؤنڈ کیے گئے ہیں، مذکورہ طیاروں کا فلیٹ سال 2021 سے گراؤنڈ ہے، وفاقی محکمہ کے 10 طیارے کراچی اور 8 لاہور میں ہیں۔
ذرائع محکمہ پلانٹ پروٹیکشن کا کہنا ہے کہ مناسب دیکھ بھال اور وقت پر مینٹینس نہ ہونے سے طیارے خراب ہوئے، محکمہ پلانٹ پروٹیکشن کا فلیٹ بیور، سیسنا اور فلیچر طیاروں پر مشتمل ہے۔
فلیچر اور سیسنا طیاروں کا فلیٹ 2004 اور بیور طیاروں کا فلیٹ 2021 سے گراؤنڈ ہوا۔ طیاروں کے گرائونڈ ہونے سے پلانٹ پروٹیکشن کا ایریل اسپرے ونگ مکمل غیر فعال ہوگیا۔
یاد رہے کہ پاکستان میں ٹڈی دل کے حملے کے موقع پر ان جہازوں کے ذریعے متعلقہ علاقوں میں ایریل اسپرے کیا جاتا تھا۔ سال2021میں محکمہ پلانٹ پروٹیکشن کا ایک طیارہ رحیم یار خان میں گر کا تباہ ہوا تھا، جس کے بعد سے تمام طیارے گراؤنڈ ہیں۔
