واشنگٹن: افغانستان میں امریکی فورسز کے ساتھ کام کرنے والے افغانوں پر مشتمل پہلی فلائٹ امریکا پہنچ گئی۔
تفصیلات کے مطابق افغانستان میں امریکی فورسز کے ساتھ کام کرنے والے افغان شہریوں کی امریکا منتقلی کا سلسلہ جاری ہے، امریکی حکومت کا کہنا ہے کہ افغانستان میں امریکی فوجیوں کے ساتھ کام کرنے والے افغان ترجمانوں اور دیگر کے انخلا کی پہلی پرواز واشنگٹن کے ڈولس انٹرنیشنل ایئرپورٹ پہنچ گئی۔
امریکی میڈیا کے مطابق ایئرلائن نے، جس میں 221 افغان سوار تھے، بشمول 57 بچے اور 15 نوزائیدہ، جمعے کو علی الصبح ایئرپورٹ پر لینڈ کیا۔
وائٹ ہاؤس نے تصدیق کی ہے کہ امریکا پہنچنے والے افغان پہلے مرحلے میں شامل ان ڈھائی ہزار افغانوں میں سے ہیں، جنھیں امریکا منتقل کیا جانا تھا، ان میں 700 اصل درخواست گزار ہیں جب کہ باقی ان کے خاندانوں کے افراد ہیں۔
وائٹ ہاؤس کے مطابق اس گروپ میں شامل تمام افراد کو خصوصی امیگرنٹ ویزے کے لیے اجازت دی گئی تھی، اور ان سب کے بیک گراؤنڈ کی بھی جانچ پڑتال کی گئی تھی۔
امریکی رہنمائی میں ناٹو فورسز کے ساتھ کام کرنے والے اکثر افغانوں کو طالبان کی جانب سے انتقامی حملوں کا خوف لاحق تھا، انھیں بھی امریکی فوجیوں کے ساتھ اگست کے اختتام تک افغان سرزمین چھوڑنے کے لیے شیڈول کیا گیا تھا۔
امریکی صدر جو بائیڈن نے جمعے کو امریکا پہنچنے والی فلائٹ کے حوالے سے اپنے بیان میں کہا کہ یہ ایک اہم سنگ میل ہے، ہم ہزاروں افغان شہریوں سے اپنے وعدے کو پورا کررہے ہیں، جنھوں نے افغانستان میں گزشتہ 20 برسوں میں امریکی فوجیوں اور سفارت کاروں کے ساتھ کندھے سے کندھا ملا کر خدمات انجام دیں۔
بائیڈن نے کہا یہ پہلے افغان اس لیے براہ راست امریکا پہنچے ہیں، کیوں کہ امریکی انٹیلیجنس کمیونٹی، ہوم لینڈ سیکیورٹی اور اسٹیٹ ڈیپارٹمنٹ نے ان کے بیک گراؤنڈ کو اچھی طرح سے چیک کر لیا تھا اور ان کی مکمل سیکیورٹی اسکریننگ کی گئی تھی۔
امریکی صدر کا کہنا تھا کہ یہ افغان شہری اب ریاست ورجینیا کے شہر فورٹ لی میں اپنے ویزے درخواستوں اور درکار طبی جانچ کے لیے حتمی مراحل مکمل کریں گے، اس کے بعد یہ ریاست ہائے متحدہ امریکا میں اپنی نئی زندگیاں شروع کر سکیں گے۔
خیال رہے کہ امریکا ان افغان خاندانوں کو ملک بھر میں آباد کرنے کے لیے یونائیٹڈ نیشن انٹرنیشنل آرگنائزیشن فار مائیگریشن کے ساتھ شراکت کر رہا ہے۔
ادھر افغانستان کے دارالحکومت کابل سے الجزیرہ کی رپورٹ کے مطابق امریکی سفارت خانہ افغان شہریوں کے انخلا کے سلسلے میں نہایت راز داری سے کام لے رہا ہے۔
