کابل : افغانستان میں دہشت گردی کے ایک واقعے میں ڈپٹی گورنر سمیت تین افراد ہلاک ہوگئے، بم دھماکہ دارالحکومت کابل کے نو ویں پولیس ضلع میں ہوا۔
افغانستان کے دارالحکومت کابل میں آج منگل کو بم دھماکہ اور فائرنگ کے واقعات میں ایک علاقائی ڈپٹی گورنر سمیت کم از کم تین افراد کی ہلاکت کی اطلاع ہے۔
افغانستان کی وزارت داخلہ کے مطابق کابل صوبے کے نائب گورنر محبوب اللہ محبی اپنی گاڑی میں نصب کئے گئے بم کے دھماکے میں ٹارگٹ کلنگ کا نشانہ بنے۔
وزارت داخلہ کے ترجمان طارق آرائیں نے بتایا کہ حملے میں ڈپٹی گورنر محبوب اللہ محبی کے سیکریٹری کی بھی ہلاکت ہوئی ہے جبکہ ان کے دو محافظ زخمی ہوگئے، یہ افسوسناک واقعہ کابل کے نواحی علاقے میکروریان میں پیش آیا۔
اس حوالے سے کابل پولیس کے سربراہ کے ترجمان فردوس فرمارز نے میڈیا کو بتایا کہ کابل میں ہی ایک اور واقعے میں بندوق برداروں نے ایک پولیس افسر کو گولی مار کرہلاک اور دوسرے پولیس اہلکار کو زخمی کردیا۔ یہ واقعہ شہر کی پولیس ڈسٹرکٹ نمبر بارہ میں پیش آیا۔ انہوں نے بتایا کہ اس واقعے کی تفتیش کی جارہی ہے۔
واضح رہے کہ حالیہ ہفتوں میں کابل کی صبح کا آغاز بالعموم ٹارگٹ کلنگ، ہلاکتوں، قتل اور بم دھماکوں سے ہورہا ہے تاہم ابھی تک کسی جنگجو گروپ کی جانب سے ان حملوں کی ذمہ داری قبول نہیں کی گئی ہے۔
اس کے عالاوہ گزشتہ ہفتے افغان حکومت کے ایک وکیل کو مشرقی کابل میں اس وقت گولی مار کر ہلاک کردیا گیا تھا جب وہ اپنے دفتر جارہے تھے۔
