Tag: AGAINST

الیکشن کمیشن کے جانبدار رویے کے خلاف پاکستان تحریک انصاف کی اپیل پر ملک بھر میں احتجاج ہوا اس موقع پر سیکیورٹی کے سخت انتظامات کیے گئے تھے۔

اے آر وائی نیوز کے نمائندگان کے مطابق پی ٹی آئی قیادت کی اپیل پر کارکنوں نے وفاقی دارالحکومت اسلام آباد سمیت کراچی، لاہور، پشاور، کوئٹہ، حیدرآباد، میانوالی، مانسہرہ، رینالہ خورد، بکھر، رحیم یار خان، جہلم، منڈی بہاؤالدین، بہاولنگر، شیخوپورہ، کندھکوٹ، عمرکوٹ، اوکاڑہ، پاکپتن، لودھراں، لکی مروت، ساہیوال، سیالکوٹ، چینیوٹ، گوجرانوالہ، قصور، وہاڑی، ملتان، نارووال، فیصل آباد، سرگودھا، جھنگ ودیگر شہروں میں الیکشن کمیشن کے دفاتر کے باہر احتجاجی مظاہرے کیے گئے۔

اس موقع پر حکام کی جانب سے سخت حفاظتی انتظامات کیے گئے تھے، پولیس کے ساتھ رینجرز کی بھاری نفری بھی تعینات کی گئی تھی، اسلام آباد سمیت دیگر شہروں میں الیکشن کمیشن کے دفاتر کی طرف جانے والے راستے خار دار تاریں اور کنٹینر لگا کر بند کردیے گئے کئی علاقوں میں مظاہرین کو الیکشن کمیشن جانے سے روکا بھی گیا۔

احتجاج میں پی ٹی آئی کارکنوں کے ساتھ قیادت نے بھی شرکت کی، مظاہرین نے الیکشن کمیشن اور امپورٹڈ حکومت نامنظور کے نعرے لگائے اور مطالبہ کیا کہ چیف الیکشن کمیشن کو ہٹایا جائے، منحرف اراکین کو ڈی سیٹ کیا جائے پی ٹی آئی کے ساتھ متعصبانہ رویہ ختم کیا جائے اور ملک میں فوری طور پر عام انتخابات کرائے جائیں۔

واضح رہے کہ پی ٹی آئی چیئرمین وسابق وزیراعظم عمران خان پہلے ہی چیف الیکشن کمشنر پر عدم اعتماد کا اظہار کرچکے ہیں،

عمران خان نے پشاور میں کارکنوں سے خطاب کرتے ہوئے کہا کہ چیف الیکشن کمشنر مسلم لیگ ن کا پلانٹڈ ایجنٹ ہے ہمیں اس پر اعتماد نہیں اب انکے اس عہدے پر رہنے کا کوئی اخلاقی جواز نہیں۔

مزید پڑھیں: چیف الیکشن کمشنر مسلم لیگ ن کا پلانٹڈ ایجنٹ، ہمیں اس پر اعتماد نہیں، عمران خان

سابق وزیراعظم نے کارکنوں کو ہدایت کی کہ وہ چیف الیکشن کمشنر کے خلاف سوشل میڈیا پر دستخطی مہم چلائیں گے ساتھ ہی انہوں نے کہا کہ کارکنان لوگوں کو سمجھائیں کہ یہ پی ٹی آئی نہیں بلکہ پاکستان کی جنگ ہے۔