لندن : تحریکِ انصاف نے لندن میں الطاف حسین کے خلاف مظاہروں کا اعلان کردیا۔
تحریک انصاف کے رہنما فیصل واڈا آج لندن ائیرپورٹ پر ہنگامی پریس کانفرنس کریں گے، جس میں وہ پچیس جولائی کو ایم کیوایم سیکریٹریٹ لندن کے سامنے اور چھبیس جولائی کو ٹین ڈاؤننگ اسٹریٹ پر الطاف حسین کے خلاف مظاہروں کا اعلان کرینگے۔
پی ٹی آئی رہنما کا کہنا تھا کہ برطانوی حکومت کو یہ احساس دلانے کیلئے ہر طریقہ اختیار کرنا ہوگا کہ ایک برطانوی شہری دہشتگردی، منی لانڈرنگ اور پاکستانی مسلح افواج کیخلاف نفرت انگیز تقاریر میں ملوث ہے۔
کراچی :ایم کیو ایم نے چوہدری نثار کے بیان کی مذمت کرتے ہوئے احتجاجی مظاہرے کا اعلان کردیا، ایم کیو ایم کے رہنما فاروق ستار کا کہنا ہے ایم کیوایم فوج کے ساتھ تھی اور رہے گی۔
رابطہ کمیٹی نےالطاف حسین کیخلاف مقدمات بنانےکی مذمت کرتے ہوئے کہا ہے ایم کیو ایم کے کارکنوں اور ہمدردوں کے ساتھ زیادتیوں کے حقائق بیان کئے تو اس پر غور کرنے کے بجائے الطاف حسین کے خلاف مقدمات قائم کئے جارہے ہیں۔
فاروق ستار نے کہا ہے کہ الطاف حسین کی تقریر پر چراغ پا ہونے والے وفاقی وزیر داخلہ اس وقت کہاں تھے جب آصف زرداری فوج کو للکار رہے تھے۔
رابطہ کمیٹی کا مزید کہنا ہے کہ پیپلز پارٹی کا ہرمشکل وقت میں ساتھ دیا لیکن آج صوبائی حکومت جس رویے کا مظاہرہ کر رہی ہے وہ انتہائی قابل مذمت ہے۔
دوسری جانب نائن زیرو پر پریس کانفرنس فاروق ستار کا کہنا تھا کہ چوہدری نثار کو الطاف فوبیا ہوگیا ہے، ایم کیو ایم فوج کے ساتھ کھڑی ہے ،ایم کیو ایم کے رہنماؤں کا کہنا ہے مقدمات سے قیادت کو ڈرایا نہیں جاسکتا اور نہ ہی مظلوموں کےحق کی جدوجہد سے روکا جاسکتا ہے۔