اسلام آباد : مسلم لیگ ن کے رہنما احسن اقبال کے بھائی مصطفیٰ کمال نے راولپنڈی میٹرواسکینڈل کیس میں گرفتاری سے بچنے کے لئے اسلام آباد ہائی کورٹ سے رجوع کرلیا۔
تفصیلات کے مطابق راولپنڈی میٹرو منصوبے میں مبینہ غیر قانونی ٹھیکہ لینے کے کیس میں مسلم لیگ ن کے رہنما احسن اقبال کے بھائی مصطفیٰ کمال نے گرفتاری سے بچنے کیلئے ہائیکورٹ میں ضمانت قبل از گرفتاری کی درخواست دائر کر دی۔
درخواست میں مصطفیٰ کمال نے کہا کہ اپنے ذرائع سے پتہ کیا چئیرمین نیب نے میرے وارنٹس جاری کئے ہیں، میڈیا سے پتہ چلا اس کیس میں شہباز شریف کو طلب کیا گیا ہے، چالیس سال سے ہارٹی کلچر کے شعبے سے وابستہ ہوں۔
مصطفیٰ کمال کا کہنا تھا کہ میٹرو منصوبے پر آر ڈی اے کیساتھ کام کرنے والی کمپنی نے رابطہ کیا تھا، نیب نے جو بھی دستاویزات طلب کیں فراہم کرتا رہا ،گزشتہ سال نیب نے ہائیکورٹ میں کہا تھا گرفتاری کی ضرورت نہیں،اب اپریل میں میرا نام بھی ای سی ایل میں شامل کر دیا گیا۔
احسن اقبال کے بھائی نے درخواست میں استدعا کی کہ عدالت ضمانت قبل از گرفتاری منظور کرے۔
خیال رہے قومی احتساب بیورو (نیب) نے راولپنڈی میٹرواسکینڈل میں اپوزیشن لیڈر شہباز شریف کو طلب کیا ہے اور احسن اقبال کے بھائی مصطفیٰ کمال کی کمپنی کو دیئے ٹھیکوں کی تفصیلات لانے کی ہدایت کی ہے۔
