کراچی : پی آئی اے کے صدر و چیف ایگزیکٹو آفیسر ایئر مارشل ارشد ملک نے کہا ہے کہ تقریباً ڈیڑھ برس سے ناقابل استعمال قرار دے کر گراؤنڈ کئے گئے ایک بوئنگ777طیارے کو دوبارہ مرمت کرکے آپریشن میں شامل کردیا گیا ہے۔
یہ ہمارے لئے عید کا تحفہ ثابت ہو رہا ہے۔ اپنے ایک بیان میں انہوں نے کہا کہ اللہ کریم کی مہربانی سے ہم اپنے ایک اور گراؤنڈ کئے گئے طیارے ائر بس اے320 کی مکمل بحالی میں کامیاب ہو جائیں گے اور انشاء اللہ جون کے مہینے میں یہ طیارہ بھی آپریشن میں شامل ہو جائے گا۔
ہمارا اصل مقصد مسافروں کی سہولتوں کو بہتر بنانا اور ادارے کی آمدنی میں اضافہ کرنا ہے۔ ہماری آمدن میں اضافے کی بنیادی وجہ پروازوں کے شیڈول میں90 فیصد تک کی بہتری اور سیٹ فیکٹر85 فیصد سے زائد ہونا ہے۔
طیاروں میں ”لیگ اسپیسی یا بلک ہیڈ“ والی کشادہ نشستوں کو سفارشی طور پر مختص کرنے کی بجائے عام پبلک کے لئے فروخت کے لئے پیش کیا گیا ہے۔
اس اقدام سے ایک ماہ سے بھی کم مدت میں دس ملین روپے کی اضافی آمدن حاصل ہوئی ہے جبکہ اس مد میں سالانہ آمدن میں 220-250 ملین روپوں کا اضافہ متوقع ہے۔
ان کا مزید کہنا ہے کہ کارگو کے شعبے پر بھی بھر پور توجہ دی جارہی ہے۔ بیرون ملک کارگو کی ترسیل کا لوڈ فیکٹر فیصد تک پہنچ گیا ہے۔ نئے جدید ٹیکنالوجی کے حامل اور کم ایندھن خرچ کرنے والے با کفایت طیارے بھی حاصل کرنے کا عمل شروع کر رکھا ہے۔
نئے مقامات کے لئے پروازیں بھی جلد شروع کی جائیں گی۔ پی آئی اے کی بہتری کے لئے درست سمت میں گامزن ہیں اور اس سمت میں یہ سفر جاری رہے گا۔ ایئر لائن کی ترقی کی واضح طور پر نظر آنے والی کامیابیوں پر پوری قوم کو مبارکباد دیتا ہوں۔
