اسلام آباد : وزیر خارجہ مخدوم شاہ محمود قریشی نے پاک فضائیہ کے سربراہ ایئر چیف مارشل مجاہد انور خان سے ملاقات میں کہا دشمن کسی بھول میں مت رہے ، پوری قوم سیسہ پلائی ہوئی دیوار کی طرح پاک فوج کے شانہ بشانہ کھڑی ہے۔
تفصیلات کے مطابق پاک فضائیہ کے سربراہ ایئر چیف مارشل مجاہد انور خان نے وزارت خارجہ میں وزیرخارجہ مخدوم شاہ محمود قریشی سے ملاقات کی۔
اس موقع پرپاک فضائیہ کی آپریشنل تیاریوں اور خطے کی صورتحال پر تبادلہ خیال کیا گیا اور وزیرخارجہ نے پاک فضائیہ کی پیشہ ورانہ مہارت اور عزم و حوصلے کی تعریف کی۔
مخدوم شاہ محمود قریشی نے کہا کہ دشمن کسی بھول میں مت رہے، پوری قوم سیسہ پلائی ہوئی دیوار کی طرح پاک فوج کے شانہ بشانہ کھڑی ہے
پاک فضائیہ کے سربراہ ائیر چیف مارشل مجاہد انور خان نے کسی بھی ممکنہ خطرے سے نمٹنے کے لیے اور پاکستان کی فضائی حدود کے دفاع کیلئے پاک فضائیہ کے عزم کا اعادہ کیا۔
مزید پڑھیں : عمران خان نے اقوام متحدہ میں بھارت کے ہوش اڑا دئیے، شاہ محمود قریشی
یاد رہے کہ وزیر خارجہ شاہ محمود قریشی نے کہا تھا کہ وزیراعظم نے بھارت کو آئینہ دکھایا اور حقائق سامنے رکھے ہیں، عمران خان نے اقوام متحدہ میں بھارت کے ہوش اڑا دئیے، اگر بھارت وزیراعظم کے خطاب پر جواب دے گا تو ہم بھی جواب الجواب دیں گے۔
