Tag: air travel

  • دوران سفر یہ غلطی بُھول کر بھی نہ کریں، ورنہ !!

    دوران سفر یہ غلطی بُھول کر بھی نہ کریں، ورنہ !!

    اکثر دیکھنے میں آتا ہے کہ لوگ دوران سفر احتیاط نہیں کرتے جہاز میں ہوں یا ٹرین میں اجنبی مسافروں سے علیک سلیک بڑھا کر  مختلف موضوعات پر گفگتو کرنے لگتے ہیں۔

    ایسا کرنا بظاہر کوئی بری بات تو نہیں لیکن یہ کسی کیلیے خطرناک یا نقصان کا باعث بھی بن سکتی ہے، کیونکہ جرائم پیشہ عناصر اس طرح باتوں میں لگا کر آپ کو اپنے سامان اور جمع پونجی سے محروم کردیتے ہیں۔

    اس حوالے سے اے آر وائی نیوز کے پروگرام باخبر سویرا میں نمائندہ صلاح الدین نے ناظرین کو دوران سفر احتیاط خصوصاً فضائی سفر سے متعلق احتیاطی تدابیر سے آگاہ کیا۔

    گزشتہ دنوں لاہور کے ایک خاندان کے ساتھ پیش آنے والے دھوکہ دہی کے واقعے کے پیش نظر انہوں نے بتایا کہ ہمیشہ فضائی سفر پر جانے سے پہلے اپنے سامان کو پلاسٹک سے اچھی طرح لپیٹ دیں۔

     

    View this post on Instagram

     

    A post shared by ARY News (@arynewstv)

    ایئر پورٹ پر جاکر پہلے ہمارا سامان اسکین ہوتا ہے اس کے بعد بورڈنگ کا عمل شروع ہوتا ہے، اس موقع پر کوشش کریں کہ اپنے سامان کی خود حفاظت کریں، نہ کہ اسے عملے کے حوالے کرکے خود مطمئن ہوجائیں۔

    واضح رہے کہ سعودی عرب میں منشیات کے جھوٹے الزام میں گرفتار ہونے والے ایک ہی خاندان کے 5 بے گناہ افراد کو بہت مشکل سے رہائی ملی۔

    لاہور ایئرپورٹ پر بیگ کا ٹیگ تبدیل کرکے بے گناہ خاندان کو پھنسانے والے انٹرنیشنل ڈرگ گینگ کے 9ملزمان کو گرفتار کرلیا گیا۔

    رپورٹ کے مطابق لاہور کے علاقے مرغزار کالونی کی رہائشی فرحانہ اکرم اپنے خاندان کے دیگر 4 افراد کے ہمراہ 23 دسمبر کو سعودی عرب کیلئے روانہ ہوئی تھیں۔

    ڈرگ مافیا کے کارندوں نے عملے کی ملی بھگت سے فرحانہ اکرم کے سفری بیگ کا ٹیگ تبدیل کیا۔ فرحانہ اکرم اور ان کے فیملی ممبرز کو 30 دسمبر کو سعودی عرب میں حراست میں لے لیا گیا۔

  • سعودی عرب: فضائی کمپنیوں کی تعداد میں ریکارڈ اضافہ

    سعودی عرب: فضائی کمپنیوں کی تعداد میں ریکارڈ اضافہ

    ریاض: سعودی عرب میں فضائی سفر کرنے والوں کی تعداد ایک سال میں 82 فیصد بڑھ گئی، مملکت میں 88 ملین افراد نے سفر کیا۔

    اردو نیوز کے مطابق سعودی محکمہ شماریات کا کہنا ہے کہ 2022 کے دوران بین الاقوامی اور داخلی پروازوں کے ذریعے 88 ملین سے زائد افراد نے سفر کیا۔

    محکمہ شماریات کا کہنا ہے کہ سال 2021 کے مقابلے میں سفر کرنے والوں کی تعداد میں 82 فیصد اضافہ ریکارڈ کیا گیا، 2021 کے مقابلے میں 2022 کے دوران فضائی کمپنیوں کی تعداد میں 20 فیصد اضافہ ہوا۔

    کمپنیوں کی تعداد 1443 تک پہنچ گئی، ان میں مسافر ایئر لائن اور ایئر کارگو دونوں شامل ہیں۔

    فضائی کمپنیوں میں ملازمین کی تعداد 34 ہزار ہوگئی اور 38 فیصد اضافہ ہوا، ان میں خواتین کی تعداد 4 ہزار ہے۔

    پروازوں کی تعداد میں 41 فیصد اضافہ ہوا، بین الاقوامی ایئرپورٹس پر پروازوں کی یومیہ اوسط تعداد 13 سو 13 اور داخلی ایئر پورٹس سے پروازوں کی یومیہ اوسط تعداد 5.94 ریکارڈ کی گئی۔

    سنہ 2022 کے دوران مسافروں کے حوالے سے سب سے زیادہ مصروف ایئرپورٹ جدہ کا کنگ عبد العزیز انٹرنیشنل رہا، یہاں سے 32 ملین افراد نے سفر کیا۔

    پرائیوٹ پروازوں کی تعداد 64 ہزار ریکارڈ کی گئی، 2021 کے مقابلے میں 41 فیصد زیادہ رہیں۔

  • ہوائی جہاز میں سفر کے دوران ہمارے جسم کو کیا مسائل ہوسکتے ہیں؟

    ہوائی جہاز میں سفر کے دوران ہمارے جسم کو کیا مسائل ہوسکتے ہیں؟

    آج دنیا بھر میں شہری ہوا بازی یا سول ایوی ایشن کا دن منایا جارہا ہے، فضائی سفر ہماری زندگیوں کا حصہ بن چکا ہے لیکن بہت کم لوگ واقف ہیں کہ فضائی سفر کے دوران ہمارے جسم میں کیا تبدیلیاں آتی ہیں۔

    زمینی سفر کے مقابلے میں فضائی سفر کے دوران پیش آنے والی جسمانی تبدیلیاں کچھ مختلف ہوتی ہیں۔ آئیں ان کیفیات اور ان کے پیچھے چھپی وجوہات کے بارے میں جاننے کی کوشش کرتے ہیں۔

    جسم میں پانی کی کمی

    فضائی سفر کے دوران ہمارا جسم ڈی ہائیڈریشن کا شکار ہوجاتا ہے۔ ماہرین کے مطابق 3 گھنٹے کی فلائٹ کے دوران ہمارے جسم سے ڈیڑھ لیٹر پانی خارج ہوجاتا ہے۔

    جسم کی سوجن

    فضائی سفر کے دوران ہمارا جسم سوج جاتا ہے، ہوا کے دباؤ کی وجہ سے ہمارے جسم کی گیس میں اضافہ ہوجاتا ہے جس سے جسم سوجن اور معدے کے درد میں مبتلا ہوجاتا ہے۔

    آکسیجن کی کمی

    ہوائی جہاز کے کیبن میں ہوا کا دباؤ عام دباؤ سے 75 فیصد بڑھ جاتا ہے جس کی وجہ سے آپ کو سر درد اور آکسیجن کی کمی کا سامنا ہوسکتا ہے۔

    جراثیموں کا حملہ

    ہوائی جہاز میں کھلی فضا کا کوئی گزر نہیں ہوتا اور کئی گھنٹے تک ایک ہی آکسیجن طیارے میں گردش کرتی رہتی ہے یوں یہ جراثیموں کی افزائش کے لیے نہایت موزوں بن جاتی ہے۔

    فضائی سفر کے دوران جراثیموں کی وجہ سے آپ کے نزلہ زکام میں مبتلا ہونے کا امکان 100 فیصد بڑھ جاتا ہے۔

    حس ذائقہ اور سماعت متاثر

    ہوائی جہاز کے سفر کے دوران آپ کے ذائقہ محسوس کرنے والے خلیات یعنی ٹیسٹ بڈز سن ہوجاتے ہیں جس سے آپ کسی بھی کھانے کا ذائقہ درست طور پر محسوس نہیں کرپاتے۔

    علاوہ ازیں کئی گھنٹے طیارے اور ہوا کا شور سننے سے جزوی طور پر آپ کی سماعت بھی متاثر ہوتی ہے۔

    تابکار شعاعیں

    فضائی سفر کے دوران آپ تابکار شعاعوں کی زد میں بھی ہوتے ہیں، 7 گھنٹے کی فلائٹ میں ایکس رے جتنی تابکار شعاعیں آپ کے جسم کو چھوتی ہیں۔

    ٹانگیں سن ہوجانا

    فضائی سفر کے دوران مستقل بیٹھے رہنے سے خون کی گردش متاثر ہوتی ہے جس سے ٹانگیں سن اور تکلیف کا شکار ہوجاتی ہیں۔

    اس سے نجات کا حل یہ ہے کہ موقع ملنے پر ایک جگہ سے دوسری جگہ حرکت کریں اور مائع اشیا کا زیادہ استعمال کریں۔

    فضائی سفر کے دوران جسم میں پیدا ہونے والی تمام تبدیلیاں اور تکالیف عارضی اور کچھ وقت کے لیے ہوتی ہیں لہٰذا تشویش میں مبتلا ہونے کی ضرورت نہیں۔

    سفر کے بعد آرام کرنے اور کچھ وقت گزرنے کے بعد جسم خود بخود معمول کی حالت پر آجاتا ہے۔

  • سعودی عرب : فضائی سفر کیلئے آن لائن پرمٹ کیسے ملے گاَ؟

    سعودی عرب : فضائی سفر کیلئے آن لائن پرمٹ کیسے ملے گاَ؟

    ریاض : سعودی محکمہ پاسپورٹ نے عراق جانے کے لیے آن لائن سفر پرمٹ کے اجراء کی سہولت دی ہے، ابشر کے ذریعے عراق سفر کا پرمٹ آن لائن حاصل کیا جاسکے گا۔

    سعودی ذرائع ابلاغ کے مطابق ترجمان محکمہ پاسپورٹ نے ایک بیان میں کہا ہے کہ اب تک عراق جانے کے لیے سفر پرمٹ کے اجراء کی باقاعدہ کاغذی کارروائی ضروری تھی۔

    ترجمان کے مطابق آئندہ یہ کام آن لائن ہوگا جو لوگ عراق جانا چاہتے ہوں وہ ابشر کے ذریعے سفری پرمٹ آن لائن جاری کراسکیں گے، یہ پرمٹ ان ہی لوگوں کو ملے جو مقررہ شرائط و ضوابط پوری کر رہے ہوں۔

    محکمہ پاسپورٹ نے طریقہ کار کی وضاحت کرتے ہوئے ترجمان نے کہا کہ امیدوار ابشر کے اپنے اکاؤنٹ پر جاکر خدماتی آپشن کا انتخاب کریں پھر جوازات کا انتخاب کیا جائے۔ اس کے بعد نئی درخواستین پیش کرنے والی سہولت کی نشاندہی کی جائے۔ اس کے بعد درخواست کی نوعیت متعین کی جائے۔

    ترجمان محکمہ پاسپورٹ نے بتایا کہ درخواست میں بتایا جائے کہ وہ مستثنیٰ ملکوں کا سفری اجازت نامہ حاصل کرنا چاہتے ہیں۔ اس کے بعد ذیلی عنوان ہوگا جس کے تحت عراق کے لیے سفر پرمٹ کی نشاندہی کی پھر امیدوار اپنی رہائش کے قریب واقع کیمٹی کا نتخاب کرے اس کے بعد درخواست مختصر ترین الفاط میں تحریر کرے۔

    بیان کےمطابق قومی شناختی کارڈ کی فوٹو کاپی، سفر میں جانے والے اہل خانہ کے کارڈ کی فوٹوکاپی منسلک کی جائے۔
    ویب سائٹ پر موجود اجازت نامہ کا فارم بھی منسلک کریں۔ منسلک کاغذات کے خانے میں علاقے کے عمدہ (کونسلر) سے رہائش کا مصدقہ کاغذ بھی منسلک کرنا ہوگا۔

  • نسوار کے ساتھ عرب ممالک کا سفر جرم قرار

    نسوار کے ساتھ عرب ممالک کا سفر جرم قرار

    کراچی : مشرق وسطیٰ کے عرب ممالک نے نسوار کو منشیات کی فہرست میں شامل کردیا، نسوار کے ساتھ عرب ممالک کا سفر جرم قرار دے دیا گیا۔

    تفصیلات کے مطابق نسوار کے شوقین افراد ہوشیار ہوجائیں کیونکہ عرب ممالک کے سفر کیلئے انہیں اب ایک اور پابندی کا سامنا کرنا پڑے گا۔

    ۔اس ضمن میں اینٹی نارکوٹکس فورس حکام نے خبردار کیا ہے کہ نسوار کے ساتھ فضائی سفر کرنا جرم قرار دے دیا گیا ہے کیونکہ مشرق وسطیٰ کے تمام عرب ممالک نے نسوار کو منشیات کی فہرست میں شامل کردیا ہے۔

    سوشل میڈیا پراینٹی نارکوٹکس فورس پنجاب کی جانب سے گردش کرنے والے ایک پمفلٹ میں کہا گیا ہے کہ عرب ممالک کی سرزمین پر اگر کسی مسافر کے سامان سے نسوار برآمد ہوئی تو اْسے نئے قانون کے مطابق سخت ترین سزا دی جائے گی۔

    اینٹی نارکوٹکس فورس حکام کی جانب سے ملک کے تمام ایئرپورٹس پر بینرز آویزاں کر دیے گئے ہیں﷽ جس میں پاکستانی مسافروں کو عرب ممالک نسوار نہ لے کرجانے کی ہدایت کی گئی ہے۔

    اس حوالے سے اے این ایف نے خبر دار کیا ہے کہ عرب ممالک میں نسوار کے ساتھ فضائی سفر کرنا جرم ہے، لہٰذا کسی بھی مسافر سے نسوار برآمد ہوئی تو وہاں کے قانون کے مطابق سخت سزا دی جائے گی۔

  • پاکستان سے  فضائی سفر کرنے والوں پر آج رات 12 بجے  سے بڑی پابندی عائد

    پاکستان سے فضائی سفر کرنے والوں پر آج رات 12 بجے سے بڑی پابندی عائد

    اسلام آباد : یکم اکتوبر سے فضائی سفر کے لیے ویکسی نیشن کی 2ڈوز کا سرٹیفکیٹ لازمی قرار دے دیا گیا ، آج رات 12 بجے سے پروازوں پرصرف ویکسینیٹڈ مسافر ہی سفرکرسکیں گے۔

    تفصیلات کے مطابق سول ایوی ایشن نے یکم اکتوبر سے فضائی سفر کے لیے ویکسی نیشن کی 2ڈوزکاسرٹیفکیٹ لازمی قرار دے دیا ، آج رات 12 بجے سے پروازوں پرصرف ویکسینیٹڈ مسافر ہی سفرکرسکیں گے۔

    اس حوالے سے ملک بھرکےتمام ایئرپورٹس پر احکامات جاری کردیےگئے ، جس میں بورڈنگ کارڈ کے حصول کے وقت بھی سرٹیفکیٹ پیش کرنا لازمی قرار دیا گیا ہے۔

    دوسری جانب پی آئی اے نے بھی یکم اکتوبرسےاندرون ملک فضائی سفر کے لئے ویکسی نیشن سرٹیفکیٹ لازم قرار دیا ہے ،ترجمان پی آئی اے کا کہنا ہے کہ بورڈنگ کارڈکےحصول کےوقت سرٹیفکیٹ چیک کیاجائے گا، اس سلسلے میں پی آئی اےانتظامیہ نےمتعلقہ شعبوں کوہدایات جاری کردی ہیں۔

  • کورونا وائرس : بحرین میں بازار بند اور سفری پابندیوں میں مزید اضافہ

    کورونا وائرس : بحرین میں بازار بند اور سفری پابندیوں میں مزید اضافہ

    مناما : کورونا وائرس کی بڑھتی ہوئی شدت کے پیش نظر بحرینی حکام نے ریستوران، قہوہ خانے، تجارتی مراکز اور مالز مزید 15 روز کے لیے بند کرنے کا اعلان کیا ہے۔

    بحرینی میڈیا کے مطابق کورونا وائرس کی عالمی وبا کے سدباب پر مامور قومی میڈیکل ٹیم نے فیصلہ کیا ہے کہ جمعہ گیارہ جون سے جمعہ25جون 2021 تک پابندیاں لاگو کی جائیں گی۔

    تجارتی مراکز اور مالز پندرہ دن تک بند رہیں گے۔ ریستوران اور قہوہ خانے بھی بند رکھے جائیں گے تاہم ہوم ڈلیوری سروس اور ڈرائیو تھرو کی اجازت ہوگی۔

    اس کے علاوہ اسپورٹس سینٹرز، فٹنس سینٹر، سوئمنگ پول اور تفریحی مقامات ،سینما گھر اور تمام شورومز بھی بند رہیں گے۔ کانفرنسوں اور تقریبات کے انعقاد پر بھی پابندی ہوگی۔ کھیلوں کے پروگراموں میں شائقین کی شرکت ممنوع ہوگی۔ صالون (باربر شاپ)، بیوٹی پارلرز بھی بند رہیں گے۔

    حکام کا کہنا ہے کہ گھروں میں خصوصی تقریبات کی اجازت نہیں ہوگی۔ تمام سرکاری اداروں کے ملازمین آن لائن ڈیوٹی دیتے رہیں گے جبکہ 70فیصد تک ملازمین آن لائن ڈیوٹی دیں گے۔

    تمام اسکولوں، کالجوں، اعلیٰ تعلیمی اداروں، کنڈر گارٹن میں حاضری منع ہوگی۔ آن لائن تعلیم پر اکتفا کیا جائے گا تاہم اس سے انٹرنیشنل امتحانات میں شرکت کرنے والے مستثنی ہوں گے۔

    بیان کے مطابق اس کے علاوہ بحرین آنے والے مسافروں پر پابندیوں میں توسیع کردی گئی ہے۔ کورونا وائرس سے نمٹنے پر مامور قومی میڈیکل ٹیم نے کئی اداروں کو پابندی سے استثنی دیا ہے۔

    ان میں ہائپر مارکیٹ، سپر مارکیٹ، جنرل اسٹور، کولڈ اسٹوریج، مچھلیاں، سبزیاں اور تازہ گوشت فروخت کرنے والی دکانیں ،بیکریاں ،پیٹرول پمپس اور گیس سروس سینٹر، صحت کے نجی ادارے، بینک اور منی چینجرز شامل ہیں۔

    کمپنیوں اور اداروں کے وہ دفاتر جہاں گاہکوں سے براہ راست رابطہ ضروری نہیں ہوتا- سامان کی درآمد و برآمد والے ادارے ،گاڑیوں کے ورکشاپ، گیراج اور فاضل پرزوں کی دکانیں، تعمیرات و اصلاحات کا سیکٹر، کارخانے، کمیونیکیشن کی دکانیں اور فارمیسیاں بھی پابندی سے مستثنی ہوں گی۔

    بحرین کی قومی ٹیم نے ہدایت کی ہے کہ پندرہ روزہ پابندی مکمل ہونے پر تمام ادارے تدریجی طور پر کھولے جائیں گے۔ شہریوں اور مقیم غیرملکی پابندیوں کا احترام کریں۔

  • امریکا اور یورپی یونین کا بڑا فیصلہ، فضائی سفر کرنے والوں کیلئے بڑی خبر

    امریکا اور یورپی یونین کا بڑا فیصلہ، فضائی سفر کرنے والوں کیلئے بڑی خبر

    واشنگٹن : کورونا وائرس کی عالمی وبا کے سد باب اور فضائی سفر کو محفوظ رکھنے کیلیے چین میں کورونا پاسپورٹ کے بعد اب امریکہ اور یورپی یونین نے بھی گرین پاس پرمٹ کی تیاری شروع کردی۔

    غیر ملکی خبر رساں ادارے کے مطابق امریکا اور برطانیہ سمیت متعدد ممالک کی جانب سے بین الاقوامی فضائی سفر کے لئے ویکسین گرین پاس پرمٹ کے اجراء پر غور کیا جارہا ہے۔

    اطلاعات کے مطابق یورپی یونین کی جانب سے بھی ایک ویکسین گرین پاس پر کام کیا جارہا ہے جو وہاں کے شہریوں کو رکن ممالک اور دیگر خطوں میں سفر کی سہولت فراہم کرسکے گا۔

    چین کے پروگرام میں ایک انکرپٹڈ کیو آر کوڈ ہوگا جو انتظامیہ کو مسافر کی صحت کی تفصیلات تک رسائی فراہم کرے گا۔

    وی چیٹ اور دیگر اسمارٹ فون ایپس میں کیو آر ہیلتھ کوڈز کو پہلے ہی اندرون ملک سفر میں انٹری اور مختلف عوامی مقامات میں داخلے کے لیے استعمال کیا جارہا ہے۔

    مزید پڑھیں : دنیا کا پہلا “کورونا وائرس پاسپورٹ” جاری

    یہ ایپس صارفین کی لوکیشن کو ٹریک کرکے ایک گرین کوڈ جاری کرتی ہیں جو اچھی صحت کی علامت ہوتا ہے۔

  • کرونا وائرس فضائی سفر میں کیا تبدیلیاں لا رہا ہے؟

    کرونا وائرس فضائی سفر میں کیا تبدیلیاں لا رہا ہے؟

    دنیا بھر میں کرونا وائرس کے پھیلاؤ کے باعث کئی ممالک میں فضائی سفر کی خدمات معطل کردی گئی ہیں تاہم اب ایوی ایشنز فضائی سفر میں تبدیلیاں لا رہی ہیں جو مسافروں کے لیے  نئی ہوسکتی ہیں۔

    سعودی ویب سائٹ کی رپورٹ کے مطابق موجودہ حالات کے باوجود بعض فضائی کمپنیاں سروس بحال کرنے کے لیے حفاظتی اقدامات میں تبدیلی کا نیا لائحہ عمل مرتب کر رہی ہیں۔

    امارات ایئر کی آفیشل ویب سائٹ پر دیے گئے شیڈول کے مطابق امارات ایئر لائن کی جانب سے فضائی سروس کی بحالی کے لیے نیا لائحہ عمل اختیار کیا جائے گا جس میں مسافروں کو ایئرپورٹ کم از کم 3 گھنٹے قبل پہنچنا ہوگا۔

    امارات ایئر کے مطابق ہر مسافر حفاظتی اقدامات کی پابندی کرتے ہوئے طبی ماسک اور دستانوں کا استعمال لازمی طور پر کرے، تمام مسافروں کو فلائٹ میں جانے سے قبل درجہ حرارت چیک کروانا ہوگا تاکہ احتیاطی تدابیر پر مکمل طور پر عمل کیا جا سکے۔

    دوسری جانب بعض فضائی کمپنیوں کی جانب سے طیاروں میں بنیادی تبدیلیاں بھی کی جا رہی ہیں جو مسافروں کے لیے بالکل نئی ہوں گی۔

    رپورٹ کے مطابق تمام فلائٹس میں روایتی اخباروں کی تقسیم فوری طور پر روک دی جائے گی، ہر مسافر کو جہاز میں سوار ہونے سے قبل طبی ماسک اور سینی ٹائزر فراہم کیا جائے گا۔

    دوران پرواز مسافروں کو فراہم کیے جانے والے کھانے میں بھی بنیادی تبدیلیاں متوقع ہیں جیسے کہ دوران فلائٹ فراہم کیا جانے والا کھانا ایئر ٹائٹ ہوگا جو روایتی کھانوں سے قطعی مختلف ہوگا اور اسے جہاز میں تیار نہیں کیا جائے گا۔

    مزید پڑھیں: فضائی سفر کے دوران جسم میں کیا تبدیلیاں ہوتی ہیں؟

    جہاز میں ہر 30 منٹ میں جراثیم کش ادویات کا اسپرے کیا جائے گا، ہوا کی سرکولیشن کے لیے خصوصی طور پر بائیولوجیکل فلٹرز سے آراستہ سسٹم لگایا جائے گا جو ہوا میں موجود کسی بھی نوعیت کے جراثیموں کو فوری طور پر تلف کرنے کی صلاحیت کا حامل ہوگا۔

    جہاز کے ٹوائلٹ میں صابن جار کے ساتھ خصوصی سینی ٹائزر کی بوتل نصب کرنے کے علاوہ خود کار سسٹم کے ذریعے مسافر پر جراثیم کش ادویات کے اسپرے کا بھی بندوبست ہوگا جو ٹوائلٹ کے دروازے پر نصب ہوگا۔

    مسافروں کے سامان کو مکمل طور پر جراثیم کش ادویات سے اسپرے کیا جائے گا، جہاز کے عملے کی جانب سے مائیک پر مسافروں کی یاد دہانی کے لیے مسلسل ہاتھوں کو سینی ٹائز کرنے کی ہدایات دی جاتی رہیں گی۔

    رپورٹ میں کہا گیا ہے کہ حفاظتی اقدامات کے تحت بعض جہازوں میں خصوصی طور پر ڈیجیٹل تھرمل کیمروں کی بھی تنصیب کی جائے گی تاکہ ہر مسافر کے جسم کا درجہ حرارت نوٹ کیا جا سکے۔

    وبائی امراض سے بچاؤ کے سینٹر نے اس امر کی بھی یقین دہانی کروائی ہے کہ بیشتر جراثیم جہازوں میں اس لیے آسانی سے نہیں پھیل سکتے کہ جہاز کے اندر ہوا کا دبؤو اور اس کی سرکولیشن اس نوعیت کی ہوتی ہے کہ اس میں وائرس اور جراثیم نہیں رہ سکتے۔

  • سعودی عرب: معذوروں اور بزرگ افراد کے لیے فضائی سفر میں مزید سہولت

    سعودی عرب: معذوروں اور بزرگ افراد کے لیے فضائی سفر میں مزید سہولت

    ریاض: مجلس شوریٰ کے اجلاس میں سفارش کی گئی کہ ریاست میں معذوروں اور بزرگ افراد کو فضائی سفر میں مزید سہولت فراہم کرتے ہوئے اندرون اور بیرون ملک پروازوں کے ٹکٹوں میں رعایت دی جائے۔

    سعودی ویب سائٹ کے مطابق مجلس شوریٰ کے اجلاس کے دوران انفارمیشن ٹیکنالوجی اینڈ ٹرانسپورٹ کمیٹی نے محکمہ شہری ہوا بازی سے کہا ہے کہ فضائی کمپنیوں کو معذوروں اور بزرگ افراد کے لیے اندرون اور بیرون ملک پروازوں کے ٹکٹوں میں مزید رعایت دینے پر آمادہ کیا جائے۔

    مجلس شوریٰ نے ہوائی اڈوں کی بنیادی خدمات اور طیاروں کی اصلاح و مرمت کا معیار بھی بلند کرنے کا کہا ہے۔ مجلس کی جانب سے کہا گیا کہ طائف ایئرپورٹ کو جدید خطوط پر استوار کیا جائے اور اس میں توسیع بھی کی جائے۔

    اجلاس میں کنگ عبدالعزیز انٹرنیشنل ایئرپورٹ جدہ کا بوجھ ہلکا کرنے کے لیے خصوصی اقدامات کرنے کی تجویز بھی پیش کی گئی۔

    شوریٰ کی خصوصی کمیٹی نے سفارش کی ہے کہ سعودی اور غیر ملکی سرمایہ کاروں کو ہوائی اڈوں کے مختلف منصوبوں میں حصہ لینے کے لیے خصوصی پالیسی بنائی جائے اور انہیں اس کی ترغیب دی جائے۔

    شوریٰ نے سفارش کی کہ سعودی عریبین ایئر لائنز بوڑھوں اور معذوروں کو اپنی اندرون ملک تمام پروازوں پر مراعات دے۔