Tag: airstrike

یمن: حوثی باغیوں کے خلاف اتحادی افواج کی فضائی کارروائیوں میں شدت آگئی ہے، عدن میں چوبیس گھنٹے میں ہلاک ہونے والوں کی تعدادایک سوچالیس سے زائد ہوگئی ہیں۔

یمن میں حوثی باغیوں کے خلاف اتحادی افواج کی کارروائیاں تیرہویں روز بھی جاری ہیں، عدن میں باغیوں اور صدر منصور ہادی کے حامیوں کے درمیان جھڑپوں نے شہرکو میدان جنگ میں تبدیل کردیا۔

دارالحکومت صنعا، مکلا ،اور عدن میں صدر منصور ہادی کی حامیوں اورحوثی قبائلیوں میں بھی گھمسان کی لڑائی جاری ہے، غیر ملکی میڈٰیا کے مطابق اتحادی فوج نےشہر عدن میں فضائی حملوں میں حکومت مخالف جنگجوؤں کے ٹھکانوں کونشانہ بنایا،  گزشتہ چوبیس گھنٹے کے دوران عدن میں ایک سو سینتالیس افراد مارے گئے، ہلاک ہونےوالوں میں سترہ شہری بھی شامل ہیں۔

دارالحکومت صنعا سمیت عدن اور دیگرشہروں میں اتحادی بمباری اور باغیوں کی جانب سے گولہ باری شدت اختیار کرگئی ہے، شدید بمباری کے باعث ریڈکراس کے امدادی طیارے صنعا نہیں پہنچ سکے۔

اقوام متحدہ نے خبردار کیا ہے کہ یمن میں ہرگزرتے دن کے ساتھ بحران میں شدت آرہی ہے، اقوام متحدہ کے مطابق دوہفتے کی لڑائی میں پانچ سو سے زائد افراد مارے جا چکے ہیں، مختلف علاقوں میں غذائی اشیاء، پانی اوردواؤں کی قلت پیدا ہوگئی ہے اور اگرفوری طورپر امدادی کارروائیاں شروع نہ کی گئیں تو بڑا انسانی المیہ جنم لے سکتا ہے۔

یمن میں جاری پرتشدد واقعات اورجھڑپوں میں ہلاک افراد کی صحیح تعداد سامنے نہیں آسکی ہے لیکن سعودی عرب کی زیرقیادت اتحادی فوج کے حملوں کے بعد سے تین لاکھ سے زائد یمنی بے گھر ہوگئے ہیں۔