Tag: Aitazaz Ahsan

لاہور : وفاقی وزیرریلوے خواجہ سعد رفیق نے کہا ہے کہ سپریم کورٹ کے بڑے بڑے وکیل صرف چوروں کا مقدمہ لڑتے ہیں، ان خیالات کا اظہارانہوں نے لاہورمیں میڈیا سے گفتگو کرتے ہوئے کیا۔

خواجہ سعد رفیق نے نام لئے بغیراعتزاز احسن پرطنزکرتے ہوئے الزام لگایا کہ چوروں کا مقدمہ لڑنے والے آج پانامہ لیکس کامقدمہ لڑرہے ہیں۔انہوں نے کہا کہ پاکستان کے جس چور کا وکیل تلاش کریں گے ایک ہی نکلے گا.

خواجہ سعد رفیق نے کہا کہ حسن اور حسین نواز پاکستان سے ایک روپیہ بھی باہر لیکر نہیں گئے۔ ان کا کہنا تھا کہ وائٹ کالر کرائم پکڑنا کوئی آسان کام نہیں ہے، وزیر اعظم وطن واپس کب آئینگے کچھ معلوم نہیں ،ایک شخص بیمار ہے ، صحت یاب ہوگا تو واپس آئے گا اندازے نہ لگائے جائیں ۔

خواجہ سعد رفیق کا کہنا تھا کہ میری معلومات کے مطابق ابھی تک کمیشن کا سربراہ کسی کو مقرر نہیں کیا ، اپوزیشن سڑکوں کی بجائے پارلیمنٹ میں آئے اور ہم سے بات کرے۔

خواجہ سعد رفیق نے کہا کہ عمران خان برطانیہ فرانزک ایکسپرٹ سے نہیں اپنے سالے کی انتخابی مہم چلانے گئے ہیں، 24 اپریل کو تحریک انصاف دھرنا نہیں بلکہ میوزیکل شو کرنے جارہی ہے ۔

ایک صحافی نے کہا کہ آج ہم خواجہ سعد سے نہیں بلکہ رفیق شہید کے بیٹے سے سوال کرنا چاہتے ہیں، صحافی نے سوال کیا کہ مزدور ایک ایک ڈالر کما کر ملک میں بھیجتا ہے ، حکمرانوں کے بچے پاناما میں خفیہ اکاونٹ کھولتے ہیں۔ صحافی کا سوال سن کر خواجہ سعد رفیق پریشان ہوگئے۔

سوال کے جواب میں خواجہ سعد رفیق کا کہنا تھا کہ جواب نہیں دینا چاہتا کوئی اور سوال ہے تو کریں ، یاد رہے کہ پی پی رہنما اعتزاز احسن ایڈووکیٹ نے ہی ماضی میں وزیراعظم کی اہلیہ کلثوم نواز کا مقدمہ بھی لڑا تھا۔