کراچی : شہر قائد کی سڑکوں پر قائم علی شاہ کی تصاویر بنانے والےعالمگیرکو فیروز آباد تھانے میں طلب کر لیا گیا۔

تفصیلات کے مطابق وزیراعلیٰ سندھ سید قائم علی شاہ کی تصاویر چھاپ کر کھلے مین ہول اور کچرے کی نشاندہی کرنے والے عالمگیر نے پولیس پر ہراساں کرنے کا الزام لگادیا۔

گٹرکے ڈھکن تو نہ لگے، سائَیں کی تصویر کے ذریعے مسائل کی نشاندہی پر پولیس عالمگیرخان کے پیچھے پڑ گئی، فیروز آباد پولیس نے آرٹسٹ عالمگیر کو گاڑی سمیت طلب کرلیا۔

عالمگیر کا کہنا ہے کہ فیروز آباد تھانے سے کہا گیا کہ آپ کی گاڑی کو ایکسیڈنٹ کے بعد فرار ہوتے دیکھا گیا ہے، فیروز آباد تھانے سے آنے والی کال عالمگیر کے والد نے ریسیو کی تھی۔

انہوں نے کہا کہ مجھے اپنے کام سے روکنے کیلئے ہراساں کیا جا رہا ہے، عالمگیرکے مطابق پولیس نےایکسڈنٹ کا الزام لگا کر تفتیش کیلئے فون کیا۔

عالمگیر خان کا کہنا تھا کہ سائیں سرکار عوامی مسائل حل کرنے کے بجائے الٹا انہیں پریشان کررہی ہے، فنکار نے صاف کہہ دیا کہ اوچھے ہتھکنڈوں سے نہیں ڈرنے والا نہیں ہوں۔ کراچی کی بہتری کیلئے اپنی کوشش کرتار ہوں گا اور سوشل میڈیا پر بھی مہم جاری رکھوں گا۔