اسلام آباد کی عدالت نے تحریک انصاف کے رہنما علی امین گنڈا پور کا ایک دن کا ریمانڈ د یتے ہوئے انہیں کل اے ٹی سی میں پیش کرنے کا حکم دے دیا۔
ڈسٹرکٹ اینڈ سیشن کورٹ اسلام آباد میں تحریک انصاف کے رہنما علی امین کیخلاف تھانہ گولڑہ میں دائرمقدمے کی سماعت ہوئی۔ عدالت نے علی امین گنڈاپور کو ایک دن کے ریمانڈ پر پولیس کے حوالے کردیا، علی امین گنڈاپور کو کل انسداد دہشت گردی عدالت میں پیش کرنے کا حکم بھی دیا گیا ہے۔
عدالت کے روبرو بیان دیتے ہوئے علی امین گنڈاپور نے بتایا کہ مجھ پر چادر ڈالی گئی ہے جس سے میری سانس بند ہو رہی ہے،
سماعت کے آغاز پر سرکاری وکیل عدنان نے عدالت کو علی امین گنڈا پور پر لگائے گئے انتہائی سنجیدہ نوعیت کے الزامات پڑھ کر سنائے، جس میں کہا گیا ہے کہ علی امین نے آڈیو میں امن و امان قائم کرنے والے اداروں میں خوف و ہراس پیدا کیا۔
سرکاری وکیل نے بتایا کہ علی امین گنڈا پور نے آڈیو میں اسلام آباد پر قبضہ کرنے کی بات اور کارکنوں کو اسلحہ جمع کرنے کی ہدایات دیں، یہ تمام دفعات ناقابل ضمانت ہیں، قانون کے مطابق علی امین گنڈا پور کو عمر قید کی سزا بنتی ہے۔
پراسیکیوٹرعدنان نے کہا کہ 22ای میں تو کم سے کم 15دن تک ریمانڈ لیاجاسکتا ہے، جس کے جواب میں عدالت کا کہنا تھا کہ آپ نے تو صرف 5دن کا ریمانڈ مانگا ہے، پراسیکیوٹرعدنان کی جانب سے مختلف کیسز کے حوالے دیے گئے۔
اس کے بعد علی امین گنڈاپور کے وکیل بابر اعوان نے اپنے دلائل شروع کیے اور بتایا کہ ایف آئی آر میں تاریخ دیکھیں واقعہ2022کاہے،ایک مجسٹریٹ ہے جس نے مقدمہ درج کروایا ہے، پولیس والا جو دھمکی سے ڈرا اس نے بھی مقدمہ نہیں دیا۔
انہوں نے کہا کہ میں الزامات کی تفصیل اپنی عینک سے پڑھنا چاہوں گا، علی امین گنڈا پور پرالزامات بے بنیاد ہیں، علی امین گنڈا پور نے جنہیں دھمکایا انہوں نے کیس نہیں کیا، انہیں یہ کیسے پتا چلا کہ یہ آڈیو علی امین گنڈا پور کی ہے؟
وکیل بابر اعوان نے کہا کہ مریم نواز کی آڈیوز آئیں ان پر کتنے پرچے ہوئے؟ علی امین گنڈا پور کی آڈیو پراُس وقت پرچہ کیوں نہیں دیا گیا، کلبھوشن کو سزا نہیں دے سکے، علی امین کے خلاف محاذ کھول لیا، بہت سی ایپس ہیں جن کے ذریعے آوازیں بنائی جارہی ہیں، کیسے فیصلہ کیا گیا کہ یہ علی امین گنڈا پور کی آواز ہے؟
عدالت نے فریقین کے دلائل سننے کے بعد تحریک انصاف کے رہنما علی امین گنڈا پور کا ایک دن کا ریمانڈ دیتے ہوئے پولیس کے حوالے کردیا، جبکہ عدالت نے تحریک انصاف کے وکلاء کا مؤقف تسلیم کر تے ہوئے حکم دیا کہ علی امین گنڈا پور کو کل اے ٹی سی میں پیش کیا جائے۔
