اسلام آباد : علی جہانگیرصدیقی کی بحیثیت امریکی سفیر کی تقرری کیخلاف درخواست اسلام آباد ہائی کورٹ میں سماعت کیلئے منظور کرلی گئی، عدالت نے تعیناتی سے متعلق ریکارڈ اورسمری پیش کرنے کا حکم دے دیا۔
تفصیلات کے مطابق اسلام آباد ہائی کورٹ نے امریکا میں بطور پاکستانی سفیر تعینات ہونے والے علی جہانگیر صدیقی کیخلاف درخواست سماعت کیلئے منظور کرتے ہوئے اٹارنی جنرل کو تحریری حکم جاری کیا ہے کہ سفیر کی تعیناتی سے متعلق ریکارڈ اور سمری پیش کی جائے،۔
اسلام آباد ہائیکورٹ کے حکم نامے کی کاپی اےآر وائی نیوز نےحاصل کرلی، ہائیکورٹ نے تحریری حکم میں کہا ہے کہ اٹارنی جنرل اور دیگر فریقین آئندہ سماعت سے پہلے جواب دیں، تمام فریقین تحریری جواب کی کاپیاں درخواست گزارکو بھی دیں،۔
تحریری حکم نامہ میں کہا گیا ہے کہ علی جہانگیر کی تعیناتی عوامی مفاد عامہ کا سوال ہے، اس معاملے میں غیرجانبدار شخصیت عدالتی معاونت کرے۔
اس سلسلے میں سابق سفیر جہانگیر اشرف قاضی، سابق سیکرٹری خارجہ انعام الحق، سینئر وکیل مخدوم علی خان، بابرستار ایڈووکیٹ کو معاون مقرر کیا گیا ہے۔13اپریل سے پہلےرجسٹرار کو عدالتی معاونین کو حکم نامہ بھیجنے کی ہدایت دی گئی ہے۔
اس کے علاوہ درخواست اوردیگر مواد بھی معاونین کوارسال کرنے کی ہدایت کرتے ہوئے سیکرٹری کابینہ ڈویژن، سیکرٹری خارجہ سے تحریری جواب طلب کیا گیا ہے،۔
مزید پڑھیں : علی جہانگیر صدیقی کی بطور سفیر تعیناتی کے خلاف درخواست دائر
عدالت نے وزیر اعظم کے پرنسپل سیکرٹری اورعلی جہانگیرصدیقی سے بھی جواب طلب کرلیا، کیس کی مزیدسماعت دو مئی کو کی جائے گی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
