لاہور : علی ظفر کی جانب سے ہتک عزت کیس میں گلوکاری میشا شفیع نے عدالت میں پیش ہونے کی یقین دہانی کروا دی اور کہا 16 دسمبر سے 20 دسمبر تک پاکستان میں ہیں اور عدالت میں پیش ہوں گی۔
تفصیلات کے مطابق لاہور ہائی کورٹ میں علی ظفر کی جانب سے میشا شفیع کے خلاف ہتک عزت کیس کی ، علی ظفر کی جانب سے میشا شفیع کو طلب کرنے کی درخواست پر جواب جمع کرادیا گیا۔
میشا شفیع کی جانب سےان کے وکیل نے جواب جمع کرایا ، جس میں کہا گیا کہ ایک پروفیشنل آرٹسٹ ہوں ، کام کی وجہ سے مختلف ممالک کا سفر کرنا ہوتا ہے، جس ملک جاتی ہوں اپنے ذریعہ معاش کے لیے ہی جاتی ہوں۔
گلوکارہ نے یقین دہانی کرواٸی کہ وہ 16 دسمبر سے 20 دسمبر تک پاکستان میں ہیں اور عدالت میں پیش ہوں گی ، ان چار دنوں میں علی ظفر کے وکلا جرح مکمل کر سکتے ہیں تاہم بیس دسمبر کے بعد واپس چلی جاٸیں گی۔
میشا شفیع نے جواب میں مزید کہا کہ پہلے ویڈیو لنک پر جرح کی درخواست دی، جس پر عدالت نے فیصل محفوظ کر رکھا ہے اب وہ ویڈیو لنک کے ذریعے جرح کی درخواست پر زور نہیں دینا چاہتیں۔
جواب میں کہا گیا کہ میشا شفیع کے خاوند کینیڈا میں بچوں کی دیکھ بھال کے لیے رکے ہوٸے ہیں وہ پیش نہیں ہو سکتے لہذا ان کے بیان پر جرح ویڈیو لنک کے ذریعے ہی کی جاٸے ۔
کیس کی مزید سماعت تین دسمبر کو ہو گی جس میں علی ظفر کے وکلا میشا شفیع کی والدہ اداکارہ صبا حمید پر جرح مکمل کریں گے۔
