ARYNews.tv | Urdu – Har Lamha Bakhabar

Tag: ali zaidi

  • ‘عام انتخابات سے پہلے پیپلز پارٹی کا سندھ سے بوریہ بستر گول کردیں گے’

    ‘عام انتخابات سے پہلے پیپلز پارٹی کا سندھ سے بوریہ بستر گول کردیں گے’

    کراچی : وفاقی وزیر علی زیدی کا کہنا ہے کہ پیپلز پارٹی سندھ کو دیمک کی طرح چاٹ رہی ہے، عام انتخابات سے پہلےپی پی کا سندھ سےبوریہ بستر گول کردیں گے۔

    تفصیلات کے مطابق وفاقی وزیر علی زیدی کا سندھ کے سیاسی رہنماؤں سے ملاقاتوں کا سلسلہ جاری ہے ، علی زیدی سے لاڑکانہ سے تعلق رکھنے والے سیاسی رہنما اللہ بخش انڑ کی ملاقات کی۔

    ملاقات میں دونوں رہنماؤں میں سندھ کی سیاسی صورتحال پر تفصیلی گفتگو کی اور سندھ میں پی ٹی آئی کی تنظیم سازی کے حوالے سے بھی تبادلہ خیال کیا گیا۔

    اس موقع پر علی زیدی نے کہا کہ سندھ سے ڈاکو راج ختم کرنے کیلئےپی ٹی آئی متحرک ہو چکی، اب وقت آگیا ، سندھ میں پی پی کے خلاف عوام کو اکھٹا ہونا ہوگا۔

    وفاقی وزیر کا کہنا تھا کہ پیپلز پارٹی سندھ کو دیمک کی طرح چاٹ رہی ہے، عام انتخابات سے پہلےپی پی کاسندھ سےبوریہ بستر گول کردیں گے ، تحریک انصاف کو سندھ میں مضبوط بنانے جارہے ہیں۔

  • اقوام متحدہ کے بعد انٹرنیشل میری ٹائم آرگنائزیشن میں بھی قرآنی آیات کی گونج

    اقوام متحدہ کے بعد انٹرنیشل میری ٹائم آرگنائزیشن میں بھی قرآنی آیات کی گونج

    کراچی : وزیربحری امور علی زیدی نے آئی ایم او میں اپنے خطاب کا آغاز قرآنی آیات سے کیا اور آئی ایم او کونسل کی رکنیت کیلئے رکن ممالک سے حمایت مانگ لی۔

    تفصیلات کے مطابق اقوام متحدہ کے بعد انٹرنیشل میری ٹائم آرگنائزیشن میں بھی قرآنی آیات کی گونج سنائی دی ، وزیربحری امور کی جانب سے آئی ایم او کنونشن میں اپنے خطاب کا آغاز قرآنی آیات سے کیا۔

    وزیر بحری امور نے خطاب کے آغاز میں قرآن پاک کی سورہ رحمٰن میں سمندر کے حوالے سے آیات کا ترجمہ کیا۔

    وفاقی وزیر برائے بحری امور علی زیدی نے اہم خطاب میں کہا کہ پاکستان عالمی بحری برادری کا فعال حصہ اور متحرک ترین رکن ہے، 1958 سے پاکستان آئی ایم او کی ہر سطح اور نوعیت کی سرگرمیوں میں شریک رہا ہے۔

    علی حیدر زیدی نے بتایا کہ 2 لاکھ نوے ہزار مربع کلومیٹر کے اقتصادی زون اور 11 سو کلومیٹر کی ساحلی پٹی کیساتھ پاکستان دنیا کی مصروف ترین سمندری گزرگاہ کے سنگم پر واقع ہے۔

    وفاقی وزیر نے کہا کہ اقوام متحدہ کے ایس ڈی جیز اور آئی ایم او اسٹریٹیجیک اہداف کے حصول میں اپنا حصہ ڈالنے کیلئے پاکستان پرعزم اور متحرک ہے، آئی ایم او ممالک کے مابین علوم و مہارت کا تبادلہ وقت کی اہم ضرورت ہے، پاکستان آئی ایم او میری ٹائم ریسرچ فنڈ کے اجراء و قیام کی پرزور تائید کرتا ہے۔

    ان کا کہنا تھا کہ کوروناء کی عالمی وباء کے دوران پاکستان نے نہایت مؤثر اقدامات کے ذریعے عالمی بحری تجارت کو بندشوں سے بچایا،غیرمعمولی صورتحال کے باوجود بندرگاہوں کو فعال اور کھلا رکھنا پاکستان ہی کا اعجاز ہے۔

    وزیر بحری امور نے مزید کہا کہ ملکی اور غیرملکی جہاز رانوں کو وباء سے بچانے کیلئے مفت کوروناء ویکسین دی گئی اور یہ سلسلہ بدستور جاری ہے، نومبر 2021 تک وزارت بحری امور نے کراچی کے ساحلی شہر میں 5 لاکھ لوگوں کو ویکسین دی اور 2022 کے بہار تک 10 لاکھ لوگوں کو ویکسین لگائی جائے گی۔

    ان کا کہنا تھا کہ وزیراعظم عمران خان کی قیادت میں پاکستان نے ماحولیات کے تحفظ کے لئے غیر معمولی اقدامات اٹھائے ہیں، وزارت بحری امور اپنے زیرانتظام حصے کو کاربن سے پاک کرنے کی راہ پر گامزن ہے، علی حیدر زیدی

    علی زیدی نے کہا اپنے ساحلوں کی حفاظت کیلئے پاکستان نے 70 لاکھ مینگروز اگائے ہیں، یہ مینگروز زمینی کٹاؤ روکنے کے ساتھ آبی حیات کے تحفظ میں بھی اہم کردار ادا کریں گے۔

    وزیر بحری امور کا کہنا تھا کہ صاف پانیوں میں محفوظ جہاز رانی کے حوالے سے پاکستان کے عزم کے پیش نظر آئی ایم او رکن ممالک کیٹیگری سی کیلئے بطور امیدوار پاکستان کی حمایت کریں۔

  • 80 فیصد کسٹم ٹیکس پورٹ سے آتا ہے: علی زیدی

    80 فیصد کسٹم ٹیکس پورٹ سے آتا ہے: علی زیدی

    اسلام آباد: وفاقی وزیر برائے بحری امور علی زیدی کا کہنا ہے کہ 80 فیصد کسٹم ٹیکس پورٹ سے کلیکٹ ہوتا ہے جبکہ 80 فیصد ایکسپورٹ امپورٹ ٹریڈ بھی پورٹ سے ہوتی ہے۔ دنیا بھر میں سمندر کے قریب انڈسٹریز لگتی ہیں۔

    تفصیلات کے مطابق وفاقی وزیر برائے بحری امور علی زیدی کا کہنا ہے کہ وفاقی حکومت نے کراچی کے لیے بہت فنڈنگ پروجیکٹس کیے، کچھ چیزیں ہم نے بہت اچھی کیں اور کچھ نہیں کر سکے۔

    علی زیدی کا کہنا تھا کہ بہت سی تکنیکی چیزیں وقت کے ساتھ پتہ چلیں، لوگوں کو بحری امور کے بارے میں زیادہ علم نہیں ہے، عمران خان سے زیادہ کسی نے وزارت بحری امور کو اتنی تفصیل سے نہیں دیکھا۔

    انہوں نے کہا کہ میری ٹائم کے بارے میں مشہور تھا کہ بہت کھانچے لگتے ہیں، 80 فیصد کسٹم ٹیکس بھی پورٹ سے کلیکٹ ہوتا ہے، 80 فیصد ایکسپورٹ امپورٹ ٹریڈ بھی پورٹ سے ہوتی ہے۔ دنیا بھر میں سمندر کے قریب انڈسٹریز لگتی ہیں۔ پیٹرولیم مصنوعات اور کوئلہ سمندر کے ذریعے ہی آتا ہے۔

    علی زیدی کا کہنا تھا کہ ماہی گیری کو بحری امور میں خاص اہمیت حاصل ہے، بہت سارے پاور پروڈیوسنگ پلانٹ پورٹ قاسم پر لگے ہوئے ہیں، دنیا بھر میں سمندر کے قریب پراپرٹی مہنگی ہوتی ہے، ہمارے بیچ فرنٹ پر انکروچمنٹ کردی گئی۔

    انہوں نے کہا کہ کے پی ٹی کا سنہ 2010 سے آڈٹ نہیں ہوا تھا، کے پی ٹی کی زمینوں پر تجاوزات قائم ہیں۔ 900 سے زائد کیسز میں اسٹے آرڈر ہیں۔ کے پی ٹی کا ورکشاپ 14 سال سے بند ہے۔

  • کیا سوئز کنال میں کوئی پاکستانی جہاز بھی تھا؟

    کیا سوئز کنال میں کوئی پاکستانی جہاز بھی تھا؟

    کراچی: وفاقی وزیر برائے بحری امور علی زیدی کا کہنا ہے کہ سوئز کنال کی بندش کے دوران وہاں پاکستان کا کوئی جہاز نہیں پھنسا تاہم بندش کے معمولی سے اثرات یہاں کی امپورٹ پر ہوسکتے ہیں۔

    تفصیلات کے مطابق وفاقی وزیر برائے بحری امور علی زیدی نے اے آر وائی نیوز کے مارننگ شو باخبر سویرا میں گفتگو کرتے ہوئے بتایا کہ نہر سوئز میں بحری جہاز پھنسنے سے سپلائی مینجمنٹ رکی ہے اور اس سے بہت مشکلات پیدا ہوں گی۔

    وفاقی وزیر کا کہنا تھا کہ اس راستے سے یومیہ 18 لاکھ بیرل تیل کی ترسیل کی جاتی ہے، جہاز کے پھنسنے سے دنیا کی معیشت کو 400 ملین ڈالر فی گھنٹہ کا نقصان ہوا ہے۔

    علی زیدی کا کہنا تھا کہ اب راستہ کھل چکا ہے لیکن 4، 5 دن ضائع ہونے سے بیک لاگ خطرناک ہوسکتا ہے، خوش قسمتی سے پاکستان کا کوئی جہاز وہاں نہیں تھا البتہ وہاں سے کتنے جہاز پاکستان آنا تھے یہ تفصیلات ابھی سامنے نہیں آئیں۔

    انہوں نے مزید کہا کہ کرونا وائرس کی وجہ سے ویسے ہی بڑے معاشی مسائل کا سامنا ہے، ایکسپورٹ بڑھ گئی ہے اور امپورٹ کم ہوئی ہے جبکہ کنٹینرز کی بھی قلت ہے۔

    خیال رہے کہ گزشتہ ہفتے مصر کی نہر سوئز میں ایک بڑا تجارتی بحری جہاز پھنس گیا تھا جس سے دنیا کا اہم ترین تجارتی راستہ بلاک ہوگیا تھا۔

    سوئز کنال کی بندش سے دونوں طرف 300 سے زائد جہاز پھنس گئے تھے، دنیا کی اہم تجارتی گزرگاہ بند ہونے سے یومیہ 9 ارب ڈالر مالیت کی تجارت متاثر ہوئی۔

    کئی دن سے پھنسے اس جہاز کو گزشتہ رات بالآخر نکال لیا گیا تاہم اب بھی نہر سوئز پر موجود بحری جہازوں کی آمد و رفت بحال نہیں ہوسکی۔

  • کنٹینرز کے کرایوں میں اضافہ کیوں؟ علی زیدی نے وجہ بتا دی

    کنٹینرز کے کرایوں میں اضافہ کیوں؟ علی زیدی نے وجہ بتا دی

    لاہور: وزیر بحری امور علی زیدی نے کہا ہے کہ ہماری حکومت میں ملکی برآمدات میں اضافے کی وجہ سے کنٹینرز بھی اب کم پڑ گئے ہیں۔

    اے آر وائی نیوز کے مطابق علی زیدی نے لاہور چیمبر آف کامرس میں خطاب کرتے ہوئے کنٹینرز کے کرایوں میں اضافے کی وجہ بتائی کہ طلب و رسد کے سبب اس میں اضافہ ہوا۔

    واضح رہے کہ سینیٹ انتخابات کے بعد وزیر اعظم کی جانب سے اعتماد کے ووٹ کے لیے جاری سرگرمیوں کے دوران کسی بھی رکن کو اسلام آباد چھوڑنے کی اجازت نہیں ہے، وفاقی وزیر نے خطاب کے دوران بتایا کہ اگرچہ کسی کو اسلام آباد چھوڑنے کی اجازت نہیں لیکن میں خصوصی اجازت لے کر لاہور آیا ہوں۔

    علی زیدی نے کنٹینرز کے درپیش مسئلے پر وضاحت کرتے ہوئے کہا کہ پاکستان میں 5 ٹرمینلز پر کنٹینرز کی لوڈنگ اَن لوڈنگ ہوتی ہے، اور جتنے بھی کنٹریکٹرز ہیں، وہ حکومت کے نہیں ہیں، کنٹینرز کے کرایوں میں اضافہ ڈیمانڈ اینڈ سپلائی کی وجہ سے ہے۔

    وفاقی وزری بحری امور کا کہنا تھا کہ کرونا کی وجہ سے دنیا بھر میں ٹریڈ کم ہو رہی ہے، لیکن ملکی برآمدات میں اضافے کی وجہ سے کنٹینرز کم پڑ گئے ہیں، حکومت نے پی این ایس سی کے جہازوں کی تعداد بھی 9 سے 11 کر دی ہے۔

    انھوں نے کہا 1970 سے کنٹیرز پورٹ پر ہیں جن کی آج تک نیلامی نہیں ہوئی، پرانے کنٹینرز کی اب ہم نیلامی کرنے جا رہے ہیں، ہمارے دور میں کسی رعایتی پورٹ ٹرمینل کے معاہدے پر دستخط نہیں ہوئے، حکومت کاروباری آسانیوں کے حوالے سے اقدامات اٹھا رہی ہے۔

    قبضہ مافیا کے حوالے سے علی زیدی نے کہا کہ لوگوں نے زمین کنٹینرز کے لیے لی لیکن پھر اس پر اپارٹمنٹس بنا لیے، کے پی ٹی کی ان زمینوں پر قبضہ چھڑانے کے لیے اقدامات کر رہے ہیں۔

  • ‘ویرات کوہلی کوعمران خان جیسا بننے کیلئے دوبارہ پیدا ہونا پڑے گا’

    ‘ویرات کوہلی کوعمران خان جیسا بننے کیلئے دوبارہ پیدا ہونا پڑے گا’

    اسلام آباد :وفاقی وزیرعلی زیدی کا کہنا ہے کہ عمران خان کرکٹ کا جائنٹ ہیں ، ویرات کوہلی کوعمران خان جیسا بننے کیلئے دوبارہ پیدا ہونا پڑے گا۔

    تفصیلات کے مطابق وفاقی وزیرعلی زیدی نے انٹرنیشنل کرکٹ کونسل (آئی سی سی) کی جانب سے عمران خان کی بطور “کھلاڑی ” مقبولیت دنیا بھر میں برقرار کے حوالے سے کہا ویرات کوہلی کوعمران خان جیسابننےکیلئےدوبارہ پیدا ہونا پڑے گا، کرکٹ کا جائنٹ عمران خان ہے ، ویرات کوہلی اچھے بیٹسمین ہیں لیکن جائنٹ نہیں۔

    دوسری جانب آئی سی سی پولز پر معاون خصوصی زلفی بخاری نے سماجی رابطے کی ویب سائٹ ٹوئٹر پر دلچسپ رد عمل دیتے ہوئے کہا کپتان صرف پی ڈی ایم کو ہی نہیں ہرا رہے۔

    مزید پڑھیں : عمران خان کی بطور “کھلاڑی ” مقبولیت دنیا بھر میں برقرار

    خیال رہے انٹرنیشنل کرکٹ کونسل (آئی سی سی) کی جانب سے ایک پول جاری کیاگیا ، جس میں عمران خان فاتح قرار پائے، عمران خان نے بھارتی کپتان ویرات کوہلی کو شکست دیتے ہوئے 47 فیصد ووٹ حاصل کئے جبکہ ویرات کوہلی کو 46 فیصد ووٹ ملے۔

  • وفاقی وزیر کا وزیراعلیٰ اور آئی جی سندھ سے مستعفی ہونے کا مطالبہ

    وفاقی وزیر کا وزیراعلیٰ اور آئی جی سندھ سے مستعفی ہونے کا مطالبہ

    کراچی: وفاقی وزیر برائے بحری امور علی زیدی نے کیپٹن (ر) صفدر کیس میں وزیراعلیٰ سندھ اور آئی جی سے مستعفی ہونے کا مطالبہ کردیا۔

    اے آر وائی نیوز کی رپورٹ کے مطابق وفاقی وزیر علی زیدی نے نیوز کانفرنس کرتے ہوئے کہا کہ مزار قائد میں سابق وزیراعظم بھی موجود تھے کیا ان کونہیں پتہ وہ کس مقام پر ہیں، ہم ساری رات مقدمہ درج کرانے کیلئے تھانے میں رہے، آئی جی سے کہہ دیا تھا مقدمہ درج نہ ہوا تو تحریک استحقاق جمع ہوگی۔

    وفاقی وزیر نے کہا کہ آئی جی اغوا ہوا ہے تو مراد علی شاہ استعفیٰ دیں یا آئی جی مستعفی ہو، آپ کا آئی جی آپ کے کنٹرول میں نہیں تو آپ کس بات کے وزیراعلیٰ ہیں۔

    علی زیدی نے کہا کہ مریم نوازنے کہا ہوٹل کا دروازہ توڑ کر کیپٹن (ر) صفدر کو گرفتار کیا گیا، کیا فائیو اسٹار ہوٹل کا دروازہ لات مارنے سے ٹوٹ جاتا ہے؟ وہ گانا گاتے ہوئے پولیس کی موبائل میں بیٹھے۔

    مزید پڑھیں: کیپٹن(ر)صفدر کی ضمانت منظور

    انہوں نے سوال اٹھایا کہ گرفتاری کے معاملے پرسندھ پولیس کا ٹویٹ ڈیلیٹ کیوں ہوا؟ دنیا نے وہ ٹویٹ دیکھا جس میں لکھا گیا گرفتاری قانون کے مطابق ہوئی، پولیس نے پہلے ٹویٹ میں مقدمہ درج اور میرٹ پر کاروائی کا بولا، سندھ پولیس نے پھر اپنا ہی ٹویٹ ڈیلیٹ کیا۔

    علی زیدی نے کہا کہ ان لوگوں نے تماشا لگایا ہوا ہے، مزار قائد پر نعرے بازی کی گئی، مریم نواز نے بھی مزار قائد کا تقدس پامال کیا اورتالیاں بجائیں، وہ اجلاس کررہی ہیں انہیں بھی گرفتار کریں، پوری پارٹی پارلیمںٹ میں تحریک استحقاق جمع کروائے گی۔

    انہوں نے کہا کہ چیف سیکریٹری سندھ کو بھی کٹہرے میں کھڑا کریں گے، پولیس سوچ میں ہے گرفتار کریں کہ نہ کریں، ملک میں قانون کی بالادستی ہونی چاہئے۔

  • ن لیگ کا اقتدار ختم ہوا تو پاکستان دیوالیہ پن کی دہلیز پر کھڑا تھا: علی زیدی

    ن لیگ کا اقتدار ختم ہوا تو پاکستان دیوالیہ پن کی دہلیز پر کھڑا تھا: علی زیدی

    اسلام آباد: وفاقی وزیر برائے بحری امور علی زیدی کا کہنا ہے کہ نواز شریف بطور وزیر اعلیٰ رخصت ہوئے تو پنجاب کا دیوالیہ نکل چکا تھا، سنہ 2018 میں بھی مسلم لیگ ن کا اقتدار ختم ہوا تو پاکستان دیوالیہ پن کی دہلیز پر کھڑا تھا۔

    تفصیلات کے مطابق وفاقی وزیر برائے بحری امور علی زیدی نے سماجی رابطے کی ویب سائٹ ٹویٹر پر اپنے ٹویٹ میں کہا کہ وزارت عظمیٰ کے لیے نواز شریف نے بطور وزیر اعلیٰ سرمائے کی بارش کی۔

    علی زیدی کا کہنا تھا کہ ارکان صوبائی اسمبلی میں پیسہ بانٹنے کا نتیجہ یہ ہوا کہ نواز شریف رخصت ہوئے تو پنجاب کا دیوالیہ نکل چکا تھا۔

    انہوں نے کہا کہ نواز شریف کی حکومت نے ملتی جلتی واردات سنہ 2018 میں بھی دہرائی، مسلم لیگ ن کا اقتدار ختم ہوا تو پاکستان دیوالیہ پن کی دہلیز پر کھڑا تھا۔

    وفاقی وزیر کا کہنا تھا کہ 90 کی دہائی میں پنجاب بینک سے اتفاق گروپ کو غیر معمولی قرضے دلائے گئے، پھر اسی بینک سے سیاسی حواریوں کو بھی خوب نوازا گیا۔

    علی زیدی نے مزید کہا کہ چوری کے مال پر بیٹھ کر پارسائی کا بگل بجانا نری منافقت ہے۔ قوم نے منافقوں، بد دیانتوں اور خائنوں سے پیچھا چھڑانے کا عزم کر رکھا ہے، عمران خان جیسا صادق و امین قائد منصب قیادت پر بیٹھا ہے اور تنہا کرپٹ ٹولے سے برسر پیکار ہے۔

  • ازبکستان کی پاکستانی بندرگاہوں کے ذریعے سمندری تجارت تک رسائی اور تجارتی راہداری پر اہم پیش رفت

    ازبکستان کی پاکستانی بندرگاہوں کے ذریعے سمندری تجارت تک رسائی اور تجارتی راہداری پر اہم پیش رفت

    اسلام آباد : ازبکستان کی سمندری تجارت تک رسائی اور تجارتی راہداری پر اہم پیش رفت سامنے آئی، وفاقی وزیر علی زیدی نے کہا کہ پاکستانی بندرگاہوں کو ریل اور روڈ کے ذریعے ازبکستان سے جوڑا جائے گا۔

    تفصیلات کے مطابق ازبکستان کی پاکستانی بندرگاہوں کے ذریعے سمندری تجارت تک رسائی اور تجارتی راہداری پر اہم پیش رفت ہوئی ، وفاقی وزیر برائے سمندری امور علی زیدی  سے ازبک نائب وزیر اعظم برائے سرمایہ کاری اور خارجہ تجارت ، مسٹر سرڈور عمورزاکوف کی کی ملاقات ہوئی ، ملاقات میں تجارتی راہداری اور ازبکستان کیلئے پاکستانی بندرگاہوں کے استعمال پر تبادلہ خیال کیا گیا۔

    وفاقی وزیرعلی زیدی نے کہا کہ 2 سال میں ازبکستان اور پاکستان کے مابین تجارت بڑھی ہے، تجارتی راہداری ازبکستان کی اشیاافریقہ،ایشیا،یورپ پہنچانے میں مدد دے گی۔

    علی زیدی کا کہنا تھا کہ پاکستانی بندرگاہیں وسطی ایشیائی تجارت کیلئےمختصر،کم لاگت کاتجارتی راستہ ہے، اس سلسلے میں جوائنٹ ورکنگ گروپ بنانے کی تجویز بھی پیش کردی گئی۔

    ملاقات میں کراچی اور گوادر پرٹرمینل،خصوصی بحری بیڑےکی بھی تجویز زیرغور آئی، علی زیدی نے کہا کہ پاکستانی بندرگاہوں کو ریل اور روڈ کے ذریعے ازبکستان سے جوڑا جائے گا۔

    خیال رہے گذشتہ روز ازبک نائب وزیر اعظم پاکستان پہنچے تھے ، دورے کے دوران انھوں نے وزیراعظم عمران خان اور آرمی چیف جنرل قمر جاوید باجوہ سے ملاقاتیں کیں۔

  • پیپلز پارٹی 12 سال سے سندھ میں لوٹ مار کرتی آرہی ہے: علی زیدی

    پیپلز پارٹی 12 سال سے سندھ میں لوٹ مار کرتی آرہی ہے: علی زیدی

    اسلام آباد: وفاقی وزیر برائے بحری امور علی زیدی کا کہنا ہے کہ بلاول نے سیلاب متاثرین کی حالت زار کا ذمہ دار وفاقی حکومت کو ٹھہرایا، یہ رویہ بلاول کی ناپختگی اور پیپلز پارٹی کی نا اہلی ظاہر کرتا ہے۔

    تفصیلات کے مطابق وفاقی وزیر برائے بحری امور علی زیدی نے سماجی رابطے کی ویب سائٹ ٹویٹر پر اپنے ٹویٹ میں کہا کہ بلاول نے سیلاب متاثرین کی حالت زار کا ذمہ دار وفاقی حکومت کو ٹھہرایا، پیپلز پارٹی خود مسلسل 12 سال سے سندھ پر حکمرانی اور لوٹ مار کرتی آرہی ہے۔

    علی زیدی کا کہنا تھا کہ وفاقی حکومت کو ذمہ دار ٹھہرانا بلاول کی ناپختگی اور پیپلز پارٹی کی نا اہلی ظاہر کرتی ہے، نہ روٹی نہ کپڑا نہ مکان، یہ سندھ کے عوام کو بے وقوف بنانے کا نعرہ ہے۔

    انہوں نے کہا کہ ذوالفقار بھٹو کے داماد اور پوتے نے سندھ کو کرپشن اور گندگی کا حوض بنا ڈالا، سندھ کے لوگوں کی ترقی کے لیے ذوالفقار علی بھٹو کے داماد اور پوتے نے کچھ نہیں کیا۔

    علی زیدی کا کہنا تھا کہ بھٹو کے سماجی فلاحی ایجنڈے سے مماثل ایجنڈے پر تو تحریک انصاف عمل پیرا ہے، بھٹو زندہ نہیں لیکن شرمندہ ضرور ہے۔

    ابہوں نے کہا کہ وفاقی حکومت کراچی کی ترقی کے لیے ہر ممکن اقدام کر رہی ہے، وفاقی حکومت سندھ کے دیگر علاقوں کی ترقی کے لیے بھی کوشش کرے گی، پیپلز پارٹی کو اس موقع پر سنجیدگی کا مظاہرہ کرنے کی ضرورت ہے، سندھ حکومت کم سے کم ڈویژن میں گریڈ 21 کے ایڈمنسٹریٹر تعینات کرے۔