ARYNews.tv | Urdu – Har Lamha Bakhabar

Tag: Aliya Hamza

  • عالیہ حمزہ کو اڈیالہ سے دوسری جیل بھیج دیا گیا

    عالیہ حمزہ کو اڈیالہ سے دوسری جیل بھیج دیا گیا

    جہلم : پاکستان تحریک انصاف کی مرکزی رہنما عالیہ حمزہ کو اڈیالہ جیل سے دوسری جیل میں منتقل کردیا گیا ہے، انہیں گزشتہ روز راولپنڈی سے گرفتار کیا گیا تھا۔

    اے آر وائی نیوز کی رپورٹ کے مطابق پی ٹی آئی پنجاب کی چیف آرگنائزر عالیہ حمزہ کو اڈیالا جیل سے ڈسٹرکٹ جیل جہلم روانہ کردیا گیا ہے۔

    عالیہ حمزہ اور پی ٹی آئی کے دیگر گرفتار کارکنان کے خلاف تھانہ ائیرپورٹ اسلام آباد میں مقدمہ درج کیا گیا تھا۔

    پی ٹی آئی رہنما عالیہ حمزہ کو آج اسلام آباد کی مقامی عدالت میں پیش کیا گیا جس کے بعد عدالت سے 14روز کیلئے جوڈیشل ریمانڈ پر اڈیالہ جیل بھیج دیا گیا تھا۔

    رپورٹ کے مطابق اڈیالہ جیل میں قیدیوں کیلیے جگہ نہ ہونے کے باعث عالیہ حمزہ کو وہاں سے جہلم جیل منتقل کیا گیا ہے۔

    مزید پڑھیں : عالیہ حمزہ اور کارکنان کیخلاف مقدمہ درج

    واضح رہے کہ راولپنڈی کے علاقے ڈھوک کمال دین میں احتجاج کرنے پر رہنما پاکستان تحریک انصاف (پی ٹی آئی) عالیہ حمزہ اور کارکنان کے خلاف مقدمہ درج کیا گیا تھا۔

    عالیہ حمزہ اور کارکنان کے خلاف مقدمہ کار سرکار میں مداخلت اور روڈ بلاک کرنے کی دفعات کے تحت تھانہ ایئرپورٹ پولیس نے درج کیا۔ ایف آئی آر کے مطابق ملزمان نے سڑک بلاک کر کے احتجاج اور پولیس پر پتھراؤ بھی کیا۔

     

  • عالیہ حمزہ پی ٹی آئی پنجاب کی چیف آرگنائزر مقرر

    عالیہ حمزہ پی ٹی آئی پنجاب کی چیف آرگنائزر مقرر

    لاہور : پاکستان تحریک انصاف (پی ٹی آئی) نے سینیئر پارٹی رہنما عالیہ حمزہ کو پنجاب کا چیف آرگنائزر مقرر کردیا۔

    بانی پی ٹی آئی کی ہدایت پر چیئرمین تحریک انصاف بیرسٹر گوہر نے ان کی بحیثیت چیف آرگنائزر پنجاب کی تقرری کا نوٹیفکیشن جاری کردیا ہے۔

    واضح رہے کہ عالیہ حمزہ کا شمار پی ٹی آئی کے نظریاتی رہنماؤں میں ہوتا ہے۔ 9 مئی 2023 کے واقعات میں ملوث ہونے پر وہ ایک سال سے زیادہ عرصہ تک جیل میں قید رہی ہیں۔

    یاد رہے کہ اس سے قبل گزشتہ روز وزیراعلیٰ خیبرپختونخوا علی امین گنڈاپور سے صدر پی ٹی آئی کے پی کا عہدہ واپس لے کر ان کی جگہ جنید اکبر کو صدر مقرر کیا گیا ہے۔

    مبصرین کا کہنا ہے کہ پی ٹی آئی کی تشکیل نو کا یہ عمل جاری رہے گا اور اہم عہدوں پر مزید تبدیلیاں دیکھنے کو ملیں گی۔

    مزید پڑھیں : عالیہ حمزہ کی 9 مئی کے مقدمات میں ضمانت منظور

    گزشتہ سال اگست میں فیصل آباد کی انسداد دہشت گردی عدالت (اے ٹی سی) نے پاکستان تحریک انصاف (پی ٹی آئی) کی رہنما عالیہ حمزہ کی 9 مئی کے مقدمات میں عبوری ضمانت منظور کرلی تھی۔

    عدالت میں میڈیا سے مختصر گفتگو میں پی ٹی آئی رہنما کا کہنا تھا کہ ہم تمام مقدمات کا سامنا کریں گے، جلسے کیلیے پُرجوش تھے مگر بانی کے حکم پر پیچھے ہٹ گئے۔

    مزید پڑھیں : حماد اظہر، عالیہ حمزہ و دیگر کیخلاف مقدمہ درج

    بعد ازاں پی ٹی آئی کے لاہور جلسے میں شرکت پر 9 مئی مقدمات میں اشتہاری قرار دیے جانے والے تحریک انصاف کے رہنما حماد اظہر کے علاوہ عالیہ حمزہ ودیگر کے خلاف مقدمہ درج کیا گیا تھا مذکورہ مقدمے میں 30 سے 40 نامعلوم پی ٹی آئی کارکنان کو بھی نامزد کیا گیا تھا۔

  • نفسیاتی خاتون بغض عمران میں مبتلا ہے، عالیہ حمزہ

    نفسیاتی خاتون بغض عمران میں مبتلا ہے، عالیہ حمزہ

    لاہور : پاکستان تحریک انصاف کے رہنماؤں نے ن لیگ کی چیف آرگنائزر مریم نواز کی جانب سے عمران خان پر لگائے جانے والے الزامات کے جواب میں شدید ردعمل کا اظہار کرتے ہوئے انہیں نفسیاتی خاتون قرار دیا ہے۔

    اس حوالے سے پی ٹی آئی کی خاتون رہنما عالیہ حمزہ نے اپنے بیان میں کہا ہے کہ یہ نفسیاتی خاتون بغض عمران میں مبتلا ہے جو منہ پر پلاسٹر لگانے کیلئے ہر تھوڑے عرصے بعد سرجری کراتی ہے، وہ عمران خان کو پلاسٹر کا طعنہ دے رہی ہے۔

    عالیہ حمزہ کا کہنا تھا کہ کلیجہ چبانے والی عورت نے اپنی گندی زبان سے آج ثابت کردیا کہ وہ عورتوں کی کردارکشی کرنے والے بھگوڑے شخص کی بیٹی ہے۔

    انہوں نے کہا کہ اس بار ہم حکومت میں آکر پناہ گاہوں کے ساتھ پاگل خانے بھی کھولیں گے، وہاں مریم جھوٹی جیسے نفسیاتی مریضوں کا مفت علاج کیا جائے گا، ہمارے لیڈر کو چھوڑیں، آپ اور آپ کی کنیزوں کیلئے میں اکیلی ہی کافی ہوں۔

    مریم نواز کے خطاب پر پاکستان تحریک انصاف کے رہنما فرخ حبیب نے اپنے ردعمل میں کہا کہ کوئی رہ تو نہیں گیا جس نے ہٹے کٹے نوازشریف کو مرنے کی اداکاری کرتے نہیں دیکھا؟

    انہوں نے کہا کہ کوئی رہ تو نہیں گیا جس نے پلیٹ لیٹس کٹی ہوئی پتنگ کی طرح گرتے نہیں دیکھے، کوئی رہ تو نہیں گیا جس نے نوازشریف کو علاج کے بہانے یہاں سے بھاگتے نہیں دیکھا۔

    مزید پڑھیں : عالیہ حمزہ نے مریم نواز کو ’بی اے فیل‘ کہہ دیا

    فرخ حبیب کا کہنا تھا کہ بگڑی دختر جس شہر کا رخ کرتی ہے عوام اس سے حقارت اور بیزاری کا بھرپور اظہار کرتے ہیں، خرافات کی تشہیر پر لگا کر مشکل سے کھڑے کیے گئے سرکاری ٹی وی کو پھر تباہ کردیا گیا ہے۔

    مزید پڑھیں : پولیس جب زمان پارک پہنچی تو عمران خان چارپائی کے نیچے چھپ گیا، مریم نواز

    یاد رہے کہ مسلم لیگ نون کی سینئر نائب صدر مریم نواز نے شیخوپورہ میں ورکرز کنونشن سے خطاب کرتے ہوئے عمران خان کو مخاطب کرتے ہوئے کہا تھا کہ قوم تم سے پوچھتی ہے چوری نہیں کی تو تلاشی کیوں نہیں دیتے؟ صرف چوریاں نہیں چھپائی، تم نے اپنی بیٹی بھی چھپائی، جب زمان پارک پولیس پہنچی تو عمران خان چارپائی کے نیچے چھپ گیا اور جب تک پولیس واپس نہیں گئی چارپائی کے نیچے ہی رہا۔

  • عالیہ حمزہ نے مریم نواز کو مناظرے کا چیلنج دے دیا

    عالیہ حمزہ نے مریم نواز کو مناظرے کا چیلنج دے دیا

    لاہور : پی ٹی آئی کی رہنما عالیہ حمزہ نے مسلم لیگ ن کی چیف آرگنائزر مریم نواز کو مناظرے کا چیلنج دے دیا، ان کا کہنا ہے کہ جھوٹ، مکاری اور بےشرمی تو ویسے اس ٹبر کے ڈی این اے میں ہے۔

    اپنے ایک بیان میں ان کا کہنا ہے کہ مریم نواز کو میری طرف سے کھلاچیلنج ہے کہ اپنی مرضی کے چینل یا اینکر کے کسی بھی پروگرام میں مناظرہ کرلیں۔

    عالیہ حمزہ نے کہا کہ جھوٹوں کی نانی کا ایک ایک جھوٹ آج ایکسپوز کررہی ہوں، نو رکنی بینچ گورنر، الیکشن کمیشن میں تاریخ نہ دینے کا کیس سن رہا ہے۔

    انہوں نے کہا کہ ن لیگ کو کیوں ایسا لگ رہا ہے کہ کیس ان کے خلاف ہے، اس کا مطلب ہے کہ الیکشن کمیشن، گورنر آپ کی ایماء پر آئین شکنی کررہے ہیں۔ پی ٹی آئی کی رہنما کا اپنے بیان میں کہنا تھا کہ الیکشن کمیشن اور گورنر کے ساتھ ن لیگ پر بھی آرٹیکل چھ لگنا چاہیے۔

    عالیہ حمزہ نے مزید کہا کہ جسٹس مظاہر نقوی نے نوازشریف کے خلاف آج تک کوئی فیصلہ نہیں کیا، پانامہ کیس پر پارلیمانی تحقیقات کا راستہ مسلم لیگ ن نے ہی روکا تھا۔

    عمران خان ناکام ہوئے تو دو ججوں نے بچانے کا بیڑہ اٹھالیا، مریم نواز

    واضح رہے کہ گزشتہ روز سرگودھا میں ورکرز کنونشن سے خطاب کرتے ہوئے مریم نواز نے سابق وزیراعظم اور ان کی اہلیہ بشریٰ بی بی کو مخاطب کرتے ہوئے کہا تھا کہ چار سال دونوں میاں بیوی پیسہ بناتے، لوٹتے رہے اوربیچتے رہے یہ صرف ہاتھ نہیں ، سر سے پیر تک چوریوں اور ڈاکے سے رنگا ہوا ہے۔

  • "بڑے بڑے ان پڑھ دیکھے مریم نواز جیسا نہیں دیکھا”

    "بڑے بڑے ان پڑھ دیکھے مریم نواز جیسا نہیں دیکھا”

    مسلم لیگ ن کی سینئر نائب صدر اور چیف آرگنائزر مریم نواز کے بیان پر پی ٹی آئی کی خواتین رہنماؤں نے اپنے شدید درعمل کا اظہار کیا ہے۔

    رہنما تحریک انصاف عالیہ حمزہ نے کہا ہے کہ بڑے بڑے ان پڑھ دیکھے، مریم نواز سے کم علم کوئی نہ دیکھا، مریم نواز کے پاس کوئی بیانیہ نہیں، مظلوم بننے کا ڈرامہ رچا رہی ہے۔ انہوں نے کہا کہ عوام اب کرپٹ لیگ اور بھگوڑوں کی باتوں میں آنے والےنہیں، مریم نواز کی ناکام لانچنگ پر جگ ہنسائی ہو رہی ہے۔

    پی ٹی آئی رہنما ملیکہ بخاری کا کہنا تھا کہ مریم نواز نااہل سابق مجرمہ ہے، مریم نواز نے نیب ترامیم پاس کروا کر عدالت سے این آر او ٹو حاصل کیا۔

    انہوں نے کہا کہ مریم نواز کو والد کی جھوٹی تیمارداری کیلئے ضمامت نہیں ملنی چاہئے تھی، مریم نیب پرحملہ آور ہوئی، وہ عدالتوں اور ججز کیخلاف منظم مہم چلانے میں پیش پیش رہی۔

    ملیکہ بخاری کا کہنا تھا کہ مریم نواز پر ان تمام معاملات پر توہین عدالت لگنی چاہئے کیونکہ اس کی گفتگو توہین عدالت کے زمرے میں آتی ہے،۔

    رہنما پی ٹی آئی نے مزید کہا کہ کیا مریم نواز قانون اور آئین سےبالاترہے؟ عدلیہ سے مؤدبانہ استدعا ہے کہ مریم نواز کے ان بیانات کا نوٹس لیا جائے۔

  • خاتون اول کے خلاف میڈیا پروپیگنڈا، عالیہ حمزہ کی پیمرا میں درخواست جمع

    خاتون اول کے خلاف میڈیا پروپیگنڈا، عالیہ حمزہ کی پیمرا میں درخواست جمع

    لاہور : تحریک انصاف کی رہنما عالیہ حمزہ نے خاتون اول  بشریٰ بی بی کے خلاف میڈیا پروپیگنڈے سے متعلق پیمرا میں درخواست جمع کرادی۔

    تفصیلات کے مطابق خاتون اول کے خلاف میڈیا پروپیگنڈے متعلق تحریک انصاف کی رہنما عالیہ حمزہ نے پیمرا میں درخواست جمع کرادی۔

    درخواست میں کہا گیا کہ میڈیا اور سوشل میڈیا پر خاتون اول کی تضحیک دیکھ کر افسوس ہوا، پاکستانی میڈیا کا پروپیگنڈا بھارتی ٹی وی چینلزنےبھی بریکنگ نیوزبناکر چلایا۔

    عالیہ حمزہ نے استدعا کی کہ نجم سیٹھی اور ان کے اخبار سے وضاحت لی جائے۔

    دوسری جانب وزیراعظم عمران خان، خاتون اول، حکومتی شخصیات اور اداروں کے خلاف سوشل میڈیا پر پروپیگنڈا والے افراد کے خلاف ایف آئی اے نے کارروائیاں تیز کر دیں۔

    انٹیلی جنس بیورو نے وزیر اعظم سیکرٹریٹ کی ہدایت پر پراپیگنڈا کرنے والوں کی لسٹیں تیار کر کے سائبر کرائم کو بھیج دیں ہیں۔

    ایف آئی اے سائبر کرائم ونگ کو 270 سوشل میڈیا صارفین کی لسٹیں فراہم کی گئیں، جن پر کارروائیوں کا آغاز کر دیا ہے۔

  • وزیر اعظم عمران خان کی بہترین پالیسوں سے ملکی معیشت میں بہتری

    وزیر اعظم عمران خان کی بہترین پالیسوں سے ملکی معیشت میں بہتری

    اسلام آباد: پارلیمانی سیکریٹری برائے صنعت و تجارت عالیہ حمزہ کا کہنا ہے کہ وزیر اعظم عمران خان کی بہترین پالیسوں سے ملکی معیشت میں بہتری آئی، وزیر اعظم نے پہلے پاکستان کو دیوالیہ ہونے سے بچایا۔

    تفصیلات کے مطابق پارلیمانی سیکریٹری برائے صنعت و تجارت عالیہ حمزہ نے رواں مالی سال کے 6 ماہ کے معاشی اعشاریوں کی تفصیلات جاری کر دیں۔

    عالیہ حمزہ کا کہنا تھا کہ پاکستان میں کرونا وائرس کے باوجود ڈیٹ ٹو جی ڈی پی کم ہو رہا ہے، گزشتہ سال کی نسبت رواں سال ایکسپورٹ گڈز میں 29 فیصد اضافہ ہوا اور پہلے 6 ماہ میں ایکسپورٹ گڈز 15.24 ارب ڈالر تک پہنچ گئے۔

    انہوں نے کہا کہ گزشتہ سال ایکسپورٹ گڈز 11.82 ارب ڈالر رہی تھیں۔ ملبوسات برآمدات میں پاکستان نے بھارت اور بنگلہ دیش کو پیچھے چھوڑ دیا۔ امریکا کو ملبوسات برآمدات میں پاکستان 69 فیصد پر رہا جبکہ بھارت 33 فیصد اور بنگلہ دیش 28 فیصد پر رہا۔

    پارلیمانی سیکریٹری کا کہنا تھا کہ یورپی ممالک کو ملبوسات برآمدات میں پاکستان 27 فیصد پر رہا۔

    انہوں نے کہا کہ رواں سال پہلے 6 مہینوں میں ترسیلات زر میں 11 فیصداضافہ ہوا۔ رواں سال ترسیلات زر 15.8 ارب ڈالر رہیں جبکہ گزشتہ سال یہ 14.2 ارب ڈالر تھیں۔

    عالیہ حمزہ نے بتایا کہ رواں سال ٹیکسٹائل ایکسپورٹ میں 26 فیصد اضافہ ہوا اور 9.38 ارب ڈالر کی ایکسپورٹ ہوئیں۔ رواں سال کے 6 ماہ میں آئی ٹی ایکسپورٹ 1.3 ارب ڈالر رہیں جبکہ گزشتہ برس یہ 959 ملین ڈالر کی تھیں۔

    انہوں نے کہا کہ پاکستان میں کاروں کی فروخت میں 71 فیصد اضافہ ہوا، بہترین پالیسی کی وجہ سے ٹریکٹرز کی سیلز میں 21 فیصد اضافہ ہوا۔

    پارلیمانی سیکریٹری کا کہنا تھا کہ رواں سال ایف بی آر ریونیو میں 32 فیصد، زر مبادلہ کے ذخائر میں 32 فیصد، ڈومیسٹک سیمنٹ کی سیلز میں 2.8 فیصد، فرٹیلائزر یوریا کی سیلز میں 5 فیصد اور پیٹرولیم سیلز میں 17 فیصد اضافہ ہوا۔

    انہوں نے مزید بتایا کہ رواں سال کاٹن کی کاشت میں 37 فیصد، بجلی کی کھپت کے باعث رواں سال بجلی کی پیداوار میں 9.3 فیصد، پرائیوٹ سیکٹر کی کریڈٹ ادائیگی میں 344 فیصد، زرعی سیکٹر کی کریڈٹ ادائیگی میں 4 فیصد اور فارن ڈائریکٹ انویسمنٹ میں 20 فیصد اضافہ ہوا۔

    عالیہ حمزہ کا کہنا تھا کہ وزیر اعظم کی بہترین پالیسوں سے ملکی معیشت میں بہتری آئی، وزیر اعظم عمران خان نے پہلے پاکستان کو دیوالیہ ہونے سے بچایا۔ ان کی بہترین پلاننگ سے کووڈ بحران سے بخوبی نمٹا گیا۔