اسلام آباد : وفاقی حکومت نے ماہ رمضان کی آمد پر عوام کیلئے ریلیف پیکج دینے کا فیصلہ کیا ہے، ذرائع کا کہنا ہےکہ یوٹیلیٹی اسٹورز پر مختلف اشیائے خورد و نوش سستے داموں فروخت کی جائیں گی۔
اس حوالے سے ذرائع وزارت صنعت وپیداوار کا کہنا ہے کہ ماہ رمضان کے لیے مجموعی طور پر 19اشیائے ضروریہ پر سبسڈی دی جائے گی۔ اس سہولت سے بی آئی ایس پی کے رجسٹرڈ مستحقین مستفید ہوں گے۔
یوٹیلیٹی اسٹورز پر رمضان ریلیف پیکج 2023کی تفصیلات کے حوالے سے ذرائع کا کہنا ہے کہ گزشتہ سال کے مقابلے رواں سال رمضان پیکچ میں 3 ارب 28 کروڑ روپے کی کمی تجویز دی گئی ہے۔
ذرائع کے مطابق اس سال یوٹیلیٹی اسٹورز پر 4 ارب 99 کروڑ 70 لاکھ روپے کارمضان پیکج تجویز کیا گیا ہے۔ گزشتہ سال پی ٹی آئی حکومت نے8 ارب28کروڑ روپے کا رمضان پیکج منظور کیا تھا۔
رمضان ریلیف پیکچ کے تحت بی آئی ایس پی مستحقین کیلئے گھی، چائے پر فی کلو 100،100روپے، آٹے پر فی کلو 51 روپے 92 پیسے، چینی، دودھ اور مشروبات پر 30،30روپے، بیسن اور کھجور پر فی کلو 50 اور آئل پر 25 روپے کی سبسڈی کی تجویز دی گئی ہے۔
اس کے علاوہ دالوں اور چاول پر فی کلو 20،20روپے اور بی آئی ایس پی مستحقین کے سوا باقی تمام شہریوں کیلئے آٹے پر فی کلو 27روپے12 پیسے، چینی 11 اور گھی پر فی کلو 25 روپے کی سبسڈی دینے کی تجویز ہے۔
واضح رہے کہ مہنگائی کے باعث عوام بالخصوص نچلے طبقے کو ریلیف فراہم کرنے کے لیے حکومت نے سبسڈی کا فیصلہ کیا ہے۔رمضان ریلیف پیکج کی ای سی سی اور وفاقی کابینہ سے منظوری لی جائے گی۔
