اسلام آباد : پاکستان علماء کونسل کے سربراہ علامہ طاہر اشرفی نے کہا ہے کہ دنیا میں سب سے سفاک ملک اسرائیل ہے۔
اسلام آباد میں پریس کانفرنس سے خطاب کرتے ہوئے علامہ طاہر اشرفی نے کہا کہ اسرائیل اور بھارت انسانی حقوق کی شدید خلاف ورزیاں کررہے ہیں.
انہوں نے کہا کہ اسرائیل کا پاکستان کیخلاف پروپیگنڈا قابل قبول نہیں، اس وقت اسرائیل دنیا بھر میں سب سے زیادہ سفاک ملک ہے۔
علماء کونسل کے سربراہ کا کہنا تھا کہ سننے میں آیا ہے کہ سوئیڈن میں مقدس کتابوں کو جلانے کی باقاعدہ قانونی اجازت طلب کی جارہی ہے۔
انہوں نے واضح کیا کہ اسرائیل ہو یا بھارت کسی کو بھی ہماری داخلی حدود میں مداخلت کی اجازت نہیں دی جاسکتی، علماء کرام کی ریڈلائن دین، حضورﷺکی ناموس، وطن اور پاک فوج ہے۔
علامہ طاہراشرفی نے کہا کہ محرم الحرام کے حوالے سے علماء کونسل کا متفقہ ضابطہ اخلاق تمام مکاتب فکر سے مشاورت کے بعد جاری کیا جائے گا۔ امید ہے کہ تمام مکاتب فکر کےعلماء، مشائخ اور ذاکرین اس پرمکمل عمل درآمد کریں گے۔
انہوں نے کہا کہ فرقہ ورانہ تصادم اور طاقت کے زور پر دوسروں پر دباؤ ڈالنا صریحاً شریعت کے خلاف ہے، تمام مکاتب فکر کے علماء کرام شرپسندی اور انتہا پسندانہ سوچ کی مذمت کرتے ہیں۔
علامہ طاہراشرفی کا کہنا تھا کہ اپنے نظریات کو جبری مسلط کرنا شریعت کے مطابق حرام ہے، مسلح طاقت کا استعمال کرنا قرآن وسنت کے مطابق درست نہیں، کسی کو کافر قراردینا قرآن وسنت کی تعلیمات کی روشنی میں صرف ریاست کا اختیار ہے۔
