کراچی: ڈاکٹر فاروق ستار اور میئر کراچی کی موجودگی کے باوجود ایم کیوایم پاکستان کی ریلی میں بانی متحدہ کے گانے اور نعرے لگنے کے بعد بدمزگی اور مارپیٹ ہوئی۔
تفصیلات کے مطابق ایم کیوایم پاکستان نےکراچی میں میئرکے حقوق کے لیےریلی نکالی، جس میں سربراہ ایم کیو ایم ڈاکٹرفاروق ستار سمیت پوری قیادت اور وسیم اختر بھی ریلی میں پیش پیش تھے۔
ویڈیو دیکھیں
ریلی مقررہ راستوں پر ہوتے ہوئے نمائش کی جانب رواں دواں تھی تو لیاقت آباد کے مقام پر کچھ لوگوں نے بانی ایم کیو ایم کے حق میں نعرے لگانے شروع کردیے جس پر مقامی قیادت نے کوئی اعتراض نہیں کیا۔
دوسری جانب مرکزی ٹرک کے ساتھ چلنے والی گاڑی میں جیسے ہی متحدہ کا معروف ترانہ بجایا گیا تو مشتعل افراد نے دو لڑکوں پر تشدد کیا اور گانا تبدیل کروادیا، جنید نامی شخص کا کہنا ہے کہ ‘‘ایم کیو ایم قائد کے حق میں نعرے لگانے پر مجھے اور بھائی کو تشدد کا نشانہ بنایا گیا‘‘۔
یاد رہے 22 اگست کو ہونے والی ملک مخالف تقریر کے بعد ڈاکٹر فاروق اور اُن کے رفقاء نے باہمی مشاورت کے بعد بانی ایم کیو ایم اور لندن قیادت سے علیحدگی کا اعلان کیا تھا اور اُن کے خلاف اسمبلیوں میں پیش ہونے والی قرار داد کی حمایت کی تھی۔
بعدازاں ایم کیو ایم پاکستان کی قیادت نے پارٹی پرچم سے بانی ایم کیو ایم کا نام ہٹایا اور پارٹی آئین میں ترمیم کرتے ہوئے ویٹو پاور واپس لے لی تھی، ساتھ ہی پاکستان قیادت نے لندن میں مقیم ڈپٹی کنونیر اور پوری رابطہ کمیٹی کی تنظیمی رکنیت ختم کرنے کا اعلان کیا تھا۔
واضح رہے ایم کیوایم پاکستان نے گزشتہ برس نشتر پارک میں جلسہ منعقد کیا تھا جس میں بانی ایم کیو ایم کے حق میں گانا چلایا گیا تھا اور نعرے بھی بلند کیے گئے تھے جس کے بعد مقامی رہنماؤں کو کڑے سوالات کا سامنا کرنا پڑا تھا۔
