ARYNews.tv | Urdu – Har Lamha Bakhabar

Tag: ambulance

  • شاہرگ دھماکا، شہدا کی میتیں لے جانے والی ایمبولینسوں میں فیول ختم ہونے کا انکشاف

    شاہرگ دھماکا، شہدا کی میتیں لے جانے والی ایمبولینسوں میں فیول ختم ہونے کا انکشاف

    کوئٹہ: بلوچستان کے ضلع ہرنائی کے علاقے شاہرگ میں کوئلے کے کان کنوں پر ہونے والے دھماکے کے شہدا کی میتیں شانگلہ لے جانے والی ایمبولینسوں میں راستے ہی میں فیول ختم ہونے کا انکشاف ہوا ہے۔

    حکام کے مطابق جمعہ کو شاہرگ میں کوئلے کے کان کنوں کو لے جانے والی وین کو نشانہ بنانے والے دھماکے میں 11 کان کن جاں بحق ہوئے ہیں، جن کی میتیں شانگلہ لے جاتے ہوئے ایمبولینسوں میں پیٹرول ختم ہو گیا تھا۔

    ذرائع کا کہنا ہے کہ 10 میں سے 4 ایمبولینسیں شانگلہ میں فیول ختم ہونے پر رک گئی تھیں، جو ضلع قلعہ سیف اللہ انتظامیہ کی تھیں، قلعہ سیف اللہ انتظامیہ نے فیولنگ اخراجات دیے بغیر ایمبولینسیں روانہ کرائی تھیں۔

    فیول ختم ہونے پر شانگلہ میں ڈرائیوروں نے اپنے شناختی کارڈ رکھوا کر ایمبولینسوں میں کچھ تیل ڈلوایا، اور پھر میتیں پہنچانے کے بعد چاروں ایمبولینسیں 6 گھنٹے شانگلہ میں پٹرول پمپ پر کھڑی رہیں۔

    مال گاڑی اور آئل ٹینکر سے ٹکرانے والے ٹرالر کا ڈرائیور گرفتار نہ ہو سکا

    اطلاع ملنے پر شانگلہ کے رکن صوبائی اسمبلی عباد اللہ کے بھائی موقع پر پہنچے اور انھوں نے فیولنگ کرائی جس کے بعد ایمبولینسیں واپس روانہ ہو گئیں، ذرائع کا کہنا ہے کہ انتظامی لاپرواہی کے باعث ایمبولینس ڈرائیوروں کو شدید پریشانی کا سامنا کرنا پڑا۔

  • ایمبولینس کو راستہ نہ دینا ٹریفک قوانین کی خلاف ورزی

    ایمبولینس کو راستہ نہ دینا ٹریفک قوانین کی خلاف ورزی

    ریاض: سعودی ہلال احمر اور حکام کا کہنا ہے کہ سڑک پر ایمبولینس کو راستہ نہ دینا ٹریفک قوانین کی خلاف ورزی ہے، ایمبولینس کو ترجیحی بنیاد پر گزرنے کا موقع دینا ضروری ہے۔

    اردو نیوز کے مطابق سعودی ہلال احمر اور محکمہ ٹریفک کا کہنا ہے کہ ایمبولینسوں کو راستہ نہ دینا ٹریفک خلاف ورزی ہے، اتوار 26 مارچ سے خود کار نظام کے تحت خلاف ورزی ریکارڈ کرنا شروع کردی گئی ہے۔

    ہلال احمر کا کہنا ہے کہ نئی پابندی ٹریفک سلامتی کو یقینی بنانے اور جانوں کے تحفظ کی خاطر لگائی گئی ہے۔

    ادارے کی جانب سے کہا گیا کہ رائے عامہ سے اپیل کی جا چکی ہے کہ ایمبولینس کو ترجیحی بنیاد پر گزرنے کا موقع دیا جائے، ایمبولینس کے پیچھے گاڑیاں نہ دوڑائی جائیں، یہ بھی ٹریفک خلاف ورزی ہے۔

    بیان میں کہا گیا کہ موجودہ مرحلے میں خلاف ورزی خود کار سسٹم کے تحت دو حوالوں سے ریکارڈ ہوگی، ایک تو ایمبولینس کو آگے بڑھنے سے روکا جائے دوسرے یہ کہ ایمبولینس کا تعاقب کیا جائے۔

    ہلال احمر نے بیان میں اس یقین کا اظہار کیا کہ تمام لوگ جانوں کی سلامتی کی خاطر نئی پابندی پر عمل درآمد کو یقینی بنانے میں تعاون کریں گے۔

  • ایمبولینس کے پیچھے دیوانہ وار بھاگتا گھوڑا، ایمبولینس میں کون تھا؟

    ایمبولینس کے پیچھے دیوانہ وار بھاگتا گھوڑا، ایمبولینس میں کون تھا؟

    محبت اور خلوص کا رشتہ صرف انسانوں ہی نہیں بلکہ جانوروں میں بھی پایا جاتا ہے، اور جانوروں میں انسانوں سے کہیں زیادہ خالص ہوتا ہے، ایسے ہی ایک گھوڑے کی محبت نے سوشل میڈیا صارفین کی آنکھیں نم کردیں۔

    سوشل میڈیا پر ایک ویڈیو وائرل ہورہی ہے جس میں ایک گھوڑا دیوانہ وار ایمبولینس کے پیچھے دوڑ رہا ہے، جب اس کی حقیقت صارفین کو پتہ چلی تو وہ دنگ رہ گئے۔

    یہ ویڈیو بھارت کے ضلع ادے پور کی ہے جہاں ایک بیمار گھوڑی کو جب ایمبولینس کے ذریعے اسپتال منتقل کیا جا رہا تھا تو گھوڑا بھی اس کے پیچھے 8 کلومیٹر تک دوڑتا چلا گیا۔

    گھوڑا بیمار گھوڑی کا بھائی ہے، جب اس نے دیکھا کہ اس کی بہن کو ایمبولینس کے ذریعے کہیں منتقل کیا جارہا ہے تو وہ بھی اس کے پیچھے بھاگتا چلا گیا۔

    ایمبولینس کا ڈرائیور بھی گھوڑے کی بیمار گھوڑی کے لیے والہانہ محبت دیکھ کر حیران رہ گیا اور راستے میں ایمبولینس کی رفتار آہستہ رکھی تاکہ وہ بھی ایمبولینس کے پیچھے اسپتال تک پہنچ جائے۔

    سوشل میڈیا صارفین گھوڑے کی محبت دیکھ کر دنگ رہ گئے اور مختلف جذباتی تبصرے کیے۔

  • ڈاکوؤں نے بینک سے نکلنے کے بعد "ایمبولینس” چھین لی، ٹریلر جاری

    ڈاکوؤں نے بینک سے نکلنے کے بعد "ایمبولینس” چھین لی، ٹریلر جاری

    لاس اینجلس : سب سے بڑی بینک ڈکیتی کے بعد مشکل میں پھنسے والے ڈاکو روڈ سے گزرنے والی ایمبولینس بھی چھین کر فرار ہوگئے ۔

    تفصیلات کے مطابق ہالی ووڈ ایکشن فلم’’ ایمبولینس‘‘ کا تہلکہ خیز ٹریلر جاری کردیا گیا ہے، ملٹی اسٹار سنسنی خیز فلم آئندہ برس ریلیز کی جائے گی۔

    ہالی وڈ فلم ایمبولینس کی کہانی ایک بڑی بینک ڈکیتی کے گرد گھومتی ہے، جس میں ایک نوجوان اپنی بیوی کی جان بچانے کے لیے32 ملین ڈالر لوٹنے کا منصوبہ بناتا ہے۔

    بینک ڈکیتی میں ملزمان لاس اینجلس پولیس کے ایک افسر کو گولی مار دیتے ہیں اور ایمبولینس میں مرنے والے افسر کو بطور یرغمال بنا کر بھاگ جاتے ہیں۔

    ایکشن اور مار دھاڑ سے بھرپور فلم ’’ ایمبولینس‘‘ اٹھارہ فروری سال 2022کو سنیما گھروں میں نمائش کے لیے پیش کی جائے گی۔

  • جدہ: مریض ایمبولینس لے کر فرار

    جدہ: مریض ایمبولینس لے کر فرار

    ریاض: سعودی عرب کے شہر جدہ میں ایک مریض ایمبولینس لے کر فرار ہوگیا، ایمبولینس چوری کی ویڈیو سوشل میڈیا پر وائرل ہوگئی۔

    سعودی ویب سائٹ کے مطابق سعودی عرب میں جدہ کے کنگ عبد العزیز اسپتال کا ایک مریض سعودی ہلال احمر کی ایمبولینس چوری کر کے فرار ہوگیا۔

    سی سی ٹی وی کیمروں کی مدد سے چوری کی واردات ریکارڈ ہوگئی، موقع پر موجود لوگوں نے اسے روکنے کی کوشش کی تھی تاہم مریض ایمبولینس لے جانے میں کامیاب ہوگیا۔

    اسپتال کے ایک گارڈ نے بھی ایمبولینس کو لے جانے سے روکنے کی کوشش کی تھی، ویڈیو میں دیکھا جاسکتا ہے کہ گارڈ گاڑی کے نیچے آنے سے بال بال بچ گیا۔

    سعودی ہلال احمر کے ترجمان عبد اللہ ابو زید نے بتایا کہ ہلال احمر کی ایمبولینس کی چوری کا واقعہ سوشل میڈیا پر وائرل ہوگیا، یہ واقعہ اس وقت پیش آیا جب ہلال احمر کی میڈیکل ٹیم نے ایک مریض کو اسپتال منتقل کیا۔

    اسی دوران واردات کرنے والا مریض ایمبولینس پر سوار ہوا اور سکیورٹی گارڈز کی مزاحمت کے باوجود ایمبولینس لے کر فرار ہوگیا۔

    ابو زید نے بتایا کہ مریض نے گیٹ سے نکلنے کے بعد گاڑی اسپتال سے متصل ایک اسٹیشن پر چھوڑ دی تھی، اسٹیشن کی انتظامیہ نے اس کی اطلاع پولیس کو دی جس کے بعد ایمبولینس کو واپس لے جایا گیا۔

  • بھارت: ایمبولینس درخت سے ٹکرا گئی، 3 افراد ہلاک

    بھارت: ایمبولینس درخت سے ٹکرا گئی، 3 افراد ہلاک

    نئی دہلی: بھارت میں ایک ایمبولینس درخت سے ٹکرانے کے باعث 3 افراد ہلاک ہوگئے، ایمبولینس ایک مریض کو اسپتال لے جارہی تھی جو حادثے میں محفوظ رہا۔

    بھارتی میڈیا کے مطابق واقعہ جے پور آگرہ کی قومی شاہراہ پر پیر کی صبح پیش آیا، مریض کو اسپتال لے جانے والی ایمبولینس درخت سے ٹکرا گئی جس سے 3 افراد کی موت ہوگئی۔

    پولیس کا کہنا ہے کہ ایمبولینس آگرہ کے رہائشیوں کو لے کر جارہی تھی، ایمبولینس میں ایک مریض، 2 خواتین اور ڈرائیور سمیت 6 افراد موجود تھے۔

    پولیس کے مطابق 2 افراد موقع پر ہی دم توڑ گئے جبکہ ایک زخمی خاتون کو اسپتال منتقل کیا گیا تاہم وہ بھی دوران علاج دم توڑ گئیں۔ لاشوں اور زخمیوں کو گاڑی سے نکالنے کے لیے سخت جدوجہد کرنی پڑی۔

    ہیڈ کانسٹیبل شری لال کا کہنا ہے کہ مرنے والوں کی شناخت بیم سنگھ ، مہاراج اور گلابو کے نام سے ہوئی ہے، ڈرائیور سمیت 2 افراد اسپتال میں زیر علاج ہیں۔ لاشوں کو بھی پوسٹ مارٹم کے لیے بھیج دیا گیا ہے۔

  • بھارت لاک ڈاؤن : ایمبولینس کے انتظار میں 3 گھنٹوں سے کرسی پر بیٹھا مریض چل بسا

    بھارت لاک ڈاؤن : ایمبولینس کے انتظار میں 3 گھنٹوں سے کرسی پر بیٹھا مریض چل بسا

    پونہ : بھارت میں ایک ضعیف مریض ایمبولینس کے انتظار میں بیٹھا دنیا سے رخصت ہوگیا، جان چلی گئی لیکن ایمبولینس نہ آئی، سوشل میڈیا پر صارفین نے سخت رد عمل کا اظہار کیا ہے۔

    تفصیلات کے مطابق بھارتی ریاست مہاراشٹر کے شہر پونہ میں آج صبح سویرے ایک 54سالہ مریض یسوداس ایم فرانسس لاک ڈاؤن کے دوران ایمبولینس کے انتظار میں سڑک کے کنارے کرسی پر بیٹھا بیٹھا چل بسا۔

    اس حوالے سے اس کے اہل خانہ کا کہنا ہے کہ یہ واقعہ صبح 4 بجے کے قریب پیش آیا تھا ، اس سے قبل رات ایک بجے ان کی طبیعت خراب ہوئی تھی جس کی وجہ سے اہل خانہ نے ایمبولینس طلب کی اور پولیس سے مدد بھی طلب کی۔

    بعدازاں انہوں نے مریض کو گھر کے پاس علاقے کی منوشا مسجد کے قریب سڑک پر کرسی پر بٹھایا اور ایمبولینس کا انتظار کرنے لگے لیکن تین گھنٹے گزر گئے کوئی نہیں آیا۔

    اس دوران پولیس کے کچھ پولیس اہلکار جو معمول کی گشت پر تھے انہیں صورتحال سے آگاہ کیا لیکن ان کے پاس بھی ایمبولینس کی سہولت میسر نہیں تھی۔

    اس موقع پر فراسنسس کی اہلیہ، بہن اور دیگر رشتہ دار بھی اس کے پاس ہی موجود تھے کہ اچانک اس کا سانس اکھڑنے لگا اور تقریباً صبح چار بجے پلاسٹک کی کرسی پر بیٹھے ہوئے فرانسس نے آخری سانس لی اور دنیا سے رخصت ہوگیا۔

    اس واقعے کی ویڈیوز اور تصاویر سوشل میڈیا پر وائرل ہوگئیں، جس پر صارفین نے سخت ردعمل کا اظہار کیا ہے۔

  • چور اندر موجود طبی عملے سمیت ایمبولینس لے اڑا

    چور اندر موجود طبی عملے سمیت ایمبولینس لے اڑا

    واشنگٹن: امریکی دارالحکومت واشنگٹن میں چوری کا انوکھا واقعہ پیش آیا جب چور نے اندر موجود طبی عملے اور مریضہ سمیت ایمبولینس چرانے کی کوشش کی۔

    امریکی ویب سائٹ کے مطابق واشنگٹن کے علاقے لزگنٹن میں ایک خاتون نے ایمبولینس طلب کی، اسے سانس لینے میں تکلیف کی شکایت تھی۔

    ایمبولینس کا پیرا میڈکس خاتون کو ایمبولینس کے اندر لے گیا، خاتون کی ٹریٹمنٹ کے دوران ہی گھر کے ایک فرد نے ایمبولینس میں بیٹھ کر ایمرجنسی لائٹس اور سائرن کھولے اور ایمبولینس دوڑا دی۔

    اندر موجود طبی عملے نے پولیس کو اطلاع دی اور ساتھ ہی خاتون کی ٹریٹمنٹ بھی جاری رکھی۔ بعد ازاں پولیس نے متعدد مقامات پر 80 میل فی گھنٹہ کی رفتار سے جاتی ایمولینس کو روکا لیکن چور نے اسے نہیں روکا۔

    اس دوران ایمبولینس کے تمام ٹائر پھٹ گئے، پولیس نے بالآخر بڑی مشکل سے ملزم کو قابو کیا اور اسے پولیس اسٹیشن لے جایا گیا۔ مذکورہ شخص کو گرفتار کر کے پولیس نے اس پر متعدد الزمات عائد کیے ہیں۔

  • سکھر:‌ ملزمان لاش سمیت سرکاری ایمبولینس لے کر فرار

    سکھر:‌ ملزمان لاش سمیت سرکاری ایمبولینس لے کر فرار

    سکھر: سندھ کے شہر سکھر میں ملزمان لاش سمیت سرکاری ایمبولینس لے کرفرار ہوگئے.

    تفصیلات کے مطابق یہ واقعہ سکھر کی تحصیل پنوعاقل میں پیش آیا، خاتون کو کاری قراردے کر قتل کیا گیا تھا.

    [bs-quote quote=”واقعہ سکھر کی تحصیل پنوعاقل میں پیش آیا، خاتون کو کاری قراردے کر قتل کیا گیا تھا” style=”style-8″ align=”left”][/bs-quote]

    مقتولہ کو شوہر نے قتل کیا تھا،لاش مردہ خانے منتقل کی جارہی تھی، ملزمان نے راستے میں‌ حملہ کر دیا اور ایمبولینس چھین کرفرارہوگئے.

    ڈرائیور نے اپنے بیان میں بتایا ہے کہ ایمبولینس چھیننے والا مقتولہ کا بھائی اورشوہر تھا، جنھوں نے اسلحے کے زور پر یہ واردات کی.

    ایس ایچ اوپنوعاقل کے مطابق ملزمان نے کیس خراب کرنے کے لئے ایسی واردات کی، شک ہے کہ ملزمان نے لاش کو غائب کرنے کے لیے چھینا ہے۔ 

    پولیس نے ناکا بندی کرکے ایمبولینس کی تلاش شروع کر دی ہے، مگر کوئی کامیابی نہیں ہوئی.

  • ہانگ کانگ میں 20لاکھ مظاہرین نے ایمبولینس کو رستہ دیکر انسانیت کی مثال قائم کردی

    ہانگ کانگ میں 20لاکھ مظاہرین نے ایمبولینس کو رستہ دیکر انسانیت کی مثال قائم کردی

    ہانگ کانگ : ملزمان کی حوالگی سے متعلق بل کے خلاف احتجاج کرنے والے 20 لاکھ مظاہرین نے سائرن کی آواز سن کر چند سیکنڈ میں ایمبولینس کو راستہ دے کر انسانیت کی مثال قائم کردی۔

    تفصیلات کے مطابق ہانگ کانگ میں ملزمان کی حوالگی سے متعلق پیش کیے جانے والے بل کے خلاف گزشتہ کئی روز سے عوامی احتجاجی جاری تھا میں لاکھوں مظاہرین نے پارلیمنٹ جانے والے تمام راستوں کو بند کردیا گیا تھا تاہم مظاہرین نے ایمبولینس کو رستہ دے کر عظیم قوم ہونے کا ثبوت پیش کردیا۔

    غیر ملکی خبر رساں ادارے کا کہنا تھا کہ ہانگ کانگ میں ہونے والا احتجاج شروع سے ہی عالمی میڈیا کی زینت بنا ہوا ہے لیکن گزشتہ دنوں سوشل میڈیا پر ایک ویڈیو وائرل ہوئی جس نے ہانگ کانگ کے شہریوں کو ضرب مثل بنا دیا۔

    سوشل میڈیا پر دو روز قبل ایک ویڈیو بے تحاشا وائرل ہورہی ہے جس میں دیکھا جاسکتا ہے کہ 20 لاکھ مظاہرین کے درمیان سے ایک ایمبولینس بڑی آرام سے چند سیکنڈ میں گزر گئی اور کسی نے کوئی مزاحمت نہیں کی نہ ایمبولینس کو روکا۔

    سوشل میڈیا پر وائرل ہونے والی ویڈیو میں دیکھا جاسکتا ہے کہ 20 لاکھ مظاہرین نے احتجاج کے دوران سائرن کی آواز سنتے ہی خود باخود ایمبولینس کے لیے راستہ صاف کرکے انسانیت اور نظم و ضبط کی اعلیٰ مثال قائم کردی۔

    ویڈیو میں دیکھا جاسکتا ہے کہ ہانگ کانگ کے شہری ایمبولینس گزرنے کے بعد دوبارہ احتجاج میں مصروف ہوگئے۔

    خیال رہے کہ ہانگ کانگ کی سڑکوں پر 12 جون سے شروع ہونے والے مظاہروں کے دوران ایک شخص ہلاک اور متعدد زخمی ہوئے تھے۔

    مظاہرین کی جانب سے مطالبہ کیا گیا تھا کہ چیف ایگزیکٹو کیری لام اپنے عہدے سے استعفیٰ دیں۔ عام کے شدید احتجاج کے بعد کیرم لام نے مجرمان کی حوالگی سے متعلق بل پر بحث منسوخ کردی۔