اسلام آباد : وزیر مملکت برائے اطلاعات مریم اورنگزیب نے کہا ہے کہ میر قطر کو گھوڑا تحفے میں نہیں دیا گیا، کچھ ماہ پہلے امیر قطر کو دورہ پاکستان پر گھوڑا تحفے میں دیا جانا تھا جو نہیں دیا گیا.

تفصیلات کے مطابق قطری شاہی خاندان کو حکومت پاکستان کی جانب سے نایاب نسل کے گھوڑے کا تحفہ گیا یا نہیں، زیر گردش مبینہ خط کی میڈیا میں بازگشت سنائی دی، گھوڑا بھجوانے کے لئے مبینہ قطری حکومت کو لکھا گیا خط منظر عام پر آیا، جس میں گھوڑا بھیجنے کے لیے خصوصی طیارہ طلب کیا گیا تھا۔

خط میں سی ون تھرٹی کی کلیئرنس مانگی گئی تھی۔ بعد ازاں پاک فضائیہ نے اپنے طیارے کے استعمال کی تردید کردی۔ اس سے قبل امیر قطر کو نایاب نسل کا گھوڑا تحفہ میں دینے کا فیصلہ ہوا تھا، جس کا سرکاری ٹی وی نے بھی اعتراف کیا، امیر قطر کو گھوڑا بھیجنے کے لیے طیارہ طلب کرنے کے مبینہ خط کی حکومت نے سختی سے تردید کردی ہے۔

مریم اورنگزیب کا کہنا ہے کہ کچھ ماہ قبل امیر قطر کے دورہ پاکستان کے موقع پر خصوصی گھوڑا تحفے میں دیا جانا تھا، تاہم ان کے دورہ نہ کرنے کی وجہ سے یہ تحفہ نہیں دیا گیا۔

مزید پڑھیں: وزیراعظم کا قطری خاندان کیلیے خصوصی گھوڑے کا تحفہ

دوسری جانب پاک فضائیہ نےسی ون تھرٹی سے گھوڑا ایئرلفٹ کرنے کی اطلاعات مسترد کردیں ہیں، پاک فضائیہ ترجمان نے واضح کیا ہے کہ سی ون تھرٹی کے ذریعے قطر گھوڑا بھیجنے سے متعلق اطلاعات بے بنیاد ہیں، پاک فضائیہ اس حوالے سےخبر کو مسترد کرتی ہے۔