دوحہ : افغان طالبان اور امریکا کے درمیان تاریخی امن معاہدے کے اہم نکات سامنے آگئے، اس معاہدے کے بعد افغانستان سے امریکی فورسز کے انخلا کا عمل شروع ہوجائے گا۔
تفصیلات کے مطابق امریکا افغان طالبان تاریخی امن معاہدے سے متعلق مشترکہ اعلامیہ جاری کردیا گیا، امن معاہدہ4نکات پر مشتمل ہے، معاہدے کے مطابق امریکا14ماہ میں افغانستان سے تمام فوجی واپس بلالے گا، افغان سرزمین امریکا اوراتحادیوں پر حملے کے لیے استعمال نہیں ہوگی۔
مشترکہ اعلامیے کے مطابق امریکا افغانستان کی علاقائی سالمیت کیخلاف طاقت کے استعمال سے بھی باز رہے گا، امریکا معاہدے کے135دن کے اندر فوجیوں کی تعداد8600تک لائے گا۔
امریکا اور افغانستان امن معاہدے پر مل کر کام کرنے کے لیے پرعزم ہیں، منصوبہ طالبان کی جانب سےامن معاہدے کی پاسداری سے مشروط ہوگا، انٹر افغان مذاکرات طالبان اور افغان حکام کے درمیان ہوں گے۔
یاد رہے کہ دوحہ میں افغان طالبان اور امریکہ کے درمیان ہونے والے مذاکرات اپنے اختتام کو پہنچ گئے، فریقین نے معاہدے پر دستخط کردیے، جس کے بعد افغانستان میں قیام امن کی راہ ہموار ہوجائے گی۔
معاہدے کے بعد افغانستان میں19سال کی طویل جنگ کا خاتمہ ہوسکے گا، امن معاہدے کے بعد افغانستان سے امریکی فورسز کےانخلا کا عمل شروع ہوگا۔
ذرائع کے مطابق معاہدےکی تقریب میں50ممالک کے وزرائے خارجہ نے شرکت کی، پاکستان سے وزیر خارجہ شاہ محمود قریشی نمائندگی کررہے تھے۔
معاہدے کے نکات میں مزید کہا گیا ہے کہ امریکا افغانستان کی علاقائی سالمیت کیخلاف طاقت کے استعمال سے باز رہے گا اورافغانستان کے اندرونی معاملات میں مداخلت نہیں کرے گا۔
