ARYNews.tv | Urdu – Har Lamha Bakhabar

Tag: america

  • بزرگ سکھ پر تشدد، کیفلیورنیا پولیس چیف کے بیٹے پر فرد جرم عائد

    بزرگ سکھ پر تشدد، کیفلیورنیا پولیس چیف کے بیٹے پر فرد جرم عائد

    واشنگٹن : کیلیفورنیا کی عدالت نے پولیس چیف کے نوجوان بیٹے پر بزرگ سکھ صاحب سنگھ کو لوٹنے اور بہیمانہ تشدد کا نشانہ بنانے کے الزام میں فرد جرم عائد کردی۔

    تفصیلات کے مطابق امریکی ریاست کیلیفیورنیا کی عدالت نے بدھ کے روز ریاستی پولیس کے سربراہ کے 18 سالہ بیٹے پر بزرگ سکھ کو رہائشی علاقے میں لوٹنے اور تشدد کرنے کے الزام میں فرد جرم عائد کردی ہے۔

    امریکی خبر رساں ادارے کا کہنا تھا کہ متاثرہ سکھ کی شناخت 71 سالہ صاحب سنگھ کے نام سے ہوئی ہے، جسے پیر کے روز کیلیفورنیا کے شہر مینٹیکا میں نشانہ بنایا گیا تھا۔

    پولیس کا کہنا تھا کہ صاحب سنگھ پر حملے کا واقعہ گلی میں لگے سی سی ٹی وی کیمروں میں ریکارڈ ہوگیا تھا، ویڈیو میں دیکھا جاسکتا ہے کہ بزرگ شخص سڑک پر جارہا تھا کہ اچانک دو نوجوانوں نے صاحب سنگھ کو لوٹنے کی نیت سے روکا اور کچھ لمحے بعد بزرگ شہری پر لاٹیں برسانہ شروع کردیں۔

    پولیس نے میڈیا کو بتایا کہ ملزمان کے حملے میں زخمی ہونے والے صاحب سنگھ کو طبی امداد کے لیے فوری طور پر اسپتال منتقل کردیا گیا تھا، جنہیں اسپتال انتظامیہ نے علاج کے بعد خارج کردیا تھا۔

    غیر ملکی خبر رساں ادارے کا کہنا تھا کہ پولیس نے 71 سالہ بزرگ پر حملے کی ویڈیو سماجی رابطے کی ویب سایٹ فیس بُک پر جاری کردی تھی جس کی مدد سے ملزمان کو گرفتار کیا گیا۔

     

    امریکی میڈیا کا کہنا تھا کہ گرفتار ملزمان میں ایک شخص کا کیلیفورنیا پولیس کے سربراہ کا 18 سالہ بیٹا تھا، جس پر ریاست کی اعلیٰ عدالت سے بزرگ شخص پر تشدد کرنے اور لوٹنے کا باقائدہ مقدمہ قائم کردیا ہے۔

  • امریکا سے تنازع ترک کرنسی پر اثرانداز ہونے لگا، لیرا کی قدر میں ریکارڈ کمی

    امریکا سے تنازع ترک کرنسی پر اثرانداز ہونے لگا، لیرا کی قدر میں ریکارڈ کمی

    انقرہ: امریکی صدر ڈونلڈ ٹرمپ کی جانب سے ترک مصنوعات پر اضافی محصولات کا بیان ترک کرنسی پر اثر انداز ہونے لگا، لیرا کی قدر میں ریکارڈ کمی دیکھی گئی۔

    تفصیلات کے مطابق گذشتہ دنوں امریکی صدر ڈونلڈ ٹرمپ نے یہ اعلان کیا تھا کہ وہ ترکی سے امریکا میں دھاتوں اور دھاتی مصنوعات کی درآمدات پر عائد کردہ محصولات کو دوگنا کر رہے ہیں۔

    غیر ملکی خبر رساں ادارے کے مطابق امریکا کی جانب سے ترک مخالف بیان کے بعد ترک کی کرنسی لیرا بری طرح متاثر ہوئی ہے، جس کی قدر میں ریکاڑ کمی دیکھنے میں آئی ہے۔

    خیال رہے کہ ترکی اور امریکا کے درمیان کئی دنوں سے ایک ایسا تنازع کافی شدت اختیار کر چکا ہے، جس کی وجہ ماضی قریب میں ترکی میں ایک امریکی پادری کی گرفتاری بنی تھی۔

    امریکا دھمکیوں سے باز نہ آیا تو ترکی بھی اپنے مؤقف پر ڈٹ جائے گا

    ترکی میں گرفتار امریکی پادری پر یہ الزام ہے کہ وہ ترکی میں دہشت گرد کارروائیوں میں ملوث ہے، تاہم امریکا نے مذکورہ الزامات کی تردید کی ہے۔

    قبل ازیں امریکی صدر ٹرمپ اپنے ایک بیان میں یہ بھی کہہ چکے ہیں کہ وہ ترکی سے امریکا درآمد کی جانے والی فولاد کی مصنوعات پر 20 فیصد اور المونیم کی مصنوعات پر 50 فیصد اضافی محصولات کے نفاذ کا حکم دے رہے ہیں۔

    دوسری جانب ترک صدر رجب طیب اردگان نے ملکی عوام سے کہا ہے کہ وہ ترکی کے اقتصادی دشمنوں کے خلاف ’قومی جنگ‘ کے لیے خود ٹرکش کرنسی لیرا خریدیں، ان کا یہ بیان ترکی کرنسی کی قدر میں کمی کے بعد سامنے آیا ہے۔

  • افغان مفاہمتی عمل میں شمولیت کے لیے طالبان پر شدید دباؤ ہے: امریکی وزیر دفاع

    افغان مفاہمتی عمل میں شمولیت کے لیے طالبان پر شدید دباؤ ہے: امریکی وزیر دفاع

    واشنگٹن: امریکی وزیر دفاع جیمز میٹس نے کہا ہے کہ افغان مفاہمتی عمل میں شمولیت کے لیے طالبان پر شدید دباؤ ہے، افغان سیکیورٹی فورسز کی صلاحتیوں میں اضافے پر کام جاری ہے۔

    ان خیالات کا اظہار انہوں نے پنٹاگون میں صحافیوں سے گفتگو کرتے ہوئے کیا، امریکی وزیر دفاع کا کہنا تھا کہ افغان مفاہمتی عمل تمام صورت حال میں سب سے اہم ستون ہے، اس کے ذریعے مسائل کا حل ممکن ہے۔

    انہو نے کہا کہ مفاہمتی عمل افغان حکومت کی سربراہی میں جاری ہے، مفاہمتی عمل میں شمولیت کے لیے افغان طالبان پر شدید دباؤ ہے، حالات کا بخوبی جائزہ بھی لے رہے ہیں۔

    جیمز میٹس کا کہنا تھا کہ جنوبی ایشیا کے لیے امریکی حکمت عملی کے مثبت نتائج آرہے ہیں، جلد حالات پہلے سے بہتر ہوں گے۔

    پاکستانی سفیر کی امریکی وزیر دفاع سے ملاقات، افغان صورت حال پر گفتگو

    قبل ازیں میٹس نے پنٹاگون میں گذشتہ ماہ 31 جولائی کو پاکستانی سفیر علی جہانگیر سے ملاقات کی تھی، اس موقع پر بھی افغان صورت حال پر تبادلہ خیال کیا گیا تھا۔

    سفارتی ذرائع نے کہا تھا کہ ملاقات میں پاک امریکا تعلقات سمیت خطے کی سیکیورٹی صورت حال پر بھی گفتگو سمیت افغان طالبان کو مذاکرات کی جانب لانے کی کوششوں پر بھی بات چیت ہوئی تھی۔

    علاوہ ازیں امریکا طالبان کو مذاکرات کی میز پر بیٹھانے کی کوششوں میں ہے، جبکہ گذشتہ دنوں امریکا کے اعلیٰ اہلکار نے طالبان کے نمائندوں سے قطری دارالحکومت دوحہ میں ملاقات بھی کی تھی۔

  • میکسیکو میں دو بڑے سمندری طوفانوں کا خطرہ، حکام کی عوام کو ہدایات جاری

    میکسیکو میں دو بڑے سمندری طوفانوں کا خطرہ، حکام کی عوام کو ہدایات جاری

    میکسیکو سٹی: امریکی ریاست میکسیکو میں دو بڑے سمندری طوفانوں کا خطرہ ہے جس کے باعث حکام نے عوام کو حفاظتی اقدامات کی ہدایت کی ہے۔

    تفصیلات کے مطابق شمالی امریکی ریاست میکسیکو میں بحیرہ اوقیانوس کے دو بڑے سمندری طوفانوں کا خطرہ ہے جس کے پیش نظر حکام نے عوام کو ہوشیار رہنے اور حفاظتی اقدامات کرنے کی ہدایت کی ہے۔

    امریکی میڈیا کے مطابق سمندری طوفانوں پر نگاہ رکھنے والے امریکی ادارے نے بتایا ہے کہ جان نامی طوفان اگلے دنوں میں ایک بڑا طوفان بن سکتا ہے، جس سے تباہی پھیل سکتی ہے۔

    ادارے کا کہنا تھا کہ دوسرا الینیا نامی طوفان جوں جوں میکسیکو کی ساحلی علاقے کے قریب ہو رہا ہے، اس کی قوت کم ہوتی جا رہی ہے، تاہم اس کے باوجود مغربی میکسیکو کو ان دونوں طوفانوں سے شدید بارشوں اور پھر سیلابوں کا سامنا ہوگا۔

    ٹیکساس میں ہاروے کی تباہ کاریوں کے بعد امدادی کارروائیاں، 47 ہلاک

    قبل ازیں گذشتہ سال ستمبر میں امریکی ریاست ٹیکساس میں سمندری طوفان ہاروے نے بڑی تباہی مچائی تھی، جس کے نتیجے میں 47 افراد زندگی کی بازی ہار گئے تھے، جبکہ امداری کارروائیوں کے لیے امریکی صدر نے بھاری رقوم خرچ کیے تھے۔

    خیال رہے کہ مذکورہ سمندری طوفان کے باعث ٹیکساس کا شہر ہیوسٹن ہاروے سب سے زیادہ متاثر ہوا تھا، لاکھوں کی تعداد میں افراد اسپتال منتقل ہوئے جبکہ اسی تعداد میں ہی گھروں کو بھی نقصان پہنچا تھا۔

    واضح رہے کہ اس سے قبل بھی متعدد بار امریکی ریاستوں کو سمندری طوفان کا خطرہ رہا ہے، جبکہ ان دنوں امریکی ریاست میکسیکو میں سمندری طوفانوں کا خطرہ ہے۔

  • امریکا ایران پر پابندیاں لگا کر پچھتائے گا: حسن روحانی

    امریکا ایران پر پابندیاں لگا کر پچھتائے گا: حسن روحانی

    تہران: ایرانی صدر حسن روحانی نے کہا ہے کہ امریکا ایران پر پابندیاں لگا کر پچھتائے گا، ڈونلڈ ٹرمپ پر کبھی اعتماد نہیں کرسکتے۔

    ان خیالات کا اظہار انہوں نے مقامی ٹی وی کو انٹرویو دیتے ہوئے کیا، حسن روحانی نے ایران پر امریکی پابندیوں کے اعلان پر سخت موقف اختیار کیا۔

    انہوں نے کہا کہ امریکا کبھی بھی قابل اعتماد نہیں ہوسکتا، امریکی صدر ڈونلڈ ٹرمپ کو ثابت کرنا ہوگا کہ وہ مذاکرات سے تنازع کا حل چاہتے ہیں، موجودہ حالات مذاکرات کے بجائے مزید تنازعات کو جنم دے رہے ہیں۔

    ایرانی صدر کا کہنا تھا کہ ایک شخص کے ہاتھ میں چوقو ہو اور وہ چاقو کے ہمراہ مذاکرات کرنا چاہے تو یہ ممکن نہیں، پہلے اسے چاقو اپنی جیب رکھنا ہوگا۔

    ان کا کہنا تھا کہ ایران اقتصادی پابندیوں میں رہتے ہوئے مذاکرات نہیں کرسکتا، ٹرمپ کی جانب سے ایران جوہری معاہدے سے دست برداری کا اعلان کیا گیا اس کے بعد سے ہی ان پر بھروسہ اور اعتماد نہیں رہا۔

    ڈونلڈ‌ ٹرمپ نے ایران پر اقتصادی پابندیاں‌ عائد کردیں

    حسن روحانی کا مزید کہنا تھا کہ ایران نے ہمیشہ مذاکرات کو ترجیح دی ہے، مگر موجودہ جو حالات ہیں ایسے میں بات چیت ممکن نہیں ہے، امریکا کو اپنے فیصلوں سے پیچھے ہٹنا ہوگا، ایران ہمیشہ سے سفارت کاری کا حامی رہا ہے۔

    خیال رہے کہ آج امریکی صدر ڈونلڈ ٹرمپ نے ایگزیکٹو آرڈر پر دستخط کردئیے ہیں، آج رات 12 بجے کے بعد اقتصادی شعبے پر پابندیوں کا اطلاق ہوجائے گا، 5 نومبر کو توانائی اور تیل کی صنعتوں پر پابندیاں لگائی جائیں گی۔

    دوسری جانب یورپی یونین کی جانب سے امریکی فیصلے کو مسترد کرتے ہوئے ایران کا ساتھ دینے کا فصیلہ کیا گیا ہے، اور اپنے کاروبار بھی ایران کے ساتھ جاری رکھنے عزم ظاہر کیا ہے۔

  • ایران پر امریکی پابندیاں یورپی یونین نے مسترد کردیں

    ایران پر امریکی پابندیاں یورپی یونین نے مسترد کردیں

    پیرس: جوہری معاہدے سے دست برداری کے بعد امریکی صدر ڈونلڈ ٹرمپ نے ایران پر اقتصادی پابندیوں سے متعلق ایک بل پر دستخط کردیے، جسے یورپی یونین نے مسترد کردیا۔

    تفصیلات کے مطابق امریکی صدر ڈونلڈ ٹرمپ نے ایگزیکٹو آرڈر پر دستخط کر دیے ہیں، آج رات 12 بجے کے بعد ایران پر اقتصادی شعبے پر پابندیوں کا اطلاق ہوجائے گا، جسے یورپی یونین نے نہ ماننے کا فیصلہ کیا ہے۔

    غیر ملکی خبر رساں ادارے کے مطابق یورپی یونین کی جانب سے جاری کردہ بیان میں کہا گیا ہے کہ یورپی یونین اس قسم کی اقتصادی پابندیوں کے خلاف ہے، ایران کے ساتھ اپنا کاروبار جاری رکھیں گے۔

    بیان میں کہا گیا ہے کہ ایران کے ساتھ معاشی تعلقات برقرار رکھیں گے، اور اس کے تحفظ کے لیے ہر ممکن کوشش کریں گے، امریکی پابندیوں کی تفصیلات سامنے آنے کے بعد یورپی یونین متفقہ حکمت عملی وضع کرے گی۔

    ڈونلڈ‌ ٹرمپ نے ایران پر اقتصادی پابندیاں‌ عائد کردیں

    خیال رہے کہ آج امریکی صدر ڈونلڈ ٹرمپ نے ایگزیکٹو آرڈر پر دستخط کردیے ہیں جس کا اطلاق آج سے ہوگا، جبکہ 5 نومبر کو توانائی اور تیل کی صنعتوں پر بھی  پابندیاں لگائی جائیں گی۔

    واضح رہے کہ پابندیوں سے متعلق صدر ٹرمپ کا کہنا تھا کہ پابندیوں کے بعد ایران کے ساتھ تجارتی تعلقات سنگین نتائج کے ہوں گے، ایران کو رویہ تبدیل کرکے عالمی طاقتوں سے دوبارہ مذاکرات کرنا ہوں گے، نئے معاہدے میں ایرانی حکومت کی تمام منفی سرگرمیوں کا مکمل احاطہ ہوگا۔

    یاد رہے کہ 2015 میں اس وقت کے امریکی صدر بارک اوباما اور ایرانی حکومت کے درمیان جوہری معاہدہ ہوا تھا جس کے سبب ایران پر سے معاشی پابندیاں ختم کردی گئی تھیں۔

  • کیلیفورنیا میں چھوٹا طیارہ حادثے کا شکار، 5 افراد ہلاک

    کیلیفورنیا میں چھوٹا طیارہ حادثے کا شکار، 5 افراد ہلاک

    واشنگٹن : امریکی ریاست کیلیفورنیا میں چھوٹا مسافر طیارہ اڑان بھرنے کے فوراً بعد 1.6 کلومیٹر کے فاصلے پر شاپنگ مال میں گرکر تباہ ہوگیا، جس کے نتیجے میں 5 افراد ہلاک ہوگئے۔

    تفصیلات کے مطابق امریکی ریاست کیلیفورنیا میں واقع اسٹرپ نامی شاپنگ مال کی کار پارکنگ میں اچانک چھوٹا طیارہ انجن میں فنی خرابی کے باعث گر کر تباہ ہوگیا، حادثے کے نتیجے میں جہاز میں سوار پانچ افراد موقع پر ہی ہلاک ہوگئے تھے۔

    غیر ملکی خبر رساں ادارے کا کہنا تھا کہ مذکورہ طیارہ دو انجن والا کیسنا 414 تھا جو جان وائن ایئر پورٹ کے رن وے سے اڑان بھرنے کے فوراً بعد 1.6 کلو میٹر کے فاصلے پر شاپنگ مال کی پارکنگ میں کھڑی لال رنگ کی گاڑی پر گر کر تباہ ہوگیا۔

    امریکی خبر رساں ادارے کا کہنا تھا کہ طیارے کے پرواز کرنے کے بعد ہی پائلٹ نے کنٹرول روم کے عملے کو جہاز میں فنی خرابی سے آگاہ کردیا تھا تاہم کچھ دیر بعد ہی طیاہ حادثے کا شکار ہوگیا۔

    کیلی فورنیا پولیس کے ترجمان کا کہنا ہے کہ جہاز گذشتہ روز 12 بج کر 28 منٹ پر حادثے کا شکار ہوا تھا اور خوش قسمتی سے طیارے کی زد میں آنے والی کار کا مالک چند لمحے قبل ہی گاڑی سے اتر کر  مال میں گیا تھا۔

    پولیس کا کہنا تھا کہ فیڈرل ایوی ایشن اور نیشنل ٹرانسپورٹ سروس کی جانب سے طیارہ حادثے کی تحقیقات کا آغاز کردیا گیا ہے۔ تاہم حادثے میں ہلاک ہونے والوں کی تاحال شناخت نہیں ہوسکی ہے۔

    میکسیکو میں مسافر طیارہ حادثے کا شکار، 85 افراد زخمی

    خیال رہے کہ چند روز قبل بھی امریکی ریاست میکسیکو کے شہر ڈورانگو میں ایرو میکسیکو نامی فضائی کمپنی کا مسافر بردار طیارہ اے ایم 2431 رن وے سے اڑان بھرنے کے فوراً بعد 10 کلو میٹر کے فاصلے پر گر کر تباہ ہوگیا جس کے نتیجے میں 85 افراد زخمی ہوگئے تھے۔

    غیر ملکی خبر رساں ادارے کے مطابق حادثے کا شکار ہونے والے طیارے میں97 مسافروں سمیت 101 افراد سوار تھے، جائے حادثہ سے 85 زخمیوں کو اسپتال منتقل کر دیا گیا ہے۔

  • چین نے نئے ٹیکسز کے باعث امریکا کے سامنے گھٹنے ٹیکے ہیں، ڈونلڈ ٹرمپ

    چین نے نئے ٹیکسز کے باعث امریکا کے سامنے گھٹنے ٹیکے ہیں، ڈونلڈ ٹرمپ

    واشنگٹن : امریکی صدر ڈونلڈ ٹرمپ نے اپنی معاشی پالیسیوں پر تنقید کرنے والوں کو نشانہ بناتے ہوئے کہا گیا ہے کہ ’چین پر محصولات عائد کرنے سے بیجنگ مذاکرات کرنے کے لیے امریکا کے سامنے سرنگوں ہوا ہے‘۔

    تفصیلات کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر محصولات کے حوالے سے بنائی جانے والی پالیسی پر تنقید کرنے والوں کو تنقید کا نشانہ بناتے ہوئے دعویٰ کیا ہے کہ بیجنگ پر ٹیکس عائد کرنے سے چین امریکا کے ساتھ مذاکرات کرنے کے لیے تیار ہوا ہے۔

    غیر ملکی خبر رساں ادارے کا کہنا تھا کہ ٹرمپ نے ٹویٹر پر دعویٰ کیا تھا کہ چینی اشیاء پر ٹیکس عائد کرنے کے بعد کسی کو یقین نہیں تھا کہ چین مذاکرات کے لیے امریکا کے سامنے سرنگوں ہوجائے گا۔

    امریکی صدر ڈونلڈ ٹرمپ کا کہنا تھا کہ مجھے علم تھا چینی اشیاء پر محصولات عائد کرنے سے نتائج اچھے ہی آئیں گے، لیکن چند بے وقوف لوگ مجھ پر تنقید کررہے تھے اور میری معاشی پالیسیوں کا مذاق اڑا رہے تھے۔

    غیر ملکی خبر رساں ادارے کے مطابق ڈونلڈ ٹرمپ کا کہنا ہے کہ ٹیکسز کے حوالے سے امریکی پالیسی میں تبدیلی سے بہتر نتائج سامنے آئیں گے، جس کے باعث امریکی معیشت میں اضافہ ہوگا۔

    غیر ملکی خبر رساں ادارے کا کہنا تھا کہ ڈونلڈ ٹرمپ کی پالیسیوں سے مقامی تاجروں میں امید کی نئی کرن پیدا ہوئی ہے، کیوں کہ چین کی مارکیٹ میں 27 فیصد تک کمی واقع ہوئی ہے۔

    امریکی صدر ڈونلڈ ٹرمپ نے ٹویٹر پر کیے گئے ٹویٹ میں ’امریکا فرسٹ‘ کا نعرہ بھی تحریر کیا تھا۔

    غیر ملکی خبر رساں ادارے کا کہنا تھا کہ ڈونلڈ ٹرمپ نے امریکا درآمد کی جانے والی چینی مصنوعات پر 34 ارب ڈالرز کے محصولات عائد کرچکے ہیں، جبکہ مستقبل میں امریکا کی جانب سے چین پر مزید 16 ارب ڈالر کے ٹیکس عائد کیے جائیں گے۔

  • امریکا کا شمالی کوریا پر دباؤ برقرار رکھنے کا فیصلہ

    امریکا کا شمالی کوریا پر دباؤ برقرار رکھنے کا فیصلہ

    واشنگٹن: شمالی کوریا کی جانب سے جوہری سرگرمیاں جاری رکھنے پر امریکا نے اپنا دباؤ برقرار رکھنے کا فیصلہ کیا ہے۔

    تفصیلات کے مطابق اقوام متحدہ کی ایک رپورٹ میں کہا گیا تھا کہ شمالی کوریا اپنی جوہری سرگرمیاں جاری رکھے ہوئے ہے جس کے بعد امریکا نے اپنا دباؤ برقرار رکھنے کا فیصلہ کیا ہے۔

    غیر ملکی خبر رساں ادارے کے مطابق امریکی وزیر خارجہ مائیک پومپیو نے اپنے جاری کردہ بیان میں کہا ہے کہ شمالی کوریا کے جوہری اور میزائل پروگراموں کو روکنے کی خاطر امریکا سمیت عالمی برادری اس کمیونسٹ ریاست پر دباؤ برقرار رکھے گا۔

    امریکی وزیر خارجہ کا کہنا تھا کہ شمالی کوریا کے سربراہ کم جونگ ان نے عہد کیا تھا کہ وہ جوہری پروگرام ترک کردیں گے، تاہم ہم پر امید ہیں کہ مسئلہ حل ہو جائے گا۔

    شمالی کوریا نے 65 سال بعد امریکی فوجیوں کی لاشیں واپس کردیں

    یاد رہے کہ گذشتہ دنوں اقوام متحدہ کی رپورٹ میں کہا گیا تھا کہ امریکی صدر ڈونلڈ ٹرمپ اور شمالی کوریائی رہنما کم جونگ ان کی تاریخی سمٹ کے باوجود پیونگ یانگ نے اپنا جوہری پروگرام ترک نہیں کیا ہے۔

    خیال رہے کہ امریکی صدر ڈونلڈ ٹرمپ اور شمالی کوریا کے سربراہ نے سنگاپور میں تاریخی ملاقات کی تھی جس کے بعد صدر ٹرمپ کا یہ موقف تھا کہ کم جونگ ان جوہری ہتھیاروں کی سرگرمیاں ترک کردیں گے۔

    بعد ازاں امریکی صدر ڈونلڈ ٹرمپ متعدد بار کہہ چکے ہیں کہ شمالی کوریا اپنی جوہری سرگرمیاں ترک کرنے کے لیے اقدامات کررہا ہے اور ہمیں اس سے کوئی خطرہ نہیں ہے۔

  • تجارتی جنگ، چین نے امریکی مصنوعات پر اضافی محصولات عائد کردیے

    تجارتی جنگ، چین نے امریکی مصنوعات پر اضافی محصولات عائد کردیے

    بیجنگ: چین اور امریکا کے درمیان تجارتی جنگ شدت اختیار کرگئی، چین نے امریکی مصنوعات پر اضافی محصولات عائد کردیے۔

    تفصیلات کے مطابق حالیہ ہفتوں سے امریکا اور چین کے درمیان تجارتی جنگ جاری ہے، دونوں ملکوں کے درمیان اس تجارتی جنگ میں اُس وقت مزید شدت آگئی جب چین نے امریکی مصنوعات پر اضافی ٹیکس عائد کردیے۔

    غیر ملکی خبر رساں ادارے کے مطابق چین نے امریکی مصنوعات پر ساٹھ بلین ڈالر کے اضافی ٹیکس عائد کرنے کا اعلان کیا ہے، جس پر امریکا نے بھی سخت اقدامات کی دھمکی دی ہے۔

    چین کی جانب سے یہ اضافی محصولات، ایل این جی، گوشت اور جہازوں کے پرزہ جات جیسی مصنوعات پر عائد کیے گئے ہیں، چین نے امریکا کو خبردار کیا ہے کہ وہ اس حوالے سے مزید اقدامات بھی کر سکتا ہے۔

    تجارتی جنگ، چین کا امریکا کو اہم مشورہ

    دوسری جانب امریکی وائٹ ہاؤس نے بھی واضح الفاظ میں کہا ہے کہ چین امریکی صدر کے ارادوں کو ہلکا مت لے، وہ اپنی تجارتی پالیسیوں پر عمل پیرا رہیں گے۔

    قبل ازیں چینی وزیر خارجہ ’وانگ یی‘ نے گذشتہ روز اپنے ایک بیان میں کہا تھا کہ تجارتی جنگ کے دوران امریکا اپنے ’دماغ کو ٹھنڈا‘ رکھے اور سوچ سمجھ کر فیصلے کرے۔

    انہوں نے یہ بھی کہا تھا کہ امریکا کی جانب سے چین کو دبانے کے لیے جو بھی اقدامات کیے جارہے ہیں وہ کسی کام کے نہیں ہیں، چین اپنی تجارت جاری رکھے گا۔