واشنگٹن: امریکا میں ٹرانسپورٹ سیکیورٹی کی انتظامیہ نے دھماکہ خیز مواد کو چھپائے جانے کے امکان کے اندیشے سے گزشتہ موسم گرما سے امریکی مسافروں کے الیکٹرونک آلات کی چیکنگ کو مزید سخت کردیا ہے۔
غیر ملکی خبر رساں ادارے کے مطابق انتظامیہ چاہتی ہے کہ دیگر ممالک کے ہوائی اڈوں پر بھی امریکا کا رخ کرنے والے مسافروں کے الیکٹرونک آلات کی چیکنگ کے عمل کو سخت کیا جائے۔
جولائی 2017 میں امریکی انتظامیہ نے اندرون ملک تمام پروازوں کے مسافروں سے اس مطالبے کا اعادہ کیا تھا کہ وہ ایسے تمام برقی آلات خصوصی تلاشی کے پیش نظر اپنے سامان سے نکال دیں جن کا حجم موبائل فون سے بڑا ہو، ان میں ٹیبلٹ، برقی کتابیں، ویڈیو گیمز کے کنسولز شامل ہیں۔
امریکی ٹرانسپورٹ سیکیورٹی کی جانب سے جاری نئی یادداشت میں کہا گیا ہے کہ غیر ملکی ہوائی اڈے امریکی ٹرانسپورٹ سیکیورٹی 2017 کے وسط سے لاگو پالیسی کو اپنائیں، اس حوالے سے مسافروں کو کھانے پینے کی اور ایسی دیگر اشیاء باہر نکال کر چیک کرانا ہوں گی جن کا معائنہ اسکینرز میں باریک بینی سے نہیں کیا جاسکتا۔
انتظامیہ کے مطابق امریکا سوٹ کیسز اوربیگز کو مذکورہ اشیاء سے خالی کرنے کے حوالے سے غیر ملکی حکومتوں کے ساتھ تعاون کے لیے کوشاں ہے۔
امریکی انتظامیہ کا مقصد 105 ممالک کے 280 ایسے ہوائی اڈوں پر مسافروں کی تلاشی ہے جہاں سے پروازیں امریکا کا رُخ کرتی ہیں، واضح رہے کہ روزانہ 2100 پروازوں کے ذریعے تقریباً 3.25 لاکھ مسافر امریکا پہنچتے ہیں۔
