کراچی: انسداددہشتگردی عدالت میں پولیس نے ایم کیوایم کے رہنما عامر خان کی تفتیش مکمل کرتے ہوئے چالان پیش کردیا، چالان میں عامر خان پر دہشت گردوں کو پناہ دینے کا الزام عائد کیا گیا ہے۔
گزشتہ سماعت میں انسداد دہشت گردی کی عدالت نے ایم کیو ایم کے رہنما عامر خان کو دہشت گردوں کو پناہ دینے کے الزام کے مقدمے میں14 روزہ جوڈیشل ریمانڈ پر جیل بھیجنے کا حکم دیا تھا جبکہ عدالت میں عامر خان کے وکلاء کی جانب سے بی کلاس دیئے جانے کی درخواست کو بھی منظور کر لیا گیا تھا۔
واضح رہے کہ رینجرز نے گیارہ مارچ کو کراچی میں ایم کیو ایم کے مرکز نائن زیرو پر چھاپے کے دوران عامر خان سمیت متعدد افراد کو حراست میں لے لیا تھا، جہاں عامر خان کو نوے روز حراست میں رکھنے کے بعد مزید تفتیش کے لئے پولیس کے حوالے کردیا گیا تھا۔