کراچی:امجد صابری کے اہل خانہ نے کہا ہے کہ ایک سال گزرنے کے باوجود امجد صابری کے قاتلوں کو سزا نہیں ملی، پاکستانی چھوڑ کر کہیں نہیں جارہے، جینا مرنا یہیں ہے۔
دیگر فنکاروں کے ہمراہ پریس کانفرنس کرتے ہوئے امجد صابری کے بھائی طلحہ صابری نے کہا کہ ایک سال گزر گیا لیکن امجدصابری کے قاتلوں کواب تک سزا نہ ملی، اداروں پر یقین ہے لیکن ملزمان کو سزا ہوگی تو اہل خانہ کو سکون ملےگا۔
انہوں نے مطالبہ کیا کہ امجد صابری کی برسی آنے سے قبل ملزموں کو سزا دی جائے۔
ان کا کہنا تھا کہ امجد صابری کی گاڑی اور دیگر سامان فیملی کے حوالے نہیں کیا گیا وہ سامان بھی ہمیں دیا جائے۔
طلحہ صابری نے کہا کہ پاکستان چھوڑنے کی باتوں میں صداقت نہیں،جینا مرنا یہیں ہے، ہم پاکستان چھوڑ کر کہیں نہیں جا رہے، امجد کے قتل کے بعد بھی پاکستان میں رہیں گے۔
واضح رہے کہ امجد صابری کی والدہ اور بھائیوں نے اے آر وائی نیوز کے پروگرام الیونتھ آور میں شرکت کرکے ٹی وی پر کہا تھا کہ ان کی جانوں کا خطرہ ہے، ایک عورت انہیں خبردار کر گئی ہے اس لیے ہم پاکستان چھوڑنا چاہتے ہیں۔
