بھارتی افواج میں ہر تیسرے روز ایک خودکشی جبکہ سالانہ 100 سے زائد خودکشی کے واقعات پیش آتے ہیں جن میں اکثر جموں و کشمیر میں ہوتے ہیں۔
اس حوالے سے کشمیر میڈیا سروس کی رپورٹ میں بتایا گیا ہے کہ بھارتی فوجیوں میں ذہنی دباؤ اور پست ہمت کے باعث خودکشی کے واقعات عام ہوتے جارہے ہیں۔
تازہ ترین اطلاعات کے مطابق مقبوضہ کشمیر میں ایک اور بھارتی فوجی نے خودکشی کرلی، 168بریگیڈ کے سپاہی نے ضلع سانبہ کے فوجی کیمپ میں سرکاری رائفل سےخود کو گولی مارلی۔
فوج کیمپ میں گولی کی آواز سے افسران اور اہلکاروں کی دوڑیں لگ گئیں، جائے وقوعہ پر ایک کانسٹیبل کی لاش خون میں لت پت پڑی تھی اور قریب ہی اس کی سرکاری رائفل بھی موجود تھی۔
واقعے کی تحقیقات کے لیے انکوائری کمیٹی تشکیل دے دی گئی۔ تاہم ابتدائی تحقیقات میں بتایا گیا ہے کہ شواہد سے لگتا ہے کہ کانسٹیبل نے نامعلوم وجوہات کے باعث خودکشی کی، لاش کو ضروری کارروائی کے بعد لواحقین کے حوالے کردیا گیا۔
واضح رہے کہ سال 2001 سے اب تک مختلف واقعات میں 3300سے زائد بھارتی فوجی خودکشی کر چکے ہیں۔ صرف پچھلے 5 سالوں میں 800 سے زائد بھارتی جوانوں نے بالا افسران کے رویے سے تنگ آکر اپنی زندگی کا خاتمہ کر لیا۔
23 جنوری 2023 کو کرنل کھنہ نے پنکھے سے لٹک کر خود کشی کر لی جبکہ 9جنوری 2023 کو فیروز پور میں لیفٹیننٹ کرنل نشانت نے بیوی کو گولی مار کر خود کشی کر لی۔
مرد تو مرد بھارتی فوج میں خواتین افسران بھی خود کشی پر مجبور ہیں۔ 2006 میں لیفٹیننٹ سشمیتا چکروتی نے بھرتی کے صرف 10ماہ بعد اپنی جان لے لی تھی۔ سشمیتا کے مطابق بالا افسران اُسے رات گئے ڈانس پارٹیوں اور ناجائز مطالبات کے لیے مجبور کرتے تھے۔