لاہور : اینٹی کرپشن کے عملے نے اے ایس آئی کو رشوت لیتے ہوئے رنگے ہاتھوں گرفتار کرلیا، جعلی کاغذات کے ذریعے پولیس میں بھرتی ہونے والا اشتہاری ملزم پکڑا گیا۔
تفصیلات کے مطابق اینٹی کرپشن لاہور کی کرپٹ عناصر کے خلاف کارروائیاں جاری ہیں، ٹیم نے ڈرامائی انداز میں اے ایس آئی کو رشوت لیتے ہوئے رنگے ہاتھوں گرفتار کرلیا۔
اس حوالے سے ذرائع اینٹی کرپشن کا کہنا ہے کہ ملزم نے درخواست گزار کی بہن کو نائب قاصد لگوانے کیلئے رشوت طلب کی تھی، درخواست پر فوری کارروائی کر کے اے ایس آئی کو رنگے ہاتھوں پکڑ لیا۔
دوسری جانب لاہورمیں اینٹی کرپشن کی ایک اور کارروائی میں عدالتی اشتہاری ملزم کو گرفتار کیا گیا، ذرائع کے مطابق ملزم نے جعلی کاغذات پر پولیس میں ملازمت حاصل کی تھی۔
ملزم مزمل عدالت میں جرم ثابت ہونے پر مفرور ہو گیا تھا، جسے خفیہ اطلاع پر کارروائی کر کے حراست میں لے لیا گیا۔
واضح رہے کہ اینٹی کرپشن اسٹیبلشمنٹ پنجاب نے ایک سالہ کارکردگی رپورٹ جاری کردی ہے، رپورٹ میں بتایا گیا ہے کہ اگست 2019تک 108 ارب روپے کی تاریخی وصولی ہوئی، جن میں سے 1 ارب 63 روپے براہ راست وصول ہوئے۔
رپورٹ میں بتایا گیا ہے کہ اینٹی کرپشن نے ایک سال میں تقریبا 103 ارب 43 کروڑ کی زمین واگزار کرائی، اسی طرح 2 ارب 81 کروڑ روپے کی انڈر یکٹ ریکوری بھی کی۔
مزید پڑھیں : پنجاب اینٹی کرپشن یونٹ کی ایک سالہ کارکردگی رپورٹ
رپورٹ کے مطابق اینٹی کرپشن پنجاب کو 2 لاکھ 65 ہزار سے زائد شکایتی درخواستیں موصول ہوئیں جن میں سے 27 ہزار سے زائد کو حل کردیا گیا جبکہ 5 ہزار 400 سے زائد تحقیقات شروع کیں اور 8700 سے زائد درخواستوں پر فیصلہ سنایا۔
اینٹی کرپشن رپورٹ میں بتایا گیا ہے کہ چھان بین کےبعد 1509 کیسز رجسٹرہوئے اور 2014 سے جاری کیسز کا فیصلہ بھی سنایا گیا۔
